凭《他来自江湖》饰演“马姐”深入民心的87岁资深演员梁爱，晚年生活备受关注。早年她随导演丈夫左几移居加拿大，历尽丧夫丧子后回流香港独居。制作人杨绍鸿与梁爱交情深厚，日前就在Facebook透露梁爱已入住老人院，并发布探访合照。早前梁爱接受了杨绍鸿的YouTube频道节目《小鸿吹水站3》访问，担任嘉宾。杨绍鸿在影片下写道：“梁爱 为爱姐集气，人生的最后一个阶段，因为无法再照顾自己而要入住深圳老人院......”。片中梁爱首次公开披露自己患有胰脏癌。

亲解入住深圳老人院之谜

影片一开始，梁爱说道：“对于我自身既嘢，一条友之嘛，生生死死都系我自己一个人，惊咩呢。”她又表示：“我个仔死咗，佢哋都见唔到我喊，以为我会发癫，我都等佢哋走晒我先喊。你话我好硬朗又得，但系你话我好软弱都得。”访问开始时，杨绍鸿指梁爱在这一年转变好大，问她为什么会由水泉澳邨搬到深圳 (老人院) ？梁爱说：“因为我呢6个月变化好大，以前我一切都系自理既，依家已经不能自理，觉得自己需要揾个地方饭嚟张口，衣嚟张手𠮶啲，所以嚟咗深圳。”她笑言自己是一匹野马，就连她最好的契女也管不了她。梁爱说：“我呢一世都系自己闯荡江湖挨到今时今日，我曾经讲过我死都唔入老人院架喇，咁但系依家都系要入喇。”还大赞深圳的老人院真是好：“仲大过我水泉澳𠮶度，又有露台，呢种生活老咗系一种享受嚟架。”

谈患胰脏癌感受

杨绍鸿追问梁爱为什么会选择入住老人院，梁爱表示：“因为我最近就有咗个病，我成日觉得呢度 (胃附近) 痛系一个胃病，无端端成日都顶住我又食唔到，所以我一路瘦落去，咁顶住我就觉得有啲唔妥。我有个亚视旧同事佢喺深圳港大医院睇咗，我喺香港威记 (威尔斯亲王医院) 睇咗十几年都check唔到我有咩事，于是我就走嚟深圳check，哗，一check原来话我有胰脏癌，住院一个礼拜，有陪护乜都有齐有食有住6000几蚊出院。个报告一出嚟叫我要搞咩咩咩，叫我去check去化疗，我话我唔“疗”，我个人系无“疗”。医生话我有个鸡蛋咁大既胰脏癌，问我化唔化疗，我话咪住，等我冷静下先，要落街食口烟先返嚟答复你，医生话‘阿婆你好嘢㖞，咁冷静’，我话生死有定架嘛，有咩咁紧张啫。我身体又唔好，所以我乜都唔疗。”最后她决定不接受治疗。

患癌致双脚无力

梁爱说自己患病后不可以自理，水泉澳间屋好细，又不可以请个人返家照顾她，她的脚已经无力，行动不便，每走一步也不容易。她说：“有一步一惊心，膊头系冻既，只腿成日发热，好凄惨。”她又要求医生给她出院三个小时到外面看看有什么合适的老人院，住院的阮友又帮她在网上拣了三间让她挑选。她说因为患有胰脏癌，所以在深圳入住老人院的审批很快便获政府通过了，最初她不敢让孙儿知道，但她契女还是告诉了她的孙儿。

对于许绍雄离世大感意外

提到曾与梁爱合作过的三位香港艺人，包括冯淬帆、许绍雄以及甄志强在今年内先后离世，对此梁爱说：“三个都系好人，阿谨 (冯淬帆) 呢佢就戆戆居居又系一生，所以后生既时候个个都系为爱为情。Benz雄系好人一个，佢好照顾人，Benz畀我既震惊系好大好大‘吓唔系嘛，你都走埋呀’𠮶只，咁但系冯淬帆我唔觉得奇怪，因为都一把 (年纪) 啦嘛。咁我觉得生死该来就来该走便走吧，上面要畀通告你咪开工啰，唔畀通告你收返张通告咪拜拜啰，好简单。”她续说：“我觉得一个人你最紧要活得开心，虽然我依家有病，但系我觉得好开心，因为我𠮶个癌症呢，好似只鸡蛋咁大只，我当咗佢系朋友成日同佢倾偈，佢痛𠮶阵我同佢讲‘朋友唔好痛，我死得快你都死得快。我唔死一日你有食有住，有我有你大家做个好朋友，你帮下忙咁我就感激’。”她坦言现在间中也会痛，还会影响到腰痛。

在老人院安享晚年不愿作孙儿负累

杨绍鸿指梁爱搬入老人院之后买了一些家私电器重新布置，只剩电视机和床没有换新，就连床单被舖都换了。梁爱说：“一个人挨咗大半世，咁下半世一把年纪钱带唔走既，我唔系有钱，不过今次多谢政府可以back up我，咁我就可以舒服啲啦，啲钱唔使爱嚟做咩啫。我谂住喺度安享晚年，整到佢似个家吖嘛，个人咪有啲安全感。”问到梁爱为什么拒绝跟她的孙返加拿大，她说：“因为佢33岁，我87岁，相差好大截，佢有佢既朋友，我就好似断六亲咁，喺加拿大无车无嘢，识得我既朋友好多都老咗，无得车我，又无麻雀打，咁返去做咩呢？呢度我可以请人同我行街街，呢度50蚊一个钟，𠮶度100蚊加币一个钟，咁你计吖。同埋我对佢嚟讲都系一个负累，佢又啱啱结婚，搞佢做咩。”她又眼湿湿哽咽说十分感激契女对她的照顾。

曾想过轻生 回顾圈中得失

梁爱又透露在她儿子离世后，她有想过从7楼跳下去：“我一望，7楼唔死得架㖞，如果上面要佢，召佢返去，佢唔使我照顾，佢咪仲安乐。早又死迟又死，佢死得安乐瞓着觉就死，咁你话喇，无得计架呢样。”

问到好在这个圈中有什么得失，她说得好多，失没有：“由喺亚视拍剧50蚊拍到75蚊，之后去港台拍100蚊，有几年喺TVB生日食鱼翅都食到口歪。𠮶阵时环境好，喺TVB拍拍下嘢会改合约加人工，黄金时代，出啲人都大把人情味。点解阿发仔 (周润发)、黄日华𠮶啲咁好，主要系佢哋挨出嚟架嘛，瞓木人巷，个环境系好唔同。我依家都有班旧同事围住我，陪我，好窝心，呢个系得。”杨绍鸿祝她长命百岁，她即指对方跟她作对，她早已看淡生死，死也无所畏惧。