上期专栏带领读者认识了本地著名音乐人DJ Galaxy的DJ历程，回顾他如何捉住每一个机会，从差点被永不录用的DJ新丁，走到成为香港DJ大赛冠军的人马。DJ Galaxy音乐生涯的另一阶段，始于认识农夫后。本期专栏他将分享成为音乐制作人之路，抱著“试下啰”的精神，开拓属于自己的音乐世界。

波盛：你系点样认识到农夫﹖

DJ Galaxy：应该系2000年头喺个DJ比赛识到农夫。当时我同 Tommy 做评判，见到农夫𠮶两个友仔几风趣㖞。佢哋𠮶种Rap系好Drama，好似做紧戏咁几过瘾。之后神推鬼㧬就有个Agent揾我同农夫DJ，𠮶阵时我仲未做音乐，但我有买𠮶啲Sampler一部琴咁嘅样，谂住好似Tommy咁砌下Beat、捽下碟，𠮶阵Tommy已经喺LMF爆咗出嚟。

当时我就谂：“冇理由净系做DJ捽下碟就算。”我就开始认真做音乐，其实我觉得好难，仲要𠮶个年代全部Hardware，但我又系𠮶种“试下啰”嘅心态。我觉得𠮶阵做DJ可以做到一啲Remix版本系自己打嘅，我觉得会好开心，因为𠮶个年代已经开始转型，90年代尾已经开始有啲 DJ利用软件去做一啲Remix。

我记得后嚟我喺ICQ认识到一个朋友。人哋用ICQ沟女，我唔系嘅，我想揾一啲识音乐嘅人，睇下可唔可以教到或者帮到我。咁啱就识到个Friend佢识弹琴，佢女仔嚟嘅但最初我唔知，系后尾佢黎我屋企弹琴我先知，系帮我最多嘅人，佢主要帮我弹Chord。跟住第二个帮我最多就系咖啡因公园，因为我都好钟意听其他嘅声，所以我想佢帮我手弹结他。

其实𠮶阵我唔系好识，做咗好多Demo然后Tommy话：“唔得呀。”佢净系叫我扔落垃圾桶，但系我又冇嘢㖞，咁我觉得可能真系唔好呢，真系唔好咪唔要。我又系𠮶啲死缠烂打，又系咁死做。唔知点解有一日突然开咗窍，Tommy就要咗我𠮶只歌，𠮶只就系《十七年华》。

波盛：你记唔记得𠮶种类似开窍嘅感觉系点﹖

DJ Galaxy：《十七年华》其实我有一个蓝本，我好想做Eminem𠮶种Dark。我就问我弹琴个Friend：“你可唔可以弹到呢个Chord?”佢就弹咗啲Chord，我就做咗个Beat底。之后我喺度谂点样做个Melody 落去，即系首歌𠮶个“灯灯灯灯”。当我朋友弹咗几粒音出嚟，我就睇佢啲Melody Key，自己突然间觉得开咗窍，发现原来佢都系围绕住𠮶啲Chord嚟弹个Key，我当时系呢个谂法，咁我就开始利用呢一种模式去做。

《十七年华》之后Plug出嚟成绩好嘅就系《456Wing》。《456Wing》最初我无乜概念，因为陆永话想写一只歌笑自己去鼓励人。跟住我喺度谂，我有一个好钟意嘅对象就系Kayne West，佢有只叫做 《Through The Wire》，Sample咗Chaka Khan嘅《Through the Fire》。既然美国可以用美国Classic Sample做呢件事，点解我唔可以试下用广东歌去做呢件事呢﹖有咩歌可以鼓励人又系Classic呢﹖我就谂到陈百强。

我𠮶时都几钟意陈百强，觉得《喝采》系陆永想要𠮶样嘢，佢都系鼓励人唔好绝望。我就Sample左佢头几个Bar，改过啲Key，之后叫我朋友帮我执返啲Chord，我再改动过啲Bassline同砌咗个鼓。我系好想要有Kayne West𠮶种感觉，要啲人一听到有共鸣。除咗个 Rap，音乐底其实系 Match 到成件事，咁先产生到共鸣，之后就成形变咗《456Wing》。

另一首弹起真系令到佢哋转运嘅就系《风生水起》，𠮶阵做《风生水起》真系无谂过可以改变命运。我系谂住做一啲气氛嘢，到中间有少少跌咗落去嘅Feel，即系麦玲玲𠮶段系同之前𠮶段好唔同。我又谂啲Big Band嘅Brass几好㖞，揾咗啲Sample系咁Chop，Chop咗好多个Demo出嚟，听咗好耐然后剪咗一个好 Rough 嘅，之后做咗个鼓，再叫我个Friend帮我乱弹个Bassline，我自己再执返啲排位。

因为我朋友未必识Hip Hop嘅Groove，然后我再弹咗一大咋嘢，喺𠮶度抽抽斩斩。𠮶时揾嘅声仲用紧啲Hardware Module，要揾个比较Groovy嘅Bassline衬返落去，然后啲鼓改咗几次。农夫两个听到个Demo就OK咗攞咗去试，其实应该有几个Demo，我都唔记得整咗几多个。

波盛：几首歌嘅成功有无令你哋更加掌握到做歌嘅方向﹖

DJ Galaxy：我成日觉得Pop嘢系无得计算，你突然间爆出嚟就系𠮶一下。因为我哋都唔知道人哋兴啲乜，只系我觉得过瘾、好玩，就摆啲元素落去，而农夫佢哋又OK写到嘢。因为佢哋好多谂法，比到我好多唔同嘅灵感去做，喺佢哋身上又学到一啲嘢，我成日觉得学嘢系无分高低。

譬如佢哋有啲Idea畀咗我，我就会再去谂。𠮶阵做咗好多咩《学海无涯》、《粒粒皆辛苦》、《日出而作》。譬如《日出而作》个Bossa Nova系全Sampling，用咗好多Sample砌成一只歌，冇人知㗎其实，我砌咗好耐。我又无谂过佢哋会用，只不过我𠮶阵觉得自己灵感到，好想砌好多我想发生嘅嘢，就成为咗《日出而作》。

波盛：做农夫之后有无为你带嚟更多嘅机会﹖

DJ Galaxy：我记得系《风山水起》𠮶只碟之后，有第一个外判Remix做，就系因为佢哋只碟。赵增熹听完佢哋只碟就揾咗秘书Contact 我，佢问我有冇兴趣做刘德华演唱会嘅三只跳舞歌，之后东亚华星演唱会又有用返，有《独自去偷欢》、《倒转地球》、《开心的马骝》。

其实我好惊呀我想讲，因为我未试过。同农夫做我做得多，突然间有实战㖞，但系我又好想做。所以佢个秘书问我得唔得，我梗系得啦！我觉得我需要试下，佢畀咗啲Vocal我，我好快两日就畀咗一个好Demo嘅Demo。跟住佢问我有冇概念，因为想听个概念先落实。

我又够胆死两日整咗个Demo，跟住佢嚟咗我屋企听我嘅Demo，佢真系上嚟听。我仲觉得：“死啦，我真系好Demo，得唔得㗎﹖得个Beat同个Groove。”佢听完话OK继续啦，𠮶下佢令我突然间多返少少信心，我就Call左我Friend第二日过嚟帮手执返啲Chord。之后我用咗一个礼拜唔够嘅时间砌咗成个Medley 出嚟畀佢听，佢同我讲话介唔介意刘华会改嘢，因为佢都比较严谨，可能有机会改几次。我答佢：“无问题呀，改就改啦。”因为每个人都有佢嘅要求。

喺呢一行里面，其实你无得话我系艺术家，出嚟嘅嘢系咁就系咁。商业社会做音乐一定要大家磨合，仲要系人哋畀机会我。之后佢同刘华开完会，佢话其实冇乜嘢改，刘华听完个Demo已经直情揾Dancer去编舞。𠮶下我都好开心，会有人Buy我个谂法㖞，赵增熹畀依个机会我，令我可以帮到刘华整Remix。

波盛：𠮶段时间系咪陆续多咗好多同主流音乐圈嘅合作机会﹖

DJ Galaxy：都系。有做过张继聪，跟住以前Hotcha嘅Winkie，都系整编曲𠮶啲。之后有郑秀文，系Tommy 接返嚟，佢问我做唔做，我话：“郑秀文我梗系做！”我唔系因为佢个名，而系因为我好细个喺佢出道嘅时候我已经钟意佢。一个佢一个容祖儿，我系Buy一啲有Style同埋唱歌好听嘅，如果做到佢两个其中一个我都OK㗎喇。

跟住我就同咖啡仔一齐写，𠮶阵我已经有好多自己嘅谂法，Tommy就喺中间协调同Produce，睇下有咩唔好再改。其实我哋都做咗几只款，有一个系Dubstep嘅Style，不过我预咗佢未必要，因为太Dark，所以改咗少少，依只就系《起哄》。另外陈柏宇同农夫有一只叫《放过自己》，呢个就比较Hip Hop啲，𠮶阵叫咖啡仔完全用吉他主导。佢其实都系我合作无间嘅伙伴，最主要佢识唱歌，所以好多时Demo我都叫佢帮我唱。

波盛：有段时间你都有同MastaMic合作，你哋嘅合作关系系点样开始﹖

DJ Galaxy：除咗同农夫做音乐，𠮶阵我都想喺 YouTube 度揾一啲新嘅 Rapper，我就喺YouTube度打“Freestyle Rap”，跟住出咗有个叫MastaMic嘅人。咁我睇下佢咩料啦，睇到佢可以Freestyle，但唔知真定假，就用MSN Add佢然后约佢出嚟见个面。

第一次同佢见面好似系北角花园餐厅，佢同我讲佢钟意Hip Hop，跟住佢攞咗一本簿出嚟，我好记得，写晒所有中文近似嘅Rhyme。佢话我知佢练快嘴系点样练法，我觉得佢真系好有Heart。我仲记得有叫佢试下用Freestyle嚟话下我，我唔知佢真定假，因为佢啲Freestyle好顺。佢系求奇攞件物件已经Rap到𠮶啲嚟，佢同农夫比又系另一种Style，佢啲Rap系子弹嚟。

我就谂：“其实喺香港系咪应该畀人认识到佢呢一种Rap呢﹖”所以我就推荐咗畀Tommy 试下入 CMD 。咁后期佢就自己做返，其实佢都劲。佢叻𠮶样系可以Manage到自己应该要做啲乜嘢。我都有帮佢整咗好几首歌，有只叫《Hate Me》。佢系我其中一个几钟意嘅Rapper，佢真系Hip Hop字典嚟。

波盛：一路听你嘅故事，无论做DJ定做音乐，DJ Tommy似乎都系一个非常重要嘅人。你会点样形容同佢嘅关系﹖

DJ Galaxy：𠮶阵好多机会都系Tommy接咗返嚟然后比我做，因为佢已经系农夫经理人，冇乜时间。所以我同Tommy系亦师亦友，唔可以话系Friend咁简单。我其实都有少少当佢系一个偶像，又当佢系我大佬，因为佢大我少少，我系会Respect佢啲嘢。

至于有冇拗撬其实好少，所有嘢都系畀佢行先，我觉得真系唔得我先会讲，识佢咁多年应该冇嘈过。可能有时会嬲，但都唔系关于做嘢，可能细个𠮶阵多啲。其实我觉得系一定要有一个软一个硬，好明显我系软天师佢就系硬天师。我觉得佢影响咗我好多嘢，我细个做人冇乜方向，系Tommy令我明白一定要不断增值自己。我会不断吸收新嘅嘢，即系好似AI做音乐咁。

当然呢啲好个人，如果我自己唔想嘅，佢都影响唔到我。同埋每一样嘢要觉得有希望先，如果你觉得冇希望嘅，其实唔使做。由我开头做嘅音乐佢会畀好多意见，后嚟佢越畀越少，我就知道原来我已经开始成熟，佢会放手畀我去谂晒啲Idea。我其实真系好钟意呢样嘢，如果唔系我唔会Last到而家仲同佢一齐做呢啲嘢。

我成日都同啲学生讲，如果你唔爱呢件事，你系唔可能由兴趣变到专业。我觉得专业系由兴趣开始，玩艺术呢一Part如果你冇兴趣，你点样去提升自己﹖因为中间实会遇到好多困难。

*除了DJ及音乐制作，DJ Galaxy多年来亦致力于推广DJ文化，尤其是捽碟文化。他将于下月专栏分享作为DJ导师的感受和心得。