舒淇近日首次执导电影《女孩》，故事以自己童年为蓝本，电影亦为她带来《第30届釜山国际影展》“最佳导演奖”。日前她现身郑裕玲（Do姐）的访谈节目《The Do Show》受访，罕有分享自己童年在暴力环境下成长的悲惨身世。

舒淇曾说过自己冇童年，她解释：“因为我其实有记忆已经系要自己煮饭、自己着衫，回忆入面冇人哋照顾我嘅场面，冇俾阿爸或者阿妈照顾，只系有俾阿爸打、俾阿妈打。”她小时候家境不太穷又不算太富有，但因晚上长期睡眠不足影响学业，不过她形容童年“喺出面嘅时候开心，喺屋企就唔开心。”因为她本身是个开心的人，会带住弟弟在外面跟其他小朋友玩，虽然弟弟常常“报串”，但两姊弟关系不错，不过家中显然重男轻女，她续说：“好奇怪，净系打我一个，细佬打烂只杯又会闹我，乜嘢都系我。”

舒淇求学时期朋友不多，13、14岁就被家人叫她去打工，舒淇后来决定离家出走，被问触发离家的导火线，虽然事过境迁她也说得淡然，但对一个少女来说，当其时创伤极大。她忆述：“有一次俾人打出去，第二次应该就系自己出去玩，朝头早先返屋企，其实我都几百厌㗎，朝头早先返屋企，之后撞咗车，我个人就冇事，我就攞咗架电单车，一路拖拖拖返屋企，我阿妈望咗我一眼，问我做乜咁早先返嚟，就有少少想发烂渣，我话我撞车，之后我阿妈由头到脚望我一眼，见到我冇事就叫我去瞓觉，我心谂‘咁好嘅？今日冇俾人闹。’就返去瞓觉，之后我阿爸突然间返嚟，就捉起我话‘点解将架车撞到咁！’之后我就离家出走。我觉得点解唔问我有冇事，之后我就跑跑跑跑，因为唔跑又俾佢打，跑出去就觉得，唔想返嚟喇，觉得自己大个，可以应该自己都可以养活自己。”自此，舒淇就再没有回家，她形容离家的日子虽然飘泊，但很开心：“因为夜晚可以瞓得著觉，唔使俾人闹，所以其实我系几开心啰我觉得，只不过你真系要去打工，揾钱食饭，同埋冇得读书，但系我有另一个圈子。”

舒淇并不讨厌自己的母亲，她谅解母亲当年的行为，因为对方18岁就生下她，舒淇表示：“佢都系一个小朋友，我阿妈细个仲惨，我阿婆生咗七个定九个唔记得咗，佢系长女，要照顾一家大细，所以佢咁细个已经生咗我，佢觉得我都应该要系咁样。”Do姐直指不是每个人都适合做父母，当问到是否觉得“生仔要考牌”，舒淇回答：“我会觉得而家系。”Do姐续问，童年经历会否影响舒淇对生儿育女的看法，究竟她倾向早婚、自己组织一个美满家庭，抑或不婚不生，舒淇直言自己没有倾向哪一方，不过自己以前从来没有谂过结婚，“因为我觉得如果你永远唔知呢个男仔，可能而家你好爱佢，佢都好爱你，但系唔知可唔可以喺埋一齐好耐，我细个已经唔系好相信专一呢两个字，所以就唔会谂住结婚呢样嘢，但系后尾我就结咗婚。”Do姐安慰她说，指她最终还是跟冯德伦结了婚，而婚姻也十分美满，舒淇认为这取决于在哪阶段遇上哪些人。二人结婚十年未有小朋友，Do姐问舒淇是否没有计划生BB，她否认：“都唔系㗎，一路都想，但系一路都冇。”

舒淇透露母亲在自己小时候已帮人凑女，包括表妹、表姪女，自己见到母亲发恶都会阻止，又会常常带表姪女去玩，笑言：“我唔恶㗎，不过佢哋觉得我好恶，我就系觉得唔可以做嘅嘢就唔可以做，但系唔会闹呀，或者唔好话打。”至于否已跟母亲和解，舒淇认为不能说和不和解：“你知道佢其实系好爱你，不过佢唔识得教小朋友，但系我同佢嘅关系其实好近，但系其实又好远，我哋见到唔会揽揽锡锡、唔会拖住佢只手行街，因为个距离已经产生咗。而家都OK，好似我同我阿妈讲叫佢睇呢部戏，我话‘你唔好幻想自己老公系呢个邱泽㖞。’”

舒淇再分享自己离家出走的生活及入行契机，她第一份工在租碟舖工作，因而常常看港产片，至于入行，因为她做模特儿、拍写真集后获王晶睇中，文隽和刘伟强便去台湾跟她见面，邀她来港发展，“我觉得，好啦，就应承咗。”舒淇每日收工靠睇粤语长片和听新闻学广东话，加上片场有人教，她很快就听得明，但她就自嘲：“不过讲就一路系咁啰，我应该一年都学识咗点样讲，但系呢一年到而家都冇乜点进步过，发音唔准𠮶啲，都系唔准。”

舒淇初来香港时，曾向自己许下承诺：“我净系俾自己五年嘅时间，我只要赢过𠮶时好红𠮶个叶玉卿小姐，只要同佢差唔多，攞个奖就得㗎喇，咁我觉得就OK！如果五年之内达唔到，我就返台湾。”最终她入行第二年就已经攞“最佳新演员”奖，翌年再荣获“最佳女配角”奖，舒淇自觉幸运，在香港遇到很多对自己好的人，机会也很多。

舒淇在访问中也回顾了一些经典电影作品的拍摄点滴，以及首执导演筒的感受，她最后又补充，虽然《女孩》以自己童年为蓝本，但她并不是想带出自己的成长环境，续说：“当我写完之后已经同我自己故事完全唔同，我系想讲当而家做爹哋妈咪𠮶啲人，或者曾经系受过家庭暴力下长大嘅人，如果你仲喺呢个伤口入面，你点样可以自己抱吓自己，自己话俾自己听你唔系一个好孤单嘅人。”她寄语同病相怜的人可以勇敢踏出第一步，或仿效她离家出走。