农夫麦玲玲9.27广州巡演开售两分钟火速售罄　考虑加场：倾紧

“农夫”FAMA与麦玲玲师傅最近宣布“三师徒”廿年后合体，将于9月27日于广州启动“农夫、麦玲玲 三面玲农、粤听粤开心”巡回，早前三人现身广州番禺一个大型商场举行巡演发布会，更逼爆商场场面震撼。今日（4日）“农夫&麦玲玲三面玲农歌友会─广州站”于内地大麦网开售仅两分钟即全数售罄！

对于门票火速售罄，“农夫”即留言：“原来@麦玲玲 真系咁吸引!!!多谢各界朋友支持，原先担心大家唔明唔知我地三个会搞乜，唔会嚟睇，原来就算唔明，你地都咁撑我地！就算唔知，啲票都卖晒！恭喜晒抢到票嘅朋友，师傅话有嘢当晚益大家!!!!”

而玲玲师傅回复《香港01》直言超乎想像：“我哋都谂住一齐抢吓，都抢唔到呀！初初都好惊大家唔知道我哋搞乜，农夫都好紧张问使唔使再帮手宣传吓，估唔到咁快卖晒，多谢大家支持！（会唔会加场？）而家都同紧主办单位倾紧，因为好多赞助商同企业都问紧我哋有冇飞呀。”

问道歌友会惊喜，玲玲师傅称：“我同农夫都倾咗好耐，因为有埋我又唔想好似佢哋平时演唱会咁，又想有啲唔同，连嘉宾都夹咗好耐，系一位歌手嚟，一定有新鲜感带畀大家。（农夫话有嘢当晚益大家㖞，可唔可以剧透吓？）我同主办单位倾紧想送礼物畀入场嘅每一位观众。（咁大手笔？）都系，你知我哋钟意‘以本伤人’讲笑啫，因为都想多谢大家。”