邓丽欣（Stephy）今年第一首派台歌《仍留在这里》MV昨晚上架，故事讲一对闺蜜由六岁相识到庆祝六十岁生日的友爱故事，所以在MV中会出现童年和老年的Stephy，从而带出“珍惜”的人生课题。Stephy自爆被歌词感动流涕，录音时被监制引导眼泪决堤。而她特别邀请来自舞台剧界的胡希文（YoYo）饰演MV闺蜜，因为与她现实中老best极相似。而YoYo自爆中学时为了追星，与作为Stephy忠粉的闺蜜大吵一顿，非常搞笑。

Stephy本年度第一首派台歌

新歌《仍留在这里》是Stephy本年度第一首派台歌，她说：“作曲黄千庭系第一次合作，填词就系合作无间嘅Oscar，编曲与监制都系合作无间嘅苏道哲。点解有呢首歌出现？经历去年推出三首作品，都系讲人生道理，所以呢首歌想讲啲情感上嘅嘢。籍住呢首歌提醒自己和身边人‘珍惜’，同埋感谢我身边嘅人，支持和陪伴我嘅朋友、家人、歌迷、同事，一直帮助我嘅人。”

Stephy自爆被歌词感动到爆喊

Stephy续说：“呢首歌讲‘珍惜’，人越大，经历好多人嘅离开或失去物件，或者记忆嘅流逝，往往只会记住无咗嘅嘢，但呢首歌就系提醒大家珍惜现在拥有嘅人、事、物。填词人Oscar，亦系今次MV导演，当我睇到份歌词就感动流涕。歌词唔煽情，淡淡地，但令我谂返成长嘅故事、感受。”感性的Stephy睇到歌词即喊，录音时更眼泪决堤。她笑说：“监制好衰，讲啲说话引导我，佢唔会叫我首歌点样唱或者个音点样去，而系好似一个导演，引导我去谂一啲画面，结果我一唱就喊，唱唔到落去！”

AI科技炮制几可乱真“合照”

在MV里，Stephy和YoYo很多生活化的场面，坐沙滩饮啤酒、打排球、做瑜伽等，还有一齐执屋。导演Oscar还利用AI科技，创造了多张Stephy与YoYo的“合照”，效果几许乱真。YoYo笑说：“女仔执屋明明一个钟搞掂，执咗五个钟，因为摷到好多回忆。”Stephy认同：“好真实，摷到咩都攞出嚟玩吓，可能一个星期都执唔完。”她透露特别指定YoYo饰演MV中闺蜜，因为她与Stephy现实中一位好朋友极相似。“我有一班好朋友嘅其中一位同YoYo相似，我哋由中一开始相识，依家仍然好好朋友，无所不谈嘅闺蜜，似YoYo𠮶位朋友已移居英国。”她感谢YoYo饰演闺蜜，让她翻起很多美好回忆。

YoYo自爆为追星同老友吵大镬

YoYo自爆曾为Stephy与闺蜜吵架，她说：“我闺蜜超钟意Stephy，而当时我钟意另一位男歌手，我哋会为咗你哋嘅歌上榜排位、攞奖而争拗，仲大闹咗一场。依家我哋仲系好好朋友，有时会攞返出嚟讲，好搞笑。”