吴家乐戥甄采浠唔抵 邓兆尊寸张佳添明显已得米：女仔献身有所求
《中年好声音4》评审张佳添，早前被《01娱乐》独家影到他与《爱．回家之开心速递》的“高小姐”甄采浠（甄咏珊）行街蜜会，二人搭膊又揽腰，更一杯咖啡两份饮，与热恋中的情侣无异。不过日前张佳添受访时竟否认与女方拍拖，明言很享受单身的感觉，称：“我单身八年，但系永不孤单。”
张佳添更叫大家无需要大惊小怪，指：“如果你见到我搭膊头𠮶啲，都系叫做‘膊头之交’。我哋真系唔系男女朋友，真系唔好误会。基本上我都系谂住一世单身，虽然佢同我，我哋都系好似一只冇脚嘅雀仔咁，喺天上飞下，冇着地嘅打算，但系对方系一个好优质嘅女士，佢有佢嘅市场，大家唔好为咗一两张相以为佢唔接受其他人追求，佢完全可以继续接受其他人追求㗎。（有冇恋爱成份喺入面？）我都话我同自己谈恋爱。”
报道出街后，很多人认为张佳添“唔认数”，替甄采浠不值，但甄采浠回复《01娱乐》时就回应：“佢想保护我，当然佢都系好优质嘅人，教识我好多嘢，我学识咗点样好好同自己谈恋爱，希望大家可以俾啲空间我哋。其实大家咩关系，对我哋嚟讲一啲都唔重要，做人快乐系最重要。”听起来二人似乎已夹定口供。
不过日前播出的网台节目《娱乐好好玩》中，主持吴家乐就跟广大网民一样，戥甄采浠唔抵，他问：“如果唔睇佢嘅回应，净系睇呢张相，你会觉得佢哋系乜嘢关系先？”他与另一主持邓兆尊都认为相中的亲密程度明显已“得米”，兆尊说：“通常唔得𠮶啲个女仔唔会揽你。”吴家乐认为一定是男女朋友关系，才会这样揽腰搭膊。
张佳添自言是冇脚雀仔，会继续飞，不会有长久关系，另一主持谢逊就说：“好多网民邓女仔唔抵，觉得佢个样冧晒、沉晒船，但系你突然澄清我哋唔系男女朋友，咁你当我系乜嘢先？”邓兆尊就分享自己见解：“女仔唔会有咁蠢嘅事情，佢献身畀你或者有啲咁嘅关系嘅时候，佢一定系有所求嘅。可能唔系好方便，大家互相取长补短（各取所需），明唔明？呢样嘢好难讲，我哋唔知道，亦都唔好估。（谢逊：你好似好有经验。）我不嬲对呢啲嘢有经验，所以啲送埋嚟嘅嘢我唔食嘅，好危险㗎。”
吴家乐于是追问，若大家是各取所需，为何觉得甄采浠冇蚀底？他说：“我哋咁样摆到明系拍拖，你同人哋讲我哋系膊头之交？（谢逊：我点同我阿妈交代呀？）”邓兆尊回应：“可能添sir不嬲都系咁，‘学唔学唱歌呀？嚟！做住我膊头之交先，做咗膊头之交就可以学唱歌，会愈嚟愈叻㗎喇。”
由于早前张佳添被指与乐易玲在生日会上举止亲密，曾传他力追乐小姐，吴家乐问：“未有甄咏珊出现之前，大家都讲紧会唔会同乐小姐拍拖，因为生日会比较亲密，大家话同台啫，但会唔会出咗呢单新闻之后要同某啲人交代？”兆尊则谓：“人哋做紧《好声音》主持，睇吓会唔会突然间消失咗咪知啰。”
吴家乐期待睇到甄采浠再回应，不过兆尊就指始终是私人事，不回应也没问题，但家乐继续为甄采浠抱不平：“做女仔唔可以蚀底！要锡住，要尊重，你觉得合理化嘅出嚟讲，觉得唔合理嘅更加要出嚟讲！唔系我哋边有嘢讲？”