黎诺懿马来西亚拍剧忘记老婆？　爽到似放假：夜晚同Ali落楼食嘢

【黎诺懿/李佳芯/义和】黎诺懿今日（14/9）出席活动。早前他刚完成和李佳芯合作的马来西亚剧集《义和》，他笑言两个半月的拍摄时间过得十分开心和简单。在记者提醒下，才急忙“转口风”直言因为太太不在身边，所以那段日子也十分想念她。

他接受访问时说：“今次非常之开心，同Ali去咗马来西亚，呢个令到我好似返到去拍剧嘅时候。因为以前拍剧都系出埠两个月，随住人大咗，有家庭，成件事好难做到。我对上一次出国拍剧，我已经唔记得咗（几耐之前？），可能讲紧对上一次系《舞动奇迹》𠮶11个月，喺国内生活。同埋今次拍剧，令我终于甩难，可以进入两个半月拍剧mode，同太太、仔仔Facetime（视讯通话），返到屋企就净系对住剧本，同埋好耐冇试过生活系咁规律。朝早起身，跟住饮杯咖啡，跟住落去做gym，跟住睇剧本，跟住就拍剧。夜晚返嚟就同Ali落楼食嘢，跟住就瞓觉。”

问到太太没有嬲？他回答：“会呀，久不久系要放吓假。我都系好耐冇放假，但系我都冇放假，我系去拍嘢㖞，太太，我都系赚钱。（你应该话好挂住佢！）呢句嘢等你tag，自己讲唔好㗎嘛。我呢两个半月梗系好牵肠挂肚，好辛苦啊，又要集中拍剧，又要忘记我太太。多谢你tag得咁好呀！”