谭耀文举办入行37年来首个演唱会 群星拍片力撑睇完片即眼红红
谭耀文即将举办入行37年来首个演唱会《谭耀文 In Full CHARACTER》，昨日（11日）举行记者会公布详情。主办单位和赞助商，还有谭耀文在“声秀”的学员胡港丰、布子殷与萧凯恩，以及他的数十位歌迷也有亲临现场支持。除了现场出席支持谭耀文的人外，亦有不少朋友在影片送上祝福。
记者会上主办为谭耀文送上惊喜，找来多位好友包括陈淑芬、郭富城、郑秀文、佘诗曼、张智霖、陈伟霆、梁咏琪、陶大宇、伍咏薇、陈炜、汤宝如、林家熙 Locker、姚乐怡、郑浩南、向海岚、林熹瞳、何佩瑜、张继聪和张振朗等人为他拍片打气，真是星光熠熠。谭耀文在看片段时感动得一度眼红红，手执纸巾说：“我其实个人好man ，但睇到咁多好朋友拍片支持送惊喜，真系无乜人会顶得住，哈哈！”
大家先看一下他们分别想跟谭耀文说什么：
陈淑芬：“Hello Hello ! 恭喜阿谭谭耀文，今年系你入行37年，首次开你嘅个人演唱会，今次我知道你系用咗做演员多年嘅经验同埋歌手嘅结合，会编排一个好正嘅Show，又跳又唱展示一个完全谭耀文比各位观众，咁我哋12月2号麦花臣见啦，好期待。”
郭富城：“喂，老友记阿谭，我知道你今年12月就要开演唱会啦，咁我系呢度祝你一切顺利，你而家就要努力Keep Fit，练歌练舞，Good Show，Man。”
郑秀文：“阿谭恭喜你，知道你12月2号系麦花臣举行你入行37年嘅第一个嘅个人演唱会，当我听到呢个消息之后，我都好邓你开心。因为我同你系同一届新秀一齐出道，咁当时一齐攞奖，咁所以当时其实有好长时间时时同你一齐出去工作，接受访问，一齐做啲杂志影相呀。咁所以今次知道你举行入行第一个个人演唱会，好邓你开心之余，感觉同自己好贴近，呢件事好似同自己有关系咁，所以系呢度祝福你呢个演唱会一切都完满。”
张智霖：“大家好，我系Chi Lam，知道我好朋友谭耀文阿谭即将会开演唱会，咁我系呢度祝佢万事都顺利，Enjoy the Show，恭喜。”
佘诗曼：“恭喜阿谭，12月2号系麦花臣系开Show啦，我同一众乐迷都等咗好耐，你返到呢个音乐舞台唱歌比我哋听，到时大家一齐嚟支持啦，Good Show。”
陈伟霆：“Hello 大家好，我系伟霆，听闻我大佬谭字耀文谭耀文先生，12月2号系麦花臣开Show，咁其实佢除咗演技了得，佢系舞台上面散发嘅魅力其实都好正，希望大家可以入场多多支持佢，Good Show。”
梁咏琪：“恭喜阿谭谭耀文开演唱会啦，好期待听你唱Live啊，咁我相信呢个演唱会对你嚟讲意义一定系非常之重大嘅，所以系呢度祝福你演唱会顺利，票房大卖，Good Show。”
陶大宇：“阿谭，你好吗？我哋好耐冇见啦，咁我知道你呢系12月2号就系麦花臣开你嘅个人音乐会，咁我相信除咗我之外重有你嘅Fans呀你嘅歌迷呀都期待咗呢一日好耐好耐架啦，咁我都祝你顺顺利利同埋演出成功啦，最紧要㖞，系果一日要尽情发挥你嘅音乐同埋唱多啲好歌比我哋听㖞，咁大家要记住呀，一定要入场支持阿谭呀。”
伍咏薇：“Hello Hello阿谭恭喜晒你呀，你12月2号个人演唱会恭喜你呀，祝你Good Show，Good Show，Good Show，Good Show，到时我都会买飞亲自嚟睇你嘅演唱会架，希望多啲朋友多啲你嘅粉丝喜欢你嘅人都会踊跃嚟睇你嘅演唱会，买飞买飞买飞，Good Show阿谭，到时嚟支持你架，恭喜恭喜，锡晒你。”
陈炜：“Hello谭哥，恭喜恭喜，我知道你呢嚟紧12月2号就会系麦花臣开演唱会呀，哗，真系期待咗好耐啦，回归乐坛，37年，大家都等咗你37年啦，我啦同你啲歌迷啦都好期待当晚可以听到好多好多好多你嘅靓歌，一定要唱多啲好歌比我哋听呀。”
汤宝如：“恭喜恭喜阿谭，我知道你呢系12月2号系麦花臣开你嘅演唱会，我相信呢我呢同埋你嘅乐迷都等到颈都长埋，终于你开金口啦，恭喜晒恭喜晒，咁大家一定要支持阿谭啦，我亦都会亲自落嚟支持你，恭喜晒恭喜晒Good Show。”
林家熙Locker：“你个衰老窦你知唔知得罪咗啲咩人呀，你睇下你整到个头咁靓影晒Poster咁样，你系咪学人开演唱会呀，啲人知唔知卖晒飞未架，唉，激死。”
姚乐怡：“恭喜晒谭耀文开Show啦，谭哥唔单止演技精湛，唱歌都好掂架，大家记得支持12月2号佢系麦花臣嘅演唱会啦。”
郑浩南：“Hello Hello阿谭阿谭，恭喜晒恭喜晒，12月2号麦花臣开Show麻我知道呀，我会好似你果啲歌迷Fans一样系咁期望希望你重返舞台唱啲好歌比我哋听。”
向海岚：“12月2号谭燿文会第一次系麦花臣开佢嘅个人演唱会，系呢度祝阿谭你嘅演唱会成功，Good Show，Good Show”
林熹瞳：“Hello谭哥，我系Rachel，知道你12月2号系麦花臣有Show，我哋好多乐迷一样等咗好耐，终于等到你返嚟呢个音乐舞台啦。”
何佩瑜：“Hello谭Sir，知道你开首次个人演唱会，我希望你系演唱会就系发光发亮，Enjoy the Show。”
张继聪：“谭哥恭喜晒，知道你系12月就会系麦花臣开Show啦，咁呀，邓你开心，咁我想讲呢，谭哥其实我好荣幸可以同你合作过系电影好多次啦，你系我心𥚃面系一个我非常非常尊敬嘅前辈。因为每一次你嘅演出都好出色嘅，我成日都提我自己同你一齐演戏我要唔好净系挂住睇你表演而要记得讲台词，呢个系你系心入面系一个好出色嘅演员，同时都好照顾我哋后辈，咁我知道其实你歌唱嘅技巧都系好高。所以呢我同所有嘅乐迷一样终于等到你再上舞台唱歌，咁希望你今次可以Good Show啦。同埋继续Tour啦，继续巡回演出啦，等世界各地歌迷都可以听到你嘅歌声，谭哥，Good Show，We Love You。”
张振朗：“谭哥，猛料，我知道12月2号麦花臣将会系你嘅大日子，我系度预祝你票房大卖。”