关心妍日前“衣锦还乡”，在家乡佛山南海举行《听2026 演唱会》，吸引近5千乐迷买飞支持，全场爆满，好友张栢芝亦送上花篮恭贺，而女儿杨荣心后台表现雀跃，除带领祈祷外，更模仿妈妈“化妆set头”，甚有星二代味道！演唱会开始时，关心妍一口气唱出多首金曲，更用南海话“自家人”与“乡里”打招呼！重返“主场”开个唱，Jade一共准备5套服饰， 除大唱金曲外，场外亦有慈善摊位为弱势社群募捐，非常有善心：“其实我都成日返嚟（佛山），真系好感谢家乡庇佑，可以每年都喺度开演唱会。真系仲密过香港开骚。其实每次嚟到都有带心心睇吓，但每次都来去匆匆， 做完 show 第二日又要走，加上佢要返学，所以佢都未好有‘家乡’嘅Concept。 头先佢都系一路陪我、一路温 science同数学。其实我平时负责系中文同数学，老公就睇英文同数学， 所以每晚煮饭就会睇晒功课，知道佢陪登台唔影响学业。”Jade表示当地龙舟节最热闹，希望未来有机会带女儿感受一下。

关心妍表示今次巡回个唱的主题由2025年开始，一直希望将个唱带回香港做终点站：“其实上次红馆20周年开始，已经差不多五年时间，亦就快出道25周年，忽然间嚟到25周年，一直都希望最后站系返香港，我哋都睇下红馆个期批唔批， 希望可以返去红馆， 有机会可以喺红馆做我25周年香港站。”

呢晚演唱由女儿杨荣心做“嘉宾”，不过今次拒绝表演侧手翻，改为打鼓与妈妈合奏《负担不起》，令观众非常有新鲜感：“因为我好想俾歌迷见吓心心， 唔经唔觉咁大个女，我问佢红馆试过打翻筋斗、合唱、清唱，我觉得佢又长大咗，咁啱佢开始学打鼓，我叫佢练下先， 练到差唔多就帮我打， 佢真系苦练半年！头先台上我都唔敢望佢，忍住唔好打搅佢，佢好淡定但我就紧张到背脊出汗，依家系佢表演完我松一口气！”Jade笑指未知女儿还有甚么“秘技”，估计跳舞成下一站的表演项目，而囡囡表演后都到台边为妈妈拍手打气，更不时和唱非常投入。

心心表示现学习单簧管，盼有机会舞台上展示“音乐天赋”：“喺屋企妈咪音乐最叻，跟住就系我，爹哋系最渣！有时我喺屋企都会打鼓、妈咪负责唱歌，爹哋会做和音，不过系唱唔啱嘅和音。”完骚后大会安排“地道”大排档庆功，Jade毫不介意贴地满场飞敬酒，她笑言女儿未曾尝地道风味，今次让爱女品尝地道美食。