陈凯琳迎击负评早料做饮食易出事　评价毒舌Foodie：有少少搏流量

港姐冠军陈凯琳（Grace）近年转型成功，获外界封为“最吸金KOL”，近日她接受方健仪的网台节目《女人方言》访问，大谈当初转型的契机，以及回应三大负评，包括“老是常出现”、网民指其品牌的食品难食，以及与父母唔似样、曾被质疑非亲生的传闻。

陈凯琳回忆当初选完港姐，公司畀机会她拍剧，虽然不懂睇中文剧本，但觉得慢慢训练都会有进步。不过转型关键其实是老公郑嘉颖，她说生完大仔之后遇上疫情爆发，两公婆都觉得未必在短时间内有剧拍，积极思考有什么好做，“佢就好明确咁话，我冇嘢叻，我净系拍戏叻，我钟意做戏，佢话咁你呢？我话我觉得拍戏我都钟意嘅，但系你问我，我都觉得我可以试吓拍网上嘅片先啰。”郑嘉颖并没有盲目地鼓励她“你做戏一定得㗎！”而是以资深演员的角度去分析，觉得虽然老婆都会分析如何做戏，但未算对演戏十分狂热，Grace表示：“佢系话，如果你想做戏，首先我会话畀你听，你会浸多十年你先至可以得到某一啲成就，或者你会感觉上真系有信心做起，但系如果你觉得呢十年时间你foresee唔到你真系可以咁样去沉溺去做呢件事，不如试吓转型。我就话，好呀，我都觉得我未必有你呢一种Passion，我觉得我见到佢𠮶样嘢，我唔系同佢同一团火，我就开始转型拍片。”

而转做KOL后，陈凯琳也获得很大满足感和快乐，不过对于外界给她的“最吸金KOL”称号，她却直言不喜欢，因为她觉得不应用钱去衡量一个人，自己教仔时亦会教育他们，钱只是一个道具去帮助生活，但不应被它定义自己身份和存在价值。人红是非多，陈凯琳虽然深受公关和品牌欢迎，但也有网民批评她“老是常出现”，她亦有留意，她不会去问为什么别人要这样说，因为每个人都有自己的声音和意见，她不能太在意，然而她亦因这些评论回想去当年在TVB召见的事件，当年她剧接剧，突然被高层叫停，对她说：“嚟紧我想俾你抖阵。”Grace以为自己做错事，但高层就解释是不想观众见她见得太多，她续道：“观众见得太多，其实对你冇利，因为人系有种期待咁，好耐冇见佢跟住又再出现（先好），可能佢未消化一套剧嘅角色，你做一个乖女，下一套剧已经做一个坏女孩，佢会好混淆，唔知点解𠮶一刻我系click咗一下，原来人想睇另一个人都会有一个限度。”

虽然如今拍短片为主，不过Grace都会担心观众见得太多、觉得她常常卖广告，所以她坚持制作《欢迎光琳》系列，觉得要持续地有个非广告的节目，跟其他朋友合作，她也感谢网民的提醒，又说：“你唔需要说服每一个人都钟意你，但系其实有时一啲小小嘅检点，系令到你可以再更上一层楼。”而陈凯琳早前开设了自家的朱古力品牌，不过就因妈咪面朱古力及朱古力大福连环惹负评，Grace坦言其实一早预咗。她说自己不知道KOL可以做多久，所以想学做生意，“我以往有做过其他Business，但系饮食都系第一次做，我第一刻已经知道饮食系好容易会出事，因为每一个人嘅口味，学你话斋都会唔同，第二就系因为为我哋嘅食物真系任何时候都买到、可以食到嘅时候，你𠮶个percentage of人哋会攻击你，会更加上升。”

她感谢刚刚开业时有很多正面的回响和好评，但她心中有数，终有一刻会被打压、批评，她透露最初睇到网民狠批妈咪面朱古力难食及掉落垃圾桶时的反应：“你问我啦，我觉得都系搏少少流量嘅，因为一个人觉得唔好食，其实佢都唔需要特登去拍片，糟踬你嘅食物，有啲人会话浪费食物、抌呀各方面，但我睇到呢件事我好明白佢嘅心态系咩，我明咗呢件事嘅时候，我就觉得唔紧要。头先我讲到大家开Social Media都有自己唔同嘅原因，唔同嘅Intention，首先我会试咗呢个味，其实我自己觉得冇问题，我觉得OK嘅，如果佢唔钟意，it’s super fine，我系OK。”她也理解因为自己是陈凯琳，有新闻价值所以会被放大去讲，并问：“其实有时系咪我哋真系喺呢个社会度，需要攞啲Negative嘅嘅嘢去放大？我觉得讲每一句说话，我哋都要负返呢个责任。”

至于大福“硬崛崛”，她则坦承有做得不好，“我哋个partner都有讲，其实佢好早做咗，跟住摆咗落雪柜，所以硬咗，佢冇为意，佢自己都有讲返出嚟，我觉得系好fair，首先我哋唔好话一睇到就话‘点解你咁样讲我㗎？你真系好mean！’系咪我哋有事先？我哋有冇出错？如果我哋有出错，我哋一定要承担呢个责任，同埋say sorry，咁咪Move on啰。”

至于另一评论，是过往外界指Grace与弟弟的样貌有混血感、似印度人，不似父母般是中国人样貌，甚至因而有人质疑两姊弟是被收养、非亲生，“抽水王”林作更曾称自己愿掷1000万，要求Grace与弟弟验DNA，方健仪说自己将心比己，若事情发生在自己身上都会有不开心，不过Grace果断否认：“我冇㗎，我冇事，我真系冇事！”她认为世上任何国籍都有其美丽之处，没有谁比谁优胜，否则不会有这么多不同的肤色，“如果呢个人觉得呢句说话系一个侮辱，我觉得首先唔好侮辱呢个国籍嘅人，呢样嘢我听到嘅时候，如果我俾人感觉上讲介意，就代表我都对呢一个国籍嘅人有一种批评， which I don’t. ”她认为有任何传言出现，最重要是向当事人了解，自己都有问过父母，她透露二人的反应：“当我爹哋妈咪都话冇嘢，咪俾佢哋讲，冇乜嘢，我仲嬲嚟做咩？最紧要处理咗佢哋嘅情绪各方面，佢哋真系由始至终都冇嘢，‘我哋真系你爹哋妈咪呀嘛，咁我哋可以点做啫？’咁人哋叫我去做DNA Test，唔通佢哋话我哋唔系就唔系？”

方健仪大赞陈凯琳高EQ，问到当遇上负评时，会否请教老公郑嘉颖过两招，Grace笑指：“我冇谂过我自己最终会同一个咁嘅人一齐，咁嘅人系点嘅人呢？我哋真系我见到最一凹一凸嘅一种人。”Grace自言自己很外向，喜欢交朋结友，但老公的朋友却是一只手数得晒，二人性格相反，但反而可以互补，她解说：“好多时候佢有啲嘢睇唔开嘅时候，佢话点解会咁，我亦可以分享到我呢边；而我头先讲到有啲嘢，我觉得啲人点解会咁样做或者咁样写，佢就会同我讲真系唔使点理，最紧要你问自己你系咪想做呢个生意，你系咪想keep on going。”