阔别香港舞台七年，周柏豪终于兑现了与歌迷的约定，前晚（3月14日）白色情人节，一众粉丝期盼已久的《周柏豪 THE BLOOMING CHAPTER》音乐见面会于全新的启德体艺馆盛大举行。这场被柏豪形容为“由香港出发，返屋企嘅第一站”的演出，全场座无虚席，歌声笑声欢呼声为七年之约揭开完美序幕。柏豪老婆仔女撑场外，好友连诗雅、陈家乐、193（郭嘉骏）、郑融、布志纶、欧镇灏、吴启洋（Phoebus）、冯曦妤 Fiona Fong 等均有到场支持，共同见证呢个“绽放”嘅重要时刻。

柏豪昨晚把体艺馆化身成一个充满玩味的巨型游乐场，施展浑身解数，献唱近三十首歌曲，从经典作品到最新歌曲，首首都触动歌迷无限回忆，由头带到尾歌迷都不停合唱，兼企起身跳舞，场面墟冚。唱歌之外，柏豪仲同歌迷大玩“估歌仔”同“唱K”等游戏，互动气氛温馨又热闹，欢笑声不绝于耳。

全晚其中一个最高潮，是好友郑融惊喜现身！郑融本来只是来看骚支持，低调坐于观众席，素颜兼且冇化妆，但被柏豪一眼认出并邀合唱时，郑融二话不说除低口罩企起身，以最真挚嘅素颜样貌面对观众，更搞笑自爆：“我箍紧牙㗎！”柏豪：“箍牙你都唱赢好多人啦！你绝对系同我一齐成长嘅朋友，同一个经理人公司，由《一事无成》开始，我哋去过好多商场、做过好多event，真系好多回忆....”郑融听到后亦非常感触，回忆起当年青涩岁月：“你记唔记得，我哋两个坐喺TVB录影厂等埋位，然后你攞咗个MP3出嚟，𠮶阵仲系MP3年代……真系好想揽下你！好啦，我哋一齐见证呢个历史时刻啦，唱啦！”随即两人即兴合唱经典合唱歌《一事无成》，引发全场“回忆杀”，真挚嘅友谊加上埋集体回忆好歌，让全全场歌迷不停欢呼，开心到飞起！

昨晚唱到歌曲《同行》时，柏豪几度深呼吸强忍感动眼泪，哽咽地向全

场观众表白：“好多同事估我今晚几时喊，我真系好多谢大家咁支持我。我话咗唔喊，今晚点都要忍住！”呢份对舞台嘅珍视同对歌迷嘅感激，令全场动容。

骚后柏豪亦特别感谢家人无私支持。他透露开骚前两星期，屋企面临一场“小风暴”：“仔女病、老婆病，老婆当机立断赶我出家门，叫我即刻租酒店搬走，免得我染病影响演出。”他坦言当时搬离屋企心情好唔舍得同难过：“作为爸爸，要因为工作丢低家人，真系好唔好受。每日同老婆同仔女视像电话问候。”幸好最终顺利完成演出，冇辜负屋企人嘅牺牲。

讲起一对宝贝仔女，柏豪即时父爱泛滥，透露囡囡对自己嘅爱简直系“一千分”。佢搞笑话：“排练𠮶阵仔女都有嚟睇，玩紧唱K环节冇人举手，我个女竟然举手话佢可以唱，于是我哋就俾佢咪，同我合唱咗几句《一事无成》！”佢又笑指囡囡对佢嘅痴缠程度，搞到老婆有时都觉得过份。

问到囡囡钟意BLACKPINK定系钟意爸爸多啲？柏豪自信满满咁话：“梗系钟意我多啲啦！佢对我嘅爱系一千分㗎！所以我有时会谂，第日大个咗佢唔再咁爱我，我唔知接唔接受到。我依家可以讲定，第日佢男朋友要听住：‘我个女系公主，佢真系要对佢公主咁先得㗎，哈哈！’”公然向未来女婿宣示主权，引得全场大笑。

Encore环节，柏豪唱出新歌《纯粹想哭》时，萤光幕出现实力派演员黄文标嘅身影，原来佢有份参与MV演出。骚后问到柏豪，佢坦承知道标哥最近身体麻麻，初步评估患有柏金逊症。柏豪话：“拍摄时对方非常专业，虽然察觉到佢身体有啲唔舒服，但完全冇影响工作。我非常感谢标哥参予MV演出，知道好多朋友都因为佢嘅演出特别去睇我呢个MV。”

是次虽然名为见面会，但无论系歌曲编排、同乐队大玩Rock嘅狂野，定系自弹自唱嘅深情，都展现出超越一般演唱会嘅水准,整个制作非常认真，柏豪全晚换咗五个造型，当佢以背心造型登场，大骚结实嘅麒麟臂时，即时引来全场女歌迷哗哗大叫，纷纷高呼“除衫！”柏豪即抵死笑言：“哗！台下面突然见到好多个女同学、家长朋友，平日佢哋见我唔系咁㗎，系咪觉得我变咗第二个人？哈哈。我平日系七人车司机，成日车埋同学仔放学，好正经㗎！今日佢哋可能觉得：‘点解个司机哥哥变咗咁古怪？’都系唔好除啦......”

香港站之后，柏豪表示会开始新一轮巡回，问到他何时再举行真正的个人演唱会，他表示自己当然希望可以再返红馆，明年是他入行二十周年，但是否能得到档期，世界会不会有其他变化，并不是他可以预计，他只会每日努力朝著这个目标进发，希望可以明年可于香港跟歌迷一起庆祝廿十周年这个愿望。