日前流出的林峰《寻秦记》片段，引起网民竞猜所为何事，原来系林峰以“寡人”造型拍摄港铁新一辑新铁路广告《寻．未来记》。今次系林峰时隔二十四年再以霸气“寡人”现身幕前，于片中沿港铁各大重点项目穿梭现在与未来，预告片连同一连两集正片接力推出，粉丝们终于再有“等剧播”同“追剧”嘅感觉。

除咗经典剧集《寻秦记》“寡人”同埋《溏心风暴》经典CP拍档钟嘉欣以“常在心”造型登场引起剧迷回忆之外，港铁今次更大玩港人集体回忆，召唤已经长大成人变成大只仔嘅“打波先嚟落雨的四眼仔”郑仲轩Eric本尊联同林峰合演经典桥段，又重现当年情人节喺花墟一人买两紥花嘅“花先生”，将集体回忆以创意延续，再创新经典，同时融入广告桥段当中，成功将未来铁路发展愿景以庄谐并重方式展现，得到全网观众一致好评 !

“寡人”大破“情人节花先生”两紥花之谜

港铁全新广告短片《寻．未来记》里面，由林峰饰演嘅“寡人”手持太傅留下嘅穿越时光机器，由秦代穿越到现代港铁网络！今日登场嘅第二集，“寡人”去到未来，遇到多年前被新闻采访后变成网络红人嘅“情人节花先生”。当年喺花墟手持两紥花并拜托记者唔好串煲嘅佢，喺未来时竟然再度手持两紥鲜花。喺“寡人”查问下，“花先生”仍然好似多年前咁闪缩，但终于鼓起勇气讲明鲜花绝对唔系为东宫西宫唔同情人去买！原来两紥花其中一紥系买畀喺东涌东站同住嘅老婆，另一紥就系帮住喺东涌西站逸东邨嘅儿子买，依家正系做紧“廿四孝老豆”，搭东涌延线送花。“寡人”为各大观众揭晓“花先生”竟然唔系花心男而系“廿四孝老豆”，更预览未来东涌线延线成为区内主要连接东西社区嘅公共运输交通，大大拉近不同社区生活嘅家庭成员关系。“寡人”大为感动之时，耳边突然响起熟悉声音，高呼“管家佬”！

“常在心”钟嘉欣终极登场

万众期待，以经典剧集角色“常在心”登场嘅钟嘉欣，一句“管家佬”立即引起全港剧迷观众哄动，瞬间连结近十七前嘅煲剧时光。千呼万唤，作为林峰经典萤幕情侣嘅钟嘉欣，终于喺第二集广告压轴登场！

钟嘉欣以经典角色“常在心”现身，手推婴儿车呼唤“管家佬”，并以延续剧集传奇级别数日子桥段“有咗仔仔嘅第300日，晴”作开首对白，将《溏心风暴》两辑嘅经典角色crossover，为一众港剧迷送上呢对经典情侣角色嘅平行时空终极大结局，重燃大家对呢对CP嘅热爱。“常在心”见到“花先生”为妻儿准备鲜花，投诉“管家佬”两手空空唔记得庆祝纪念日，发火提出一系列要求，要去屯门南站去海边玩、食海鲜、行山、睇日落、四围打卡！面对老婆连番轰炸，爱妻宠妻嘅“管家佬”从容面对一一答应，因为港铁未来铁路网四通八达，一家人轻轻松松沿铁路就可以玩尽香港东南西北。

“常在心”听到“管家佬”嘅甜蜜承诺后笑返哂，“管家佬”凭港铁日益壮大嘅发达网络，以“心”连结四方。而“常在心”就喺乘客街坊起哄下改名做“常在东南西北”，展现港人最熟悉嘅电视剧经典BBQ式大团圆结局。

钟嘉欣感恩广告再续角色前缘

林峰话今次饰演寡人穿越时空，令佢重温昔日搭港铁返学的情怀，佢亦笑称对古洞并不陌生，因为该地方属古装拍摄胜地，从未谂过未来会有古洞站的出现林峰笑称：“如果拍时装嘅可以，但拍古装冇理由带住个头套去搭车，都唔系唔得嘅，不过怪啲！”

林峰：“当年我拍《溏心一》时本来谂住净系客串，同埋未试过一个角色净系负责拍拖，果阵日日都系同嘉欣一齐开工，点知拍拍下越嚟越多场口！但其实都好开心嘅，因为可以创造咗令观众记得嘅角色！”

呢次港铁一手撮合林峰同钟嘉欣以经典CP组合同场出现，两位都觉得好神奇、好感动！久未与林峰合作拍剧嘅钟嘉欣，一见到管家佬嘅经典格仔恤，昔日回忆即时涌上心头：“𠮶阵嘅《溏心》系列对我哋嚟讲，事业上真系帮咗好多。所以到依家廿年后，都仲可以走返埋一齐，拍返一个好似续集咁样嘅广告，感觉都好奇妙！其实我十九岁嚟香港嘅时候，已经开始搭港铁，因为我觉得好方便，可以好清楚知道几多点会到目的地。同埋我钟意周围睇唔同阶层嘅人，观察佢性格、心态呀、佢哋做嘅嘢。所以轻轻五分钟，我自己摸索、学到好多嘢！”嘉欣仲话平时搭港铁，如果有化妆会大方示人，素颜时就“头耷耷”冇人认得出：“我平时都会带小朋友坐港铁，因为呢个系香港嘅特色！同埋我会话比佢哋知，妈咪系靠坐车学讲广东话，好似‘将军澳、旺角’，可以睇到好多中文字，又试吓摆啲银仔买飞等等！”

网民盛赞第一集郑仲轩本尊登场神来之笔

《寻．未来记》第一集播出后，立即引起全城热议，网民更盛赞港铁揾到“打波先嚟落雨四眼仔”郑仲轩Eric本尊参与演出，系神来之笔，将集体回忆加入新元素再创经典。

广告首集开始，“寡人”穿越至香港屯马线宋皇台站月台。霸气“寡人”居然被女学嫌阻住条路，仲笑佢唔知搭屯马线过海返学可以悭返多啲时间唔使咁早出发，笑佢系“无知叔叔”！早已收火嘅“寡人”高呼惊奇，仲误会“屯马”、“东铁”系香港市民返工返学嘅良驱神兵。

稍作停留后，“寡人”重启时光机器穿越到更遥远嘅未来，到达未来北环线古洞站附近嘅足球场时却遇上倾盆大雨。“寡人”感受到“踢蹴鞠先嚟落雨”、无力与天比高嘅挫败感之时，终于遇到第一个未来人：几十年来一直保持乐观心态嘅“打波先嚟落雨四眼仔”郑仲轩Eric ！已经长大成人变身肌肉猛男嘅郑仲轩，于“寡人”指挥下一同前往东铁线与未来北环线交汇嘅古洞站避雨。“寡人”于未来古洞站预览港铁新铁路贯穿香港东西南北，更亲身体验以港铁高速移动到全港各区，方便省时快捷！