杨思琦近日因旧爱李泳豪的家族风波，意外于分手挨闹15年后获平反。她近日出席伍咏薇（伍姑娘）及李凯贤（Brian）主持的HOY节目《九运会客室》时，被伍姑娘大爆料，指思琦当年拍剧时被前辈带头欺凌，日日开工被“一围人”恰，例如前辈会大声对空气说话“𠮶啲唔知咩人嚟㗎！捞咗咁多年，啲灯又遮住我块面，都唔知点㗎！”明闹杨思琦阻住灯光，请其他演员吃甜品时，又会故意当睇唔到杨思琦等等，逼得她哑忍多次后终于爆煲，大叫及冲出片场爆喊，而当她在节目上见伍姑娘重演当年欺凌者的嘴脸时，更不禁落泪。

事前不知道伍姑娘节目问题

今日思琦出席汽车品牌活动时，被问起伍姑娘所讲的欺凌事件，使她在节目中悲从中来，她指做嘉宾前完全不知道会问什么问题：“开头我仲谂系咪又追问我啲感情问题，成日追住我感情问题我都会惊嘅，后尾上到去，好自然伍姑娘就讲开，话系咪有咁嘅事，之后讲到七情上面，扮得好真又好似，我就话你个样扮得好衰呀！感触啰，你知我眼浅㗎啦，就喊咗出嚟。但系其实都过咗咁耐，我冇刻意咁去特别提起，节目又唔系我嘅，我做嘉宾啫，无需要去提起，可能伍姑娘好想同我分享返去见到嘅嘢。”不过他承认，自己当年不知道喊住走出厂后，剧组其他人的反应，是伍姑娘在节目上讲她才知道。

拒透露涉事剧集或欺凌者身份

对于外界推测涉事剧为《翻叮一族》，她回应：“我唔讲喇，大家喺节目都听咗好多嘢，已经讲到好够，唔需要再加啲盐落啲醋。”当问到商天娥、陈曼娜、夏雨被网民猜测为欺凌的嫌疑人，会否需要澄清免得有人被误会，思琦说：“越描越黑，只不过一个节目我做嘉宾，佢问到，大家去分享，而当时伍姑娘睇到嘅嘢，我有时都唔知道佢睇到咁多，我都冇记性，我自己唔会记得系咩时间、当时系点，我以前跌亲个头真系唔记得，同埋啲唔开心嘅嘢都唔使记住，过去咪过去，唔需要成日睇住。”

重提攞过飞跃奖　否认戏屎被人虾

被问以前拍剧是否常常被人虾，杨思琦说：“时运高啦，我都冇摆喺心里面，人生经历好多嘢，无论读书考试，出嚟做嘢都会有好多唔同嘅经历，呢啲又十几年啦，要讲一早讲咗，我唔会摆喺心上面，大家都放开、放下。”不过她之后表示自己很想澄清一件事，她留言到有人说“点解套套剧都系要虾你，系咪你本身有问题？”她强调自己冇问题，做足演员本分，至于是否“戏屎”被杯葛，杨思琦主动说：“有人又话你系咪戏屎，尤其是《无名天使3D》，大家都留意到当时好新嘅我，话点解你会俾人话？系咪你唔专业？你啲戏好差？我好想同大家讲，𠮶一出戏我系攞过一个奖嘅，就系飞跃进步女艺员奖！如果我真系咁差，我应该冇戏做，高层唔系盲，无啦啦你咁差都俾个奖你，咁唔应该啦，证明我都系好专业。同剧里面有冇人攞奖？又暂时未有，系咪𠮶套戏有冇其他艺员攞奖？又未有，所以希望大家去吃瓜、剥花生嘅时候，用个脑谂吓系咪真系咁差，系咪真系咁衰，你哋要分析吓。”

否认扮可怜搏同情：扮可怜有咩目的？

于是记者续问是否她太好恰、冇脾气，所以人善被人欺，思琦指：“我唔知呀，因为我唔会主动去做一个虾人嘅动作，滑蛋炒虾仁咩你估？我做人做好自己就OK，唔会话要去克住人，要去虾人我先安乐开心，我唔会做。我亦都唔明白点解我会有咁嘅经历，总之做好自己，唔使理咁多，过咗10几年之后原来你哋又会睇到一啲嘢，做自己就OK。”对于梁思浩曾批评她扮可怜、博同情，她指之前已回应过并讲得很清楚，我之前回应咗，唔使回应，我已经回应得咁清楚，又提到YouTuber刘定坚：“我多谢你，我做咩要扮可怜？扮可怜有目的，扮可怜我系咪可以演少啲戏？演少啲戏系咪我唔着数？会删咗啲戏份？咁做好自己咪算，有啲经历唔好，咪眼浅啰，细个唔识咪眼红红啰，你有冇试过？咁唔好摆喺心里面，坚定流（编按：刘定坚）多谢你嘅分析，好正，其他嘢我迟啲再慢慢话俾你听边啲啱边啲唔啱。”

曾击败商天娥夺“最佳女配角”：我系有演技嘅

方才杨思琦提起自己攞过飞跃奖，其实她亦于2006年凭《随时候命》攞过“最佳女配角”奖，并击败了《凤凰四重奏》的商天娥，有指因而得罪对方，思琦表示：“我唔知，我冇睇到，希望大家留意吓其实我系有演技嘅，除咗飞跃进步女艺员奖，你讲𠮶个女配角，我仲攞咗国际嘅奖项，系芝加哥最佳优异演员奖，系国际性，我唔系差到咁样，大家只不过你唔留意我，净系觉得我有好多Heading，或者新闻讲我，你要睇一睇我做过啲咩，或者我嘅努力先。”

强调伍咏薇是好人：佢讲嘅系真实唔系编出嚟

最后，讲到性情中人的伍姑娘在节目上连珠炮发讲起当年的欺凌事件，虽然本意是平反，但结果又令杨思琦上新闻要回应，她认为大家不应追击或怪责伍姑娘：“佢好似一个大姐姐，佢好好嘅，𠮶时都同佢一齐食饭嘅，拍剧时候一齐食饭。”她重申：“伍姑娘系一个好人！佢只系同我讲返呢件事，令我重温返，其实我真系唔记得，另外你哋问𠮶啲究竟系边个边个，你估逐个捉咩？唔需要啦，当系一个节目睇完就算，但系呢个系真实，亦都唔系编出嚟。”