香港殿堂级乐队太极乐队昨晚（2日）假香港启德体艺馆，举行《太极乐队40周年巡回演唱会—香港站》，跟乐迷回顾40年来的好音乐。太极五子盛旦华（蛇仔）、邓健明（Joey）、雷有辉（Patrick）、刘贤德（Ernest）和朱翰博（Ricky），以一曲《迷途》为演唱会揭开序幕。Patrick表示：“之前我哋喺访问度都提过，今次演唱会会唱多啲现场少唱啲嘅歌。”演唱了《理想都》及《他》等歌曲后，蛇仔如之前访问中承诺，演唱了他鲜有演绎的《疯人物语》。Joey补充说：“今次演唱会唱嘅歌，现场演唱系少过3次嘅。”之后唱出《消失的爱》和《不羁》。Ernest除独唱了《So Lonely》外，再跟Joey合唱《还有我》，最后连鼓手Ricky，也演绎一曲《我和太极一起走过的日子》。

获儿时偶像许冠杰作歌《我愿长伴您》贺寿

在纪念年前离世的队友Gary（唐奕聪）环节，太极五子除了邀请了钟达茵（Pam）演绎Gary作曲的《痛》外，还演唱了《For U And I》。在演绎《一生不再说别离》时，播出Gary的片段，五子邀请现场过万观众一起亮起电话的灯，现场仿佛变成一片星海，借此送给遥远的队友Gary，场面感人。太极五子演唱了以往演唱会主题曲《干杯》、《曙光》和《一世回味》后，接着演唱首次现场演绎、为今次演唱会创作的新歌《回忆杀》及《When you need a friend》。太极五子又开心透露获儿时偶像歌神许冠杰（Sam），送上礼物贺他们出道40周年，就是亲自创作歌曲《我愿长伴您》，许冠杰还拍片祝福，收到偶像这份大礼，令五子感到非常荣幸又开心。最后以《每一句说话》一曲，为演唱会作结。

首个MV《红色跑车》女主角吴君如惊喜合唱

Encore部份开始，现场突然播出太极乐队首个MV《红色跑车》，之后MV女主角吴君如还惊喜现身说：“太极40周年演唱会，《红色跑车》点会唔预我呀？！”君如表示开心有机会可以澄清，“MV入面𠮶个唔系我嚟，系AI嚟，key我落去，40年前嘅MV㖞，我点会喺度呀，我出道冇几耐㗎咋，我前两年仲同个小鲜肉拍咗套《我谈的那场恋爱》，我啱啱出道之嘛！点会拍到个40年前嘅MV。”见君如扮细个扮得开心，五子再出场时Patrick即称呼君如为小妹妹。

君如笑言已40年冇见过五子，“真系想喊，我可唔可以逐个揽揽同锡锡先。”但君如揽蛇仔时，突然大叫：“佢乜嘢拮到我呀？！”原来是支结他，场面劲搞笑！君如又指其实Ernest曾经是邻居，又赞Joey是结他神，还抵死问Ricky，“鼓手好少听到佢哋讲嘢，讲亲就好爆，今晚有冇新嘢爆。”君如又大赞五子keep得好好，“系咪食咗超级防腐剂？！”

君如算旧帐：食完烟之后演小三同妓女

君如又指要跟Patrick算一笔旧帐，“我拍MV食完烟之后，被安排演嘅都系啲小三同妓女，我𠮶时得19岁咋，你点赔返畀我？！”之后君如又投诉Patrick：“佢好鬼衰，我一去到现场就见到Patrick对眼望住我，佢应该系谂‘做咩电视台派条咁嘅女畀我’，我知你谂紧乜㗎，你谂最好有邱淑贞、吴家丽、朱茵、刘嘉玲、或者系李……，你讲得李丽珍啦！”Patrick谓要澄清，“其实我品味比较高，我好想揾返‘程大嫂’㗎！”君如反驳：“𠮶时都未有‘程大嫂’，你唔好乱咁嚟啦，但畀你有得拣，你系咪都系会拣返我？”Patrick肯定点头说：“梗系，又有‘程大嫂’又有‘洪兴十三妹’乜都齐！”君如再说：“我想讲𠮶时我未够红，你哋又未够红，所以系冇得拣，但人生好多嘢系冇得拣，但喺冇得拣嘅情况之下都成为经典，就系呢首《红色跑车》。”

君如跟五子合唱《红色跑车》时，跟Patrick大玩吹泡泡，两个变身大细路，场面搞笑。唱完歌五子要求集邮，跟君如及观众影大合照。君如临离场前，再发挥搞笑本色问五子，“好想问点解你哋几个后生仔打band会叫做太极？”蛇仔以队长身份解释当时谂过好多名，但最终选了太极，“太极嘅意义系天时地利人和，人和好紧要嘛！”君如就回应：“但系我好想同大家讲，你哋呢个年纪，就最啱叫太极啦！哈哈！希望60周年时可以再call我，我哋一齐努力呀！”

全场大合唱经典歌曲《Crystal》

太极五子演唱40年前参加歌唱比赛的《暴风红唇》，再唱出经典歌曲《Crystal》及《缘》。最后演唱歌曲《留住我吧》时，Patrick嫌台下观众太乖，要求大家企起身，“唔好理咁多出嚟玩，咁先似band show。”全场大合唱时气氛高涨，Patrick感动说：“多谢大家嘅生日礼物。”之后五子再跟全场观众大合照后便离开，但观众不肯离场，最终要二度Encore，先演唱《顶天立地》，最后五子要求观众再大合唱《留住我吧》送给他们，Patrick说：“你哋唱得好好，可唔可以唱多次，好想享受你哋唱，代替生日歌。”全场齐声高唱，为演唱会划上完美句号。