黄德斌、叶童黑色话剧《唔讲得》载誉归来 9月文化中心“互唱”
由叶童和黄德斌领衔主演，改编自上海话剧艺术中心原创舞台剧《不可说》的广东话版黑色话剧：《唔讲得》将于9月4 - 7日在香港文化中心大剧院重演，4 - 6日为夜场晚上7时45 分场次，6日特别加开下午2时30分场次，7日为日场下午2时30分场次，票价分别为$680、$480、$280 和$180 四种。观众反应热烈，尚余少量门票于进念购票平台及城市售票网公开发售。
日前《唔讲得》剧中四位演员包括叶童、黄德斌、杨永德和翁炜桐进行新一轮排练，叶童对于这个剧在文化中心重演表示：“当然好高兴，在一个咁短嘅时间《唔讲得》再重演，我谂观众嘅支持系最大嘅原因，所以系相当之开心。”德斌说：“多谢观众嘅支持，今次我哋有啲新嘅环节，我同叶童会互唱，佢唱下我我唱下佢，同埋今次会有两位演员做我哋个仔，一个负责音乐部份，一个就负责台词部份。其实每一次喺唔同嘅地方，观众现场俾到嘅反应对我嚟讲都系唔同嘅感觉，变咗我希望能够自己喺每一场戏，都可以俾到自己同观众新鲜感，自己投入观众都投入。”叶童接著说：“今次我哋会喺演出中加入一啲歌曲元素，我自己都颇钟意唱歌，唔知系咪因为导演都听见我话钟意唱歌，所以特登加呢个环节比我呢？我自己演员生涯其中一个目标，都系希望有机会去演一个音乐剧。《唔讲得》呢个戏我哋去咗唔同地方演出，每次我都有新嘅感受，呢个戏讲两性之间嘅关系，两性之间嘅关系系好微妙，每一次每一埸戏我都有唔同嘅感觉唔同嘅体会，再加上我嘅对手俾到我每一次都有新鲜感，所以非常期待今次再次喺香港同大家见面！而Gordon（李俊乐）同埋阿拼（翁炜桐）呢两位咁出色嘅年轻演员都会一齐出现系我哋个戏度。”
进念•二十面体（实验艺术团体）联合艺术总监胡恩威表示：“《唔讲得》于24年做了一次，25年又再做，一嚟系徇众要求，二嚟就系因为呢个戏最好场场都睇，因为场场戏都有唔同嘅变化，同埋好似睇紧音乐会，佢哋几个演员好似乐手咁，用佢哋嘅台词变成音乐，即系好似爵士乐，演员即兴咁去Jazz，但大家都系用广东话呢个好美丽嘅声音，去将成个演出呈现出嚟，其实系睇咗果啲应该再睇，未睇果啲更加一定要睇。”监制陈善之说：“我梗系好开心啦，多谢观众嘅支持，更加证明香港嘅观众对文化艺术有一个诚意同追求，其实你话咁快重做，都唔算快㗎啦，我系想快啲，不过演员都好忙冇期，所以要延迟到今年9月，系广州同马来西亚我哋都好开心，冇谂过一个咁Local咁港式嘅剧喺呢两个唔同嘅地方都可以得到咁大嘅回响，佢哋嘅反应系好神速同直接，呢个亦都系舞台剧令到大家最开心可以即刻感受到观众嘅情绪，同埋今次重做有好多好得意嘅事，第一叶童Ceci同德斌会唱歌，我哋加嘅歌都系跟番个剧情，跟番当时演员嘅心情去加，唔系夹硬为唱歌而唱歌，所以观众睇嘅时候会好明同埋即刻Pick up到𠮶个情绪；第二系呢几次排练后，每次睇都有唔同，每次演员都有啲唔同嘅嘢话比你听佢想去试，呢个真系好得意，正如导演话斋你哋场场嚟睇，场场都同啲演员一齐玩，佢有佢喺度做嘅时候，你个心跟住佢哋一齐玩，你都会得到好多唔同嘅感受，我同埋觉得你就算当佢系一个好普通嘅Drama，好戏剧咁去睇，佢都系讲咗好多人同人之间嘅关系，讲咗好多你真系会会心微笑嘅嘢，即系“问题本身唔系问题，咁咩先系问题”，“我成日都有讲，你成日都唔听”，呢啲事系成日都会发生喺生活上面，好似“你唧牙膏唔好咁唧”，但原来系由咁简单嘅一啲生活细节制造咗好多有趣同值得思考嘅事，其实系一个宝藏，你一路挖就会越挖越多，观众应该多啲嚟睇，睇多几次。我觉得个戏系好啱大家睇，例如大湾区嘅朋友，甚至乎一路都有人问紧巡演，例如苏州、杭州、成都都有问，我哋都要夹演员档期，同埋场地各方面，希望明年有机会喺内地行一个圈。”
胡恩威续说：“其实我一直睇排练都想加唱歌，但当啲演员开始熟台词，我就好自然地谂到一啲歌比佢哋唱，尤其是𠮶场戏佢哋一做嘅时候，我就谂起梅姐同张学友𠮶首《相爱很难》林夕歌词同啲台词好夹，另一首系特登俾阿Ceci唱《爱的教育》系梅姐嘅歌，不过就比较少啲人认识，Wyman填嘅词填得好好，音乐又做得好好，好有特色，我觉得Ceci唱效果会好好，所以就将呢两只歌加落去，再加多啲都得嘅，但我哋睇下个戏点样发展落去。其实《唔讲得》呢部剧好得意，好似有机体，不停可以演变，即系佢唔系固定一定系咁，我一路睇嘅时候一路喺度谂加好多嘢，另外《唔讲得》呢个剧好得意，你喜欢睇短视频嘅可以嚟睇，你喜欢传统话剧嘅又可以嚟睇，你钟意想揾啲嘢谂下又有啲嘢睇，你真系想笑下开心下又嚟睇得，唔止老少咸宜，你系任何所谓光谱里面，你睇呢个戏你都可以睇到一啲嘢，咁当然钟意唔钟意系另一件事啦，但大部份都系钟意，好难话睇唔明，好难话唔好睇，但佢又好有实验性，我觉得呢样嘢几得意，因为我哋喺形式上系实验性，我哋喺表演上同埋视觉效果都有好多呢啲元素，我觉得系好特别嘅一样嘢。10月上海国际艺术节邀请咗我哋去演出，我哋会喺一个好特别嘅剧场，上海音乐学院个歌剧院，专系做歌剧嘅，因为做歌剧系唔戴咪，所以做话剧都好啱，同观众嘅距离都好亲密，10月会喺上海同上海观众见面，之后我哋都希望可以继续发展。”