今年香港不乏派对活动，较往年的数目和种类多，感觉上是疫情后最畅旺的一年。年尾将至，若要精选今年具代表性的本地电子音乐派对，笔者私心认为非Social Club Series莫属。Social Club Series自今年3月成立开始，从中环的咖啡店走到山顶的薄饼店，近期更与K11合作在商场举办一连串的派对活动。Social Club Series凭著鲜明的美学，透过海报以及网上短片营造独有的派对氛围，配合具资素的制作及创意打造一系列的活动。本月专栏有幸邀请创办人Issac接受访问，与读者分享他与太太成立Social Club Series的故事。

波盛：Social Club Series最大型嘅企划应该系啱岩10月同K11 MUSEA嘅合作。见到你喺社交平台分享筹备咗几个月，而成个企划以音乐节形式嘅“Odyssey by the sea”作结。不如先由呢个企划开始分享。

Issac：个 Project 我觉得佢得意嘅地方，个选址其实系好特别嘅。一黎个维港景啦，第二其实K11本身就系一个文化嘅Incubation嘅地方，佢应该系有文化相关嘅嘢。佢揾我哋嘅时候我哋就觉得一定系啱㗎喇，呢两个品牌本身就应该系要黐埋一齐嚟做。而佢哋成个Brand Image系好愿意接受啲新嘅嘢，我哋就谂会唔会有机会个Mall闩左之后喺入面Rave呢﹖佢又真系OK㖞。佢哋会觉得既然我揾得你，就信你𠮶样嘢系得，咁而我哋又真系做咗香港第一个喺个商场闩咗之后喺入面嘅Rave。跟住佢亦都想有运动元素，因为知道而家日光派对好Hit啦，咁会唔会可以一个健康啲嘅Lifestyle Incorporate到落去呢﹖

我觉得本身成个Social Club Series品牌都有少少受大环境所影响，点解呢样嘢而家Hit到，就系可能疫情之后大家个生活习惯都改变咗。以前大家成日会去到好夜，但系疫情好多嘢都夜晚闩，大家惯咗早啲返屋企。咁原来有啲活动系唔需要去到好鬼夜，完咗食餐饭返屋企瞓觉，第二日唔使好辛苦。咁我哋系基于呢一样嘢再去发展。

我觉得香港呢一年好似比较少一啲大嘅活动去聚到一班人，如果喺一个咁嘅地方大家都认识，我哋又做到一个氛围大家可以好轻松礼拜六、日同啲Friend一齐饮下酒听下歌，尤其系而家Real Life Experience系更加紧要。以前Digital所有人都系Online，但系人同人𠮶个建立少咗。而家一个Day Time嘅时间，我真系可以同你Real time可能饮杯咖啡又好，杯酒又好，倾到计又可以一齐听下歌，我觉得𠮶个 Moment 系好 Precious。所以成嚿嘢而家做咗出嚟，希望继续做落去，可以带住呢个信念，由我哋香港人做嘅，有香港 DJ，由香港出发，即系可唔可以变咗个香港骄傲呢。

波盛：无论系商场闩咗门后嘅Rave定系日头喺商场平台嘅一个露天音乐节，有啲咩考量同难度呢﹖

Issac：你知上面系Rosewood、ARTUS，有人喺度住，我哋都想做一个负责任嘅Organizer。我哋都会谂点样可以做到呢件事，但系又可以Cater到住客。我哋最后决定送飞畀全部ARTUS嘅长期住客，邀请佢哋落嚟一齐玩，就好似以前你细个𠮶啲屋苑活动咁样，中秋节一齐落去玩。最后其实大家都系默许咗，呢件事其实你唔系个个礼拜搞嘛，得闲有啲咁嘅嘢佢哋都开心，见到有嚿咁嘅嘢整得几靓㖞。

而难位就系其实尖沙咀系一个比较敏感啲嘅地带，有好多唔同地方嘅人都会嚟到呢度。我哋做嘅时候就系所有嘢都要合规合格，要向晒唔同嘅单位汇报我哋做紧啲咩，就会明白到香港其实搞大型活动可能大家都会觉得点解会无啦啦取消，其实可能大家未必明白有好多都真系不可控嘅嘢，如果其中一关卡住咗就真系玩完。喺呢件事上面真系有好多唔同嘅单位愿意无条件咁样帮手，呢度聚咗七百人喺度，有好多人一齐好努力去令到呢七百个人可以Have A Good Time。

另外一个难嘅位就系我同我嘅Partner，即系我太太，其实系未做过呢样嘢，未做过一个咁大型嘅活动。而我谂 Audience Experience 系好紧要，由入到去个商场，到点样上到去，佢点样可以有个最好嘅感受，呢个位系最Challenging。我哋想Demonstrate到畀人哋知，香港原来有个品牌系好认真去做啲好有Quality嘅Production。我相信大家嚟到嘅时候都好开心，我收到好多Feedback就系话：“我呢三个钟完全冇玩过电话”我觉得呢样嘢就系因为佢好Enjoy𠮶个Moment，呢个就系我哋几个月不停系咁谂、不停系咁 Trial and Error嘅一个结果。

波盛：当初因为咩原因而同太太决定搞Social Club Series出嚟﹖

Issac：纯粹最开头就系我哋自己都钟意Party，又见到外国其实好兴呢样嘢，亦都好似我头先咁讲见到有好多人都系个 Lifestyle改变咗，系咪一定要喺Night Club去Party呢﹖可能有另一个Occasion。而我哋见到呢个Gap喇，我哋可唔可以喺呢度创造到多一样嘢去畀人哋Gather同啲朋友一齐玩。其实就系基于咁样，然后又遇到一个我哋好钟意嘅 DJ ，DCR MILDA，咁啱嚟到香港，真系搲佢：“可唔可以过嚟帮我哋试一次﹖我哋都想试下个城市喜唔喜欢呢样嘢。”

最开头做Promo系无人识呢个Brand，亦都唔知发生咩事。𠮶阵时就揾咗好多身边好钟意Party嘅朋友，纯粹谂住当Private Party拍低埋佢。试咗一次之后，都因为Social Media嘅关系令到好多人知道，亦都好多人想Experience一次。咁试完就慢慢开始一个带一个嚟玩。

一开始冇谂过呢旧嘢会变成一个Product，甚至乎有谂过如果啲人唔喜欢嘅，可能做多几次大家都攰就唔做㗎喇，咁就大家继续你有你嘅生活，我有我嘅忙碌。但系其中一个好Drive到我哋继续做个位，就系你好努力去做一样嘢系令到人哋开心。其实我谂我做咗30年人都未试过做样嘢系令到人咁开心，几奇妙嘅。

而叫Social Club Series系基于两大原则，就系唔好懒花巧。懒花巧搞个唔明嘅名，人哋未必记得住，咁我就想拣一个易啲记嘅名。第二个原因就系因为我哋最开头真系因为成班Friend出嚟玩，即系Social多啲。成班人可能一齐拣今晚去个Friend嘅Studio，因为佢都系DJ嚟，今晚我哋系Drum n Bass夜晚，全晚都系 Drum and Bass 㗎喇。所以Social Club Series其实就系一班钟意听同一样嘢嘅人就去𠮶个地方，就系一个Social活动，所以就系一个Social Club。而我哋又觉得其实系可以有好多唔同嘅支线，所以就加咗Series落个名度。

波盛：除咗3月第一场请到你同太太好钟意嘅DJ嚟，仲有无边一次你都觉得好难忘﹖

Issac：我觉得系山顶同Black Sheep合作𠮶次。两间舖头咁啱系连住嘅，𠮶刻就会谂不如做两个台啦，可以变成一个好似迷你嘅Festival咁，有Main Stage同Side Stage。喺𠮶个位就会谂其实表演嘅模式好多变嘅，我哋见到个地方又会谂下咩音乐系啱呢个舖头。Pizza Shop啱Hip Hop呀，冰淇淋店可能啱House Music呀，我哋就会根据我哋感觉到嘅嘢去Curate。

而𠮶一次系真系好奇葩嘅，我哋放250张飞出去，1分钟就卖晒。跟住开多一日，都系1分钟就卖晒。𠮶个位我觉得系有人buy我哋𠮶个创意。而实际啲人嚟到，你以为话去山顶好似好远，但系其实好多人好愿意，特登走到上嚟好Wide Open 嘅成个感觉，唔系喺城市个格局里面，系一个好似远离咗烦嚣嘅一个Party圣地咁，完咗又同成班人一齐返落去。跟住认识咗好多人，佢地会觉得呢个Experience 又好似冇乜啲类似嘅嘢，佢哋觉得几得意。成日都问几时再搞山顶。

波盛：去派对嘅观众都有好多种。例如有人钟意听自己熟悉嘅嘢，又有人钟意听新嘢。你哋有无发现嚟Social Club Series嘅人系边种多啲﹖

Issac：参与Social Club Series嘅人，我谂有一半其实佢都唔知佢嚟听啲咩，我觉得系咁，呢个系好特别嘅位。我都好想又再讲返山顶呢个活动，譬如讲冰淇淋店𠮶边啦，Afro House、Tech House跟住 Open Format。跟住Pizza Shop 𠮶边就有啲Baile Funk，又会有UKG，又会有Trap，Drum n Bass都有。两日嘅Program完全唔同，咁啲人就系带住一个唔知咩嘅心态嚟，其实可能佢就系为咗嚟食Pizza，但系啲嘢又几好听又好High。

Social Club Series其中一样嘢系冇定型、定性咗一个Genre，可能系一个优势亦都可能系一个劣势，但系我就觉得听新音乐呢样野系好紧要。我觉得以前听Pop Music你会难啲知道自己钟意听咩声，但系一听电子音乐你就会慢慢揾到自己钟意听啲咩声，Kick Drum、Bassline嘅Texture。即使我系一个Classically Trained嘅Musician，我听电子音乐先揾到自己钟意听啲咩。

有啲人会系嚟咗我哋Event，发现钟意咗听呢样野，反而我哋下次搞另一个Genre佢又未必嚟，但我哋搞返佢又会嚟，我觉得系一个Journey咁样。我哋未必全部都系High Energy嘅，我哋有个Series叫 SLOWDOWN SOIRÉE， 其实就系做 R&B，畀大家一齐黎 Chill 下同Singalong ，好多唔同嘅气氛、好多唔同嘅嘢可以畀人哋去 Immerse 喺入面。

波盛：呢一年去咗唔同有趣嘅场地搞Rave，你心目中仲有无啲咩场地系想试﹖

Issac：茶餐厅。呢个预告下我哋嚟紧好大机会会同华星冰室做，我觉得系好特别，尤其系茶餐厅系好香港。可能系打Hip Hop，饮住奶茶、食住蛋挞咁样。第二个系理发舖，我好想做嘅。我曾经拍过一个系打黑胶碟嘅DJ，叫做Gia，佢打Salsa嘅。我𠮶阵时嘅拍摄就试过喺一间上海理发舖入面拍个DJ Set。虽然人少少，但系个气氛都应该几唔错。有时我哋一路做会想越做越大，但系有时都会忘记咗如果我哋系一个香港嘅Brand，有冇啲香港嘅元素我哋可以Keep到呢。

波盛：除咗啱啱讲嘅场地想试，有无一啲嘅想法系希望未来可以实现﹖

Issac：我觉得个谂法系，我以往做一个Audience都会好被一个Lineup吸引，唔知点解觉得Local嘢好似点都次等啲。但系而家谂返，亦系我哋当初其中一个开始Social Club Series嘅原因，就系我哋好想所有嘢都系香港，有香港嘅元素。其实香港都有好多好好嘅 DJ，虽然佢哋都系打紧外国歌，但系佢哋嘅技术或者品味，我觉得唔会比人哋次一等。

所以K11𠮶次点解我同埋太太认为就算我哋有一个DJ喺IG系20万人Follow，我哋都要揾一个喺香港我哋认为打得好好嘅DJ去做最后，Content 最靓就系佢。个原因就系既然系一个香港嘅背景，点解唔系一个香港人喺度打紧呢。所以呢个位我谂都系好多人都睇到，佢哋都见到我哋其实Build紧，如果我哋有其中一个香港人系可以红到出去出面，就系一个骄傲。所以Social Club Series系一个平台，有好多人钟意嚟听歌，亦都有好多DJ钟意嚟分享音乐，咁就结合咗。

波盛：你唔单止创立咗Social Club Series，仲自己亲自落场打埋碟。打碟方面你又系点样开始﹖

Issac：我结咗婚之后上年三月就同我太太参与咗第一个Music Festival，听咗电子音乐，咁就越听越多，越听得多电子音乐就揾到自己钟意嘅声。去到上年嘅七月、八月嘅时候，就听咗一个 DJ 叫 Baby J，佢就打巴西音乐，但其实我从来无听过。佢有好多系Pop Remix，𠮶啲就唔系你可以喺 YouTube 或者 Spotify 听到，好多系喺 SoundCloud 听到，所以就展开咗呢个SoundCloud既旅程。

跟住Share呢啲歌畀人哋嘅时候，因为人哋都未喺Mainstream嘅Streaming Platform听过，有好多人话：“你拣𠮶啲Remix几正㖞。”咁就开始打喇。第一次打就系喺Pizza𠮶一次，就自己打Opening，因为打Opening冇乜人，但系唔知点解打打下又成个场爆晒人㖞，跟住啲人又好Hype，所以𠮶阵开始就真系认真啲对待打碟。

我个DJ名叫CA$$I，概念就系有一次食饭我就话山顶Pizza店𠮶次想打碟，咁我啲Friend就话出道要有个名，咁我咪话叫DJ Issac。佢哋话：“好难红㗎㖞，不如Issac调转黎串啦。”跟住就话S变个钱呀，就系咁啰。

波盛：上年人生第一次去电子音乐节系有无一个Point Click中你﹖

Issac：真系有一个咁嘅Point。我都唔记得咗系边个DJ，但系佢打咗Avicii嘅The Night，入面有句歌词就系“He said, "One day, you'll leave this world behind. So live a life you will remember"”以前细个听你就觉得冇乜感觉，都系歌词一句。但系去到都廿几岁喇，又成家立室，𠮶个位就好触动到我。

跟住就发现电子音乐虽然好似好Repetitive，但系佢系有一个好中心嘅Message。我觉得电子音乐好有使命感，我以前听Jazz我都系听Instrumental 嘅，好多时我哋系听 Complexity，咁大队 Jazz Band ，呢度好多嘢发生，𠮶度好多嘢发生，但系无乜Message带到。

去Festival个感觉就好似一个Reset Button。我会话每一次你去一个音乐节如果你好投入其中，其实𠮶段时间你根本唔会玩电话，你就好Enjoy同你嘅朋友喺𠮶个Moment。跟住又Reset㗎喇，跟住你又会好Energetic咁继续去追逐一啲野。Social Club Series都想Create到一个咁样嘅Reset Button畀人，可能佢去完呢一个，或者佢听到有某啲歌，会觉得啱佢𠮶个阶段，我好想做到呢样嘢。我感受过嘅嘢都想俾人哋感受到。

波盛：𠮶次嘅音乐节体验令你进入咗电子音乐嘅世界，咁同你一齐去嘅太太呢﹖

Issac：佢都系同一个时间点。𠮶阵时系大家去完Creamfields返到屋企，都冇乜点讲嘢嘅其实。但系第二日起身就讲返，我同佢讲Avicii呢首歌，佢就同我讲Martin Garrix嘅一首歌。好彩嘅就系我同我太太𠮶个步伐都好一致，感受到嘅嘢好相似。之后开始去多啲Festival，又认识多咗好多好嘅朋友，觉得人嘅温度依然系存在，即系唔系咁冷㗎，多咗好多人情味。

另外其实我一直都知道我太太画画系唔错嘅，但佢不嬲都冇比我睇过嘅。因为我系做呢一行，我都好有要求。结婚嘅时候我发现佢嘅美学感同审美观同我都几近似，我就默许咗佢都系一个有眼光嘅人哈哈。系佢筹划成个婚礼，细节嘅位置佢会雕得好靓，Audience Experience各样嘢，Even张台𠮶张卡仔嘅Design。

到真系做Social Club Series嘅时候，我反而系唔识做Design嘅，我净系识拍嘢同剪片，咁我最头痛就系呢样嘢。跟住佢突然有一日就Send咗张图畀我，跟住我就话：“咁靓嘅﹖” 佢就话觉得咁样整好似都几好，咁啱就真系撞正有AI，AI帮到好多手。只要你英文够好，描述到就得，我就系咁样发现咗佢识Design。到而家佢就唔会畀我掂任何Design嘅嘢，Production或者拍摄就交返畀我。

波盛：头先就讲咗Social Club Series未来嘅想法，同一时间作为CA$$I，喺DJ嘅层面你又有啲咩想做﹖

Issac：其实我好想自己出到歌。有时突然会有啲Melody哼到出嚟，可能系因为𠮶日好Stressful，又或者真系有啲嘢Driven 咗，咁我就揾个Voice Memo录，而家都录咗十几条㗎。系一啲好短嘅Phrase，我都仲未够胆去听返。我自己都好想试下做，而家开始有做少少Remix，少少Mashup。但系真系Produce一首原创嘅嘢，我系好想试下嘅，希望下年可以做到呢样。

我谂如果我做嘅话我会想做Melodic Techno，有时自己谂嘢或者系需要啲私人空间𠮶阵，我就会爆Melodic Techno。同埋 House同 Melodci Techno 都系有一样嘢，系拣 Bass Drum𠮶个Texture。而家听好多唔同嘅歌，终于开始拣到几只自己好钟意嘅 Texture 喇，咁不如试下会唔会系由𠮶度开始慢慢做啦。

波盛：最后一个问题喇。依一年同太太一齐经历咗Social Club Series，有无咩说话想同佢讲﹖

Issac：难得有一个人同步，同步好难嘅。同埋因为佢以前冇话特别钟意听咩音乐嘅，譬如我钟意听Jazz嘅时候佢又会真系同我去Jazz Bar，跟住又会同我喺屋企听Snarky Puppy𠮶啲好大队嘅Jazz Band。其实佢都唔知听乜，佢剩系觉得话好爽、好型、好准㖞啲嘢。

因为佢听以前𠮶啲台湾歌手比较多啲，咁我听广东歌嘅时候佢又会喺屋企陪我剩系听广东歌，即系佢会好配合我𠮶阵时想听或者我钟意听嘅嘢。咁佢钟意做嘅我又会陪佢做，我觉得呢个位系几得意。去到而家呢个位就系咁样，大家有个共同兴趣，而共同兴趣又可能可以变成一个更大嘅Vision，我觉得大家而家都好Treasure Social Club Series呢样嘢。