专访｜欧阳震华抖音“跳老舞” 豁达笑对：冇钱扮体面？
65岁欧阳震华有“收视福星”之称，90年代拍下的无线剧集《壹号皇庭》、《美味天王》、《陀枪师姐》、《洗冤录》、《金装四大才子》，到2017年的《夸世代》也是经典中的经典。去年欧阳震华加盟英皇娱乐大力发展，在各方面也是如鱼得水。
提起欧阳震华，不少人都会想起今年5月他和王浩信、郭晋安等人在抖音上广泛流传的跳舞片，亦有网民睇完后耍手拧头，大呼尴尬，嘲笑加埋306岁十分“虐老”。在专访中，提到此事时，欧阳震华就相当豁达，展现招牌笑容一笑置之，说：“点样叫体面？冇钱扮体面？咁人哋要赚钱㗎嘛。”
加盟英皇娱乐
去年欧阳震华加盟英皇娱乐，他强调十分满意加盟后的工作安排：“我签啱咗英皇娱乐！”直言自己尝试了十分多以往从未接触过的工作，特别是早前登上内地一线节目《声生不息》献唱。“好唱得就唔需要叫‘小鲜肉’，唱得又好样就更加轮唔到我啦。点解会拣我去《声生不息》，仲要系香港电视剧主题曲。其实有啲玄机，因为签咗我返去就系要试欧阳震华喺内地观众心目中，仲有冇存在呢？即系试水温。有就梗系有啦，就睇吓仲有几多。”
烂船仲有三斤钉：仲有人识我，好感恩
欧阳震华谦虚的表示，托赖自己“烂船仲有三斤钉”，早年在TVB拍下不少喜剧又正值内地开放市场，所以作品得而广传成为大人细路都睇的剧集。他说：“我𠮶十几年拍嘅剧，真系好多人由细睇到大，唔系一代睇，而系佢婆婆，佢妈妈，到佢细个都睇紧，三代都睇。以前啲剧就简单啲，有而家咁复杂。同埋而家竞争大咗，所以仲有人识我，我都好感恩。”
去《声生不息》“见识”
他续说，经理人Mani安排他登上《声生不息》，也是令他意想不到，但又惊喜之举。“Live band㖞！我都未试过戴耳塞唱歌嘅，点用㗎？听咩㗎？哈哈哈！原来一只系听自己把声，另一只系panel声，同埋有人会提几时入。（其实好多歌手都要提）系啰，所以Mani话捧我做歌手啰！”问起觉得自己当晚表现值几多分，欧阳震华就回答：“仅仅合格啰，因为我唱完，第一时间落嚟就问我老细：‘有冇走音呀？’佢话：‘冇！’冇走音就得啦，好似网民咁讲，欧阳震华系冇技巧，但系最重要就系有感情。”
大方笑谈抖音“跳老舞”
今年5月，一则“跳老舞”，由吴卓羲、王浩信、郭晋安、欧阳震华、林晓峰及高钧贤 6位齐跳《今晚好犀利》的抖音片在疯传，不少网民睇完都直呼尴尬、“虐老”。专访中提起此事，欧阳震华没有“黑面”也没有避谈，反大方笑谈个中的细节。
临时加插？呢啲系计算
“有好多人讲，咁大年纪点解唔可以体面啲咁老去呢，亦都有人讲，佢脚踏实地做佢擅长嘅工作，有咩问题。点样叫体面？冇钱扮体面？咁人哋要赚钱㗎嘛。因为好多人内地人60几岁退休，有退休金㗎嘛。可能香港人唔怕丑啲啦，好似我咁。内地啲明星一上到去：‘黐线咩，我点会做呢啲呀？’其实我哋唔知有𠮶part嘢。（临时加？）唔系临时加，呢啲就系个计算啦。唱歌知，唱《17岁》知，我自己唱《怪你过份美丽》我都知，净系𠮶part，我哋几个着晒黑衫，好有队形咁坐喺度，𠮶啲都系‘开胃小菜’啫。跟住佢哋讲：‘麻烦你哋起身，夹一只舞。’夹咩舞呀？剩系得吴卓羲识跳，即系佢知，佢带头系最前𠮶个，我哋几个企后面，咁样咁样。‘好啦，嚟啦。’我话：‘吓？！嚟啦？嚟咩？’安仔企我后面，我问记唔记得。安仔好笑呀，佢话：‘唔使记得㗎，郁就得㗎啦。’咁咪尽量郁啰。”
豁达笑对耻笑：冇人提你就闭翳
虽说舞跳得尴尬，但老实说却是整个节目最成功，最有讨论度，最多人观看的一集。“洗咗几日版呀。咁冇所谓㗎，好多人梗系弹，舞又唔齐，又300几岁男团点点点，咁我年纪最大，我就冇所谓呀，我就跳得几好，喺后面跳系慢半拍啫，起码唔好左手左脚，右手右脚呀。咁我起码知道自己岗位，呢啲系综艺性节目，有啲人又话‘虐老’。宣萱讲嘅，《奖门人》食寿司咪仲虐老。老实讲，唉，冇人话你唔好，就即系证明你冇乜影响力，有人话你唔好，先帮到人揾食。洗几日版，个个都讲，𠮶啲都系经济来源，帮到人几开心呀。唔通人哋讲我靓仔，跳得好？冇可能㗎。唉！做呢行，我而家做到呢个年纪，唔好怕丑，最紧要面皮厚。肥妈话斋：‘有人弹即系证明你仲有位，仲有留意，冇人提你就闭翳呀！’哈哈哈！”
尴尬到尽头就是⋯⋯
诚如欧阳震华所说，在娱乐圈“生存”并非摆摆款，唱几句跳两下就算是，而是要多方面发展之余，认清自己的“岗位”及勇于接受挑战。“一把年纪”走去跳舞尴尬？其实那才是综艺的精髓。别人笑他面皮厚，倒不如是他玩透了，睇透了娱乐圈的生存之道——尴尬到尽头，就是型！