专访｜陈家乐狂走堂被飞出Sun Boy’z　激嬲公司：好多人等紧机会

38岁的陈家乐（Carlos）刚入行时曾经被英皇定位为男团“Sun Boy’z”成员候选人，获安排与陈伟霆、张致恒、麦子豪等成员练舞。年少不懂表达自己的陈家乐，不敢开口告诉公司想演戏，加上追不上陈伟霆、麦子豪等成员进度，惟有频频走堂。有一日公司发现，嬲爆打来闹醒陈家乐。幸而经理人没有放弃他，陈家乐获安排拍摄由陈木胜执导的《保持通话》，更获张家辉点名演更为重戏的角色。岂料第一天开工因太落力演戏，竟当众晕倒在山上，被陈木胜以粗口闹爆。
拍摄剪接：潘乐文
鸣谢服饰：Sandro Paris
场地提供：Sakana Hibi 肴日

狂“走堂”被飞出Sun Boy’z

陈家乐忆起后生时不敢开口表达想演戏的欲望，又被自卑击溃，“我连记Step都有难度。”沮丧之下陈家乐惟有回去打工，其他同学亦没有向公司“笃背脊”。陈家乐说：“有一日公司打嚟，问我喂你去咗边呀？我哋安排咗咁多嘢畀你，点解你冇出现到嘅？你知唔知好多人都等紧呢个机会㗎？”陈家乐惟有支吾以对：“我完全答唔到佢，我只能够解释我追唔到进度、怕失败、我唔想喺度。但我冇可能咁讲，𠮶时心情好差。”

试镜太兴奋险撞车

放弃了做男团的机会，陈家乐终于有机会演戏。同事介绍他到陈木胜执导《保持通话》试镜，陈家乐兴奋到险些出车祸。“佢哋喺西贡拍，我要去见一见导演，我一落车个同事同我Say Hi，我好开心冲出马路，唔记得望左右，有架车我隔离啱啱煞停，吓到我同事惊我出意外。”

第一日开工陈木胜粗口闹爆：吓到癫咗

陈家乐原是演台湾女星大S（徐熙媛）细佬朋友，练戏期间获张家辉点名加戏，“佢哋话本来做大S细佬个男仔嚟唔到香港，我听到家辉哥指住我话：‘就佢啦，畀佢试吓啦！’”陈家乐获得角色用尽全力去演，在山坡体力不支晕倒，被陈木胜用粗口闹爆，他说：“有人追杀我，我用尽所有能量去跑，但镜头追唔到我，跑咗几次，好攰，山上好冻、空气好稀薄。Ok咗终于转位，我冇同事同我去，好辛苦唔知同边个讲，一路行吓行吓，个人喺度摇，见到草地几好㖞，就摊咗喺草地度瞓着咗。”

工作人员转位期间不忍叫醒陈家乐，陈木胜其后得知“有个演员喺度瞓咗”，嬲到用粗口闹爆：“边个喺度瞓觉？边个够胆喺我个场度瞓觉！”陈家乐即时吓醒，“即刻吓到癫咗。”经同事解释后，陈木胜谅解并主动鼓励陈家乐，“你今日第一日开工，做得好，畀心机。我见到你好有潜质，加油。”陈家乐形容当时“即刻个人松晒，劲想喊。”陈家乐永不忘陈木胜的提携勉励，指对方的说话“对一个咁新嘅小朋友好有份量”。

十多年后再客串陈木胜《怒火》：冇遗憾

时间一转来到十多年后，陈木胜开拍《怒火》邀请陈家乐加入，可惜未能如愿，陈家乐说：“我好想10年、8年后再拍呢个导演，想同佢讲我大个仔啦，我唔同咗，好想证明畀佢睇，但个期撞咗，好失望好唔开心。”陈木胜诚意邀他客串一日演另一个角色，虽然只演一场戏，但陈家乐仍尽力演出，他说：“我个角色攞住杯冻柠茶同支筒‘嘴招招’咁，呢个系陈导演叫我咁做。做完我同佢一齐睇荧幕，我见到佢笑，佢觉得做得几衰格㖞！我觉得做到导演要求好开心。”陈家乐透露，陈木胜更安慰地对他说：“你真系大个咗好多。”令陈家乐大感窝心，他说：“好庆幸我拍到呢个角色，令自己唔好有遗憾。”