在上月的专栏中，Social Club Series创办人Issac在回顾K11的音乐节时特别提及本地DJ Parco。Issac形容Parco是他十分欣赏的DJ，因此在安排音乐节的排位上，坚持要让Parco压轴出场，坐拥最美丽的维港夜景。Parco是香港兰桂坊知名夜店Fayy的驻场DJ，亦于各大音乐节亮相，包括近期的荷兰Hard Techno音乐节Verknipt香港站。本月专栏特意邀请Parco作为嘉宾，与我们分享他的音乐历程。

波盛：对于被点名赞赏，你嘅感觉系点﹖

Parco：好似系发紧一个梦咁样，我自己都唔知点样解释呢样嘢好。因为当初入行𠮶阵时，无谂太多其他嘢，到依家都净系想Focus 喺音乐。入行𠮶阵时其实好多人都唔系太睇好我依家打嘅嘢或者我嘅Style，跟住到依家开始啲人一听会话：“咦﹖啲Feel Parco嚟㖞。”我会觉得好开心。

对我自己嚟讲，香港市场走得比较慢，或者香港人对音乐嘅喜好分得好散，我嘅嘢又未必符合到佢哋想要嘅嘢。咁啱真系好彩识到 Isaac 佢哋，咁佢哋𠮶 Group 𠮶啲人又或者佢哋 Crowd 𠮶啲，全部都系啲Young 嘅，有Energy 嘅，有Local 又有ABC 嘅 Crowd。系几 surprise 原来佢哋都钟意听呢啲嘢，会有一个动力俾我继续做。

其实做 DJ做音乐呢一样嘢好容易会迷失，因为艺术嘅嘢好就好，唔好就唔好，各花入各眼或者好主观。几Surprise 系原来我哋香港仲有呢啲有开放嘅心态去接受唔一样嘅音乐嘅听众。

波盛：喺K11𠮶晚你背住维港呢个咁靓嘅夜景压轴出场，你仲记唔记得当时嘅状态系点﹖

Parco：空白咗，我完全谂唔到嘢。我自己有少少经验系打好似 Festival 呢啲，我自己头几首都会排少少，跟住其他𠮶啲都系Freestyle，因为到最后个 Crowd 系点样同你排嘅嘢系未必一样㗎嘛，你真系要𠮶一下 Feel，你俾到𠮶一下嘅感觉人先系最真实。本身特登有 Edit 到一条 Track 系for Social Club做开头，我打完𠮶条Track 之后，我完全个脑系空白咗，但系我又好Enjoy㖞。跟住就“唉！是但啦，呢首啱㗎喇，系㗎喇，去啦去啦。”我就系钟意咁样做啰。咁Even打完之后，我都唔记得咗自己打过啲咩，但系有一个好正嘅Memory，一个好正嘅Experience。尤其系背住个维港，跟住仲有喺K-11呢一个咁正嘅地方。

咁当然到最后我检讨返自己，我每次都会嘅，虽然啲人都畀个Feedback我话：“Parco打得好好呀。”我自己都会谂可以再好啲，下次可以再有啲唔一样嘅嘢。咁身边呢啲听众呢啲Friend俾啲好嘅Comment，我又会Push自己继续去做啰。

波盛：虽然你嘅Style系主要打Melodic House & Techno，但当晚最后一首特别拣咗《香港地》，点解会有呢个谂法嘅﹖

Parco：点解我有呢个Idea呢，系因为Isaac同我讲：“喂，你守尾门㖞。你谂吓Last一首歌可能佢哋仲会有Encore，你谂下有边首歌系你想打啦。”我谂咗好耐。咁打普通嘅英文歌，我觉得OK嘅大家识唱，但又唔系好够特别。咁打其他中文歌，本身我自己又唔系太熟识而家有咩中文歌系Hit，太旧我又惊啲人唔系咁识又或者对佢哋嚟讲旧得滞。跟住我就谂到一首好正，啲嘢又好靓，《香港地》啦。真系Represent到香港呢个地方，同埋佢嘅歌词内容好有意思，就依首啦。

《香港地》依首歌嘅Style真系完全同我平时打嘅嘢唔一样，但系身为香港人，又要喺依个Festival里面守尾门，要代表香港，大家有一个共鸣感，除咗依首歌我真系谂唔到仲有边首歌Represent到我哋香港人。

波盛：你当初系点样入行㗎﹖

Parco：我之前系做Production做剪片𠮶啲，有阵时𠮶啲声都要Edit，我又好钟意整下呢样整下𠮶样咁。再加埋身边围绕住嘅Friend，一系Rapper，一系 DJ，一系 B-Boy，我自己又真系钟意听歌，就谂不如试下呢样嘢啦。跟住就开始去YouTube睇，睇 DJ 系咩嚟、点样做 Mixing。但睇完你都要实践㗎嘛，咁无Budget嘅情况下可以做啲咩﹖就系电话Download DJ𠮶啲App喇。揾啲歌放落部电话，由A𠮶首歌转去B𠮶首歌，就做到一个Mixing 、一个Transition。

玩玩吓身边啲DJ Friend就话：“你咁样电话玩，好容易会玩坏手势。”咁就开始谂不如试下买部平平地两、三千蚊嘅Controller玩吓。纯粹系无聊有时剪片剪到闷，咁就自己播下歌去玩下咁样啰。玩下玩下跟住就研究Upgrade 个 Controller ，就开始用 USB 。𠮶阵都唔识用USB，都系身边啲Friend教先识打碟系点样。

然后成日出嚟玩，识到好多唔同嘅人，就真系一次机缘巧合识到依家Fayy个GM。𠮶阵时喺Zentral楼上，佢就觉得：“不如试下Parco。”试下试下就真系做咗一个Resident，就真系正式入行喇。

个阵时系唔畀人睇好㗎，啲前辈会觉得：“啊！呢个𡃁仔一入嚟无乜经验就做Resident﹖”会有呢啲咁嘅嘢。但系好好彩嘅系，啲前辈系好乐意同你分享佢哋以前嘅经验，其实系好用㗎，因为大佬人哋打碟打咗成二、三十年嘛。

波盛：例如有啲咩佢哋讲过你觉得好受用﹖

Parco：其实有好多㗎。呢家最常见到嘅 Mixer呢，系900NXS2，有一部再大部啲叫做V10。系有少少 Tricky 位，就系对于成个声嘅感觉，又或者出到嚟呈现个效果。V10 同埋 900NXS2 𠮶个 Gain 同埋 Master 系你要控制。好多 DJ 会唔知，一味扭大声就OK。但系其实唔系，如果唔系出到嚟啲声就会好拆。

又或者啲前辈会话到畀我地听，点解听到啲 DJ 𠮶啲Track，𠮶啲声同Balance会好啲。佢哋就会好直接咁同你讲：“因为你个Track可能唔系买返嚟，你系喺YouTube Download返嚟，个Quality一定会低。”变咗有阵时去到啲大嘅Festival，或者有啲Sound System好靓嘅Club，你越差嘅 Track，佢咪将差𠮶啲嘢全部放大晒出嚟。如果你靓嘅Track佢咪会将原本嘅声还原返晒出嚟。

咁呢啲对于我哋新世代嘅DJ，系唔会咁了解呢样嘢㗎嘛。有啲人就会觉得有咩所谓，YouTube Download咪得啰。但去到靓嘅Sound System，你系会完全听得出。咁我哋做 DJ 系分享音乐，我哋系畀一啲最好嘅嘢听众，无论声又好，画面又好，乜嘢都好，都要分享啲最靓嘅嘢畀佢哋。

波盛：你一开始系打咩类型先﹖

Parco：疫情前都仲好Hit EDM，我都系打EDM𠮶啲先。我第一个Rave Party 就系见到Martin Garrix，觉得“哗！好型呀正呀！”我相信好多人都系见到Martin Garrix之后，就开始想学做DJ。 EDM 开始之后就打Hip Hop，啱啱接触𠮶阵时觉得好型好正，但系我后尾发现系好深奥。依家听到一啲 打 Hip Hop ，系纯粹个Beat Match ，但系其实我听啲前辈嘅分享Hip Hop唔系咁简单。因为佢本身有好多歌词有好多意思喺入面，前面𠮶首歌同后面𠮶首歌要 Match 到个意思先OK。

呢一样嘢令到我之后喺呢个生涯上面，即系 Hip Hop点样 Match 下一首歌啲歌词同意思，启发到我打其他音乐类型上面，其实我都需要有一个前后呼应嘅故事。一个DJ就好似Share紧一个故事畀你听，我成日都讲：“ I don't play music. I play emotions.”我将我呢一刻嘅感觉话畀你听，带你哋去一个旅程。变咗我依家打好多House、Techno，我都将Hip Hop呢一样嘢带咗嚟。可能其实不嬲都有呢样野，但系对于我嚟讲系一个启发啰。

波盛：后尾系点样转型打House同Techno﹖

Parco：真系做咗Resident先好 Focus 去接触呢一样野。我之前打𠮶个地方就系全部都要House同Techno，跟住就Keep住系咁揾好多歌，去好多唔同打House嘅地方听啲DJ打啲咩。听到啲嘢我无㖞，就用Shazam，返到屋企就揾一大堆相同类型嘅嘢，就会储子弹喺自己嘅Library度。我到依家都会㗎，有阵时有啲Guest嚟到，听到首歌我无㖞，抄低之后返到去又揾一大堆，我好钟意做呢一样嘢。

D人成日都会觉得做DJ除左打碟其他时间都系无野做，唔系㗎，真系听歌㗎。Even 我求其行过一个商场，我都会好留意佢播紧啲咩歌。有阵时我去做Gym 搭䢂佢无啦啦会播啲好有Taste、好靓嘅House Music，跟住又会谂呢一类型嘅音乐会适合放喺咩嘅地方，几时适合打，我会谂好多呢啲咁嘅嘢。

波盛：你觉得嚟听你打碟嘅人，应该点样欣赏你嘅Set﹖

Parco：其实都系一个故事嘅铺排。好多人可能听一个 DJ， 听一、两首歌觉得唔好跟住就走，但系你起码要听半个钟先。如果你要过黎听我嘅，你起码要听一个钟先。我打House我系会铺排，我唔会想你听你自己想要嘅歌，我会Share啲我想Share嘅歌畀你哋听，而又带动到个Energy。其实我都系一个讲故事嘅人，所以要啲时间。再加埋我本身系一个好慢热嘅人，所以系要啲时间大家慢慢去进入𠮶个状态，我净系可以同你讲我嘅嘢系同其他人唔一样啰。

波盛：你打碟打咗几耐之后意识到自己同其他人嘅唔同﹖

Parco：我好早已经发现，因为我无受过一个正规嘅途径去学 DJ。如果你有受过一个正规嘅途径去学，有几样东西一定会同你讲：“对啱BPM、对啱Key、拣啱歌。”拣啱BPM好重要，拣啱歌都好重要。但系对于我嚟讲，拣啱Key重要但系亦都唔系咁重要。如果你下下都要跟Key嘅话，咁你咪会畀人困死咗，咁好多嘢其实你都打唔到。House有好多种，我点样将Tech House转去Indie Dance，咁可能个 Key 未必啱㗎㖞。𠮶一下就系讲你个 Mood 同埋你Mixing嘅Skills，点样去对返啲拍子同Phrasing 去Mixing。

有一段时间我都会喺到自我怀疑Key系咪真系咁重要， 直至到我睇咗一个丹麦嘅 Producer， 佢嘅 Live Set唔系话有个 CDJ 有个 Turntable 喺度，佢真系有部电脑有啲Keyboard有琴喺度弹出嚟。佢啲嘢好有自己Style，好有丹麦Feel嘅一啲Layer，𠮶啲结他𠮶啲乐器𠮶啲嘢。其实𠮶啲嘢唔啱Key，但系佢出到嚟好好听㖞，咁呢样嘢你无得解释。所以我就会觉得Key好重要，但系未去到100%好重要。都系要睇返当下你𠮶个Moment你想要表达啲咩，再加埋你本身嘅Mixing、Transition嘅Skills去将成个画面、气氛混合埋一齐畀人Feel到。

波盛： 由COVID做Resident开始，到依家呢个阶段你觉得DJ呢个身份对你嚟讲系一件点嘅事﹖

Parco：我其实好Proud of自己系一个DJ，尤其系喺Fayy呢一个地方。因为我以前出嚟Club蒲𠮶阵，第一个去Party嘅Club就系Volar。咁呢度其实就系以前嘅Volar，一开头我谂都无谂过入到呢个地方做嘢。到依家我真系喺呢度做一个驻场嘅 DJ，好开心。唔知可以用啲咩嚟形容，会令到我有更加多嘅动力去做得更加好。

几年前我啱啱入嚟呢度做𠮶阵，都好多嘢唔识都系学习。我可以讲呢个地方同其他Club唔一样嘅，就系佢迫住你进步好快。喺呢度打碟嘅每一个Resident都有佢自己好独特嘅风格，我觉得呢个系好事。尤其系喺兰桂坊呢个圈子，你唔进步嘅话就会畀人淘汰。对于我嚟讲呢样嘢好正好刺激，叫做有啲嘢去继续Push自己变得更加好，要有更加多唔一样嘅嘢，要令到呢度嘅人体验嘅嘢再唔一样。

我由第一日做Resident嘅时候就有个好奇怪嘅谂法，就系Even 呢度无客都好，At least 我要令到呢度嘅Staff Enjoy我嘅音乐。如果连啲Staff都唔Enjoy嘅时候，咁啲客点样去Enjoy﹖我之前真系一路打，由无人打到有人。所以令到啲Staff、啲Security开心，佢哋Enjoy我觉得已经系好满足。

波盛：作为一个DJ你有无啲咩目标﹖例如有啲Stage想去或者达到某一啲成就﹖

Parco：我野心好大㗎！唔系依家先谂㗎，我入行已经谂好咗。我都唔介意讲我做DJ野心好大，唔伤害到人就得啦。香港对于我嚟讲系一个踏脚石，但我永远都系Represent Fayy。而出到去其他地方最想去嘅舞台，咁梗系可能系Ultra。但系Ultra我唔会拣Main Stage而系Resistance。Tomorrowland ok嘅，好多人都会好想去Tomorrowland，咁我都会好想去嘅，但我唔会摆佢第一。

我会偏向ADE、Awakenings，比较偏向House、Techno。我偏向想去啲唔系主流音乐嘅一啲Stage，真系可以Share自己钟意嘅嘢畀人哋听，而人哋又Enjoy到嘅一啲Stage。咁 Ibiza呢啲，梗系好想去啦，我相信系每一个DJ都一定会想去嘅一个舞台。咁Step By Step啦，你一定要做好准备先，你无准备讲咩都系无用都系废话。咁而家就系一路做好自己，到机会嚟到嘅时候，你就已经准备好，咁就无乜嘢可以惊。