我爱九龙城｜65岁李文标爆郑伊健鲜为人知真面目：我唔爆冇人知⋯⋯

HOYTV剧集《我爱九龙城》正在热播中，当中经典绿叶65岁李文标亦有客串演出，他表示今次客串，主要理由因为黄泽锋，他说：“我收到剧本话同黄泽锋有对手戏，我立刻答应，我哋当年拍广告识，角色要做猪肉佬，剧组叫我唔好介意，我点会呢？我入行到而家都未演过猪肉佬，咁开工又可以见到返啲朋友，真系好开心。”

“同埋仲有波姐（冯素波）我当年同佢喺亚视有好多套戏合作，我喺金钱logo年代嘅亚视同佢合作㖞，我哋拍完嘢仲会一台咁食饭，每一日见面仲多过屋企人，感觉大家系亲人嚟。”
剧中主景大部分是九龙城，而九龙城这个地方对李文标亦充满回忆，他说：“九龙城我太深印象，我爸爸系教车师傅，自细就车我去九龙城，因为我钟意睇飞机，而家啲小朋友可能唔知，我见到直头系惊，因为太近喇，飞机辘直头好似会掂到大厦啲天线咁，你话几近呀？个感觉好特别。”

“另外九龙城令我觉得特别呢，就系因为当年我入咗邵氏，当年𠮶到有间叫洞天餐厅，𠮶到系一个出发点，集合哂武师啦、替身啦，我哋喺𠮶到出发嘅⋯⋯咁之后到特别喇TVB年代，当年郑伊健、李家声、钱国伟⋯⋯佢哋就好衰嘅，我就唔饮得嘅，佢哋就围攻我，俾佢哋队我饮6，7枝啤酒，真系搅唔掂，但呢啲系好开心嘅回忆，所以九龙城畀我感觉好多同好特别。”

“郑伊健好饮得㗎，你唔好睇少佢⋯⋯伊健基本上系一个酒筲箕，我唔知佢之后有冇呕？但真系好饮得，佢饮啤酒好似倒落去咁，佢系最饮得呀，我唔爆冇人知，出得街唔驶惊，（咁佢酒品如何？）郑伊健呢个人真系要赞，首先好有礼貌，可能家教好，佢见亲人都会点头，无论系咩人佢都会点头先，真系好嘢，我自己都做唔到，咁佢演戏又得、唱歌、身型都掂，佢系一个好全面嘅艺人。”