谈善言（阿谈）凭电影《虎毒不》，演活产后抑郁新手妈妈淑贞，首度荣获第31届香港电影评论学会大奖“最佳女演员”，不仅获赞“谈善言为这个高难度角色赋予了极强感染力。”更迎来演艺生涯第一个影后殊荣。以为她会因此自信满满，阿谈接受专访时却罕有剖白演戏十年的心虚感，坦言初入行时因“冇根基”极度自卑，似“行错路”乱闯别人婚礼，也花了好些时间才克服了恐惧，明白不一定要排斥“惊”这种情绪。
适逢她首度挑战舞台剧《鳄鱼之吻》，饰演“三届影后”钟家宝，更让她直面女演员被定型、以及“演员”与“明星”身份的拉扯。圈中是否真如剧中般尔虞我诈？阿谈坦言未见过，更透露与一班同辈演员挨过冇工开、互相扶持的日子，更感激好友廖子妤（Fish）病中送粥，自爆倾足八小时：“我哋系互相照镜。”
服装：ATSURO TAYAMA(@atsurotayama)
发型：Larry Ho @ il colpo (@larryho_hairstylist)
化妆：German Cheung (@ger_ger)

入行不自信自觉似外人乱入他人婚礼　心虚怕搞砸作品

以为她会因此自信满满，Hedwig 却坦言，演戏十年，那份“不自信”从未真正离开过。她形容自己初初入行，自觉好像是乱闯了别人婚礼一样：“不自信可能系我冇根基，我唔系细细个就好想做演员，对电影好有热爱嘅人，我冇呢种根底喺入面。呢行梦工场吖嘛，有啲人系细细个已经开始想做戏，有啲人系已经读过书，有啲人已经好有佢对电影嘅睇法，但系对于我嚟讲呢啲嘢都好远，我觉得我好似一个外人，行错路入咗去，好似行咗去人哋个婚礼咁，好惊㖭，我坐喺度，‘识唔识㗎呢？’有种心虚嘅感觉。”

这份心虚，在她接到《虎毒不》剧本时达到了顶峰，阿谈不讳言多年来总被定型为冷酷、倔强，首度挑战母亲角色时确实遇上不少质疑，尽管监制陈小娟力排众议、不相信角色定型都坚决找阿谈试镜，但她从不断摸索角色和“畀尽”的过程中都会感到害怕，怕自己会搞砸了这套戏，令小娟所托非人：“《虎毒不》真系最惊，真系惊！因为我好惊一套咁嘅戏会比我搞到大家唔信服，唔想同理呢个妈咪，或者小娟（导演陈小娟）嘅信心摆咗落我度，我辜负佢，我系惊嘅。”

《虎毒不》打破冷酷倔强定型　克服恐惧似玩笨猪跳

事实证明，陈小娟的坚持没有错，《虎毒不》正正打破了外界对谈善言的既定印象，她也从拍戏十年以来不经不觉地累积了经验，心也踏实了起来：“系呀，我唔识，但系识嘅人会教我；我唔识，但系识嘅人做我会见到，我会学，慢慢去改善、慢慢去揾到一种实在感。”她庆幸陈小娟对自己押重注：“正常如果佢相信定型呢件事，系唔会揾我去做《虎毒不》，因为一开始佢想揾我casting嘅时候，啲人都觉得唔啱㖞，佢唔系咁样㖞，系对你嘅一个想像嚟，一个好快嘅定义啰。但系陈小娟𠮶时就冇理到，‘我唔理呀，我想casti佢，我觉得佢啱我，可能可以试吓㖞。’可以打破咗呢个俾人定义咗嘅我嘅类型。”

影后殊荣及观众口碑也是一支强心针，阿谈形容那种感觉如像跳笨猪跳：“就系因为克服咗《虎毒不》，就会觉得𠮶阵时都惊，𠮶阵时拎住个剧本都唔知点算，但𠮶段时间我都挨过咗，我实践咗出嚟啦，有啲嘢，你跳Bungee jump跳咗一次嘅时候，你第二次就冇咁惊。”阿谈表示现在虽然都会偶然自我质疑，不过会很快冚熄了这个疑问的火种，学识与不自信共存，去提醒自己做得更好：“都接咗啦！𠮶时《虎毒不》都系，‘都接咗啦！加油努力揾方法啦！’冇办法㗎，你会唔会推吖？你唔会推，你唔会唔做嘛？咁你梗系争取啦。”

首挑战舞台剧《鳄鱼之吻》　剧本道出女明星挣扎极大共鸣

跳过一次“笨猪jump”，阿谈又再踏出舒适圈，挑战人生第一个舞台剧，在《鳄鱼之吻》中担正，饰演三届影后“钟家宝”。虽然她一直以来都对舞台剧跃跃欲试，惟工作档期未许可，今次恰巧有空，又因好友廖子妤（Fish）在旁推波助澜，决定一试：“佢做完一次（舞台剧《饭戏攻心》）之后话‘你一定要试一次，一世起码都要试一次！’我话‘吓，好恐怖咁㖞件事’，佢话‘唔系㗎，你会上瘾㖭㗎可能’，所以一路都有个心郁郁嘅感觉，就会想去试。”

而更重要的，是她与女明星、女演员角色有著连结：“佢个状况其实同我有啲似，就系你做咗呢一行一段时间，你有你嘅经验，你有你嘅获得，但系突然之间蓦然回首，你会谂，之前嘅路系咁，但系我以后嘅路系咪都系咁样呢？又或者我以前揸紧嘅嘢，我系咪要放手，睇吓我仲可以见到其他啲乜嘢呢？唔好话女演员，人去到某一个岁数，你总会回顾返自己，因为你20几岁喺度一路冲一路冲，一路揾一路揾，你通常30零岁，已经喺你条路上行咗一阵，你就会停，你冲完就开始停，望吓，我都有呢个状态，我见到钟家宝嘅时候，我觉得我有同佢喺呢个位有synchronize。”

阿谈认为剧中讲到女演员被定义的生态，使她有极大共鸣，除了上面提到的“好cool、好倔强”外，还有戏路窄、以及对后起之秀涌现等恐惧，“以往女性嘅角色更加唔系多，可能好多时你做过一个类型嘅角色，好容易观众就会觉得你净系可以咁，或者佢哋好快就……呢一种角色就会谂起你，好似某程度上系限制咗我尝试咁样。又或者系，喺呢行里面不断有好多人出现嘅时候，你会有一种恐惧，你究竟可唔可以喺呢行继续行落去呢？定系好快俾人忘记呢？忘记咗，咁你就冇机会去试，冇机会去进步，都会有呢种恐惧。”

自认好胜死牛一面颈　宁与自己过不去都要试

叶念琛导演未有经过Casting，一早已敲定由阿谈饰演钟家宝（阿宝），主要是因为叶导演睇完她在《虎毒不》时期做的访问，觉得她已散发住三届影后钟家宝的气场，以及从她身上看到女明星的可塑性。阿谈也从此事思考“演员”与“明星”的分野：“我觉得而家嘅女演员未必有以前𠮶种女明星嘅感觉，好似演员同明星系擘开咗呀件事。”而她正正被导演看中了那份特质：“但系喺我做访问嘅时候，见到我可以有做女明星嘅特质，佢就谂起我，觉得我可以去试。”

近年大家常常讲“IP”，要擅于经营自己的个人品牌形象，被问到演员与明星分开是否一件好事，阿谈表示：“我觉得系呀， for我嚟讲，我觉得女明星系再多一种自我嘅Charm喺度，或者本身佢个人IP比较大，女演员就系冇乜IP，唔系好应该有好大嘅IP。你依然喺度，但系更加似系更多嘅角色match落你度，你可以同佢blend in，唔需要太多嘅个人特色。”

谈到与阿宝的相似之处，阿谈认为在“好胜”这点上最为相似，“对于我嚟讲好胜系坚持嘅一种，佢𠮶种好胜，佢都有呢种感觉，就系我觉得我要去做到。不过佢都有一种唔同，佢会同人比较，但系同人比较我觉得系一种死症嚟，会令到自己太辛苦，但系佢系会有呢种感觉，‘我要赢！’”相比之下，阿谈的“好胜”更倾向于自我鞭策，反而多与自己较量，觉得自己要做到的事，总会找方法做到，哪怕过程中常常跟自己过不去；记者笑言这应是“死牛一面颈”，而从阿谈的英文名“Hedwig”也可见一斑，尽管名字正解为坚毅，但某程度上也有种“不到黄河心不死”的意味：“系，想自己识得战斗，同埋识得坚毅。”

未觉娱圈尔虞我诈　与同辈挨出深厚羁绊：共患难感觉好重

《鳄鱼之吻》不乏娱乐圈争名逐利的情节，但在阿谈眼中，现实的娱乐圈却是另一番景象，自言未见过儿时在八卦杂志见到的尔虞我诈，她所感受到的，反而是同辈间的互相扶持。她认为这一代艺人“共患难”和“一起成事”的感觉和羁绊较深：“我哋呢一代或者冇咁多大公司、经理人，可能系比较靠自己多啲，以前你冇Social Media，冇渠道识咁多人，好多时系大公司帮你安排好多嘢，但系我哋而家就系自己靠自己多，𠮶种共患难嘅感觉好重！”她忆述刚入行的日子，与同期好友手挽著手、互相扶持：“我哋啱啱一齐出嚟做嘢𠮶班朋友，唔系一出嚟就已经好多嘢俾大家可以去争取，而系我哋好多时系一齐去经历，我哋冇钱嘅时候，我哋好担心屋租嘅时候，我哋担心三餐嘅时候，呢种朋友意识好重。”

病中获廖子妤走唐五楼送粥　8小时促膝长谈如照镜

对于那段生计最不稳定的时期，阿谈已无意多提，毕竟辛苦的又不止自己一个，她只表示：“𠮶段时间反而系大家朋友、朋辈最紧扣嘅时候，大家可能真系冇咁多嘢做，我哋又会搬埋附近一齐住，所以可能食饭或者生活都系好似邻居咁。”她的共患难名单除了《DiY2K》的麦芷谊、《点五步》的朋友，还有柯炜林、杨偲泳、廖子妤等等，她忆起初入行独居于唐楼的日子，Fish的照顾让她铭记于心：“𠮶时我都住Fish附近，我好记得有一次病，因为住唐楼，住好高，外卖都唔会送，𠮶时都未有𠮶啲Deliveroo，系阿Fish成日都买饭上嚟、买粥上嚟，买生活用品上嚟畀我，因为我自己一个住，佢好照顾我。”而同样地，Fish又出埠时，阿谈又会上去帮她顾猫。

即使近年大家工作量大增，见面时间减少，但只要一有机会，她们总能聊个通宵，畅谈这一两年的烦惨、心事：“呢两日有个契机，我都好耐未试过同佢坐喺度倾咁耐，分开咗两日，有一日倾咗三个钟，有一日倾咗八个钟，都冇谂过倾咗咁耐，冇做任何嘢，斋坐喺度倾偈。”阿谈形容自己与 Fish 的关系是互相照镜，观众可能只觉得二人外型相似，但她直言其实彼此深知连个性都很相似：“佢去开解我嘅时候，亦都开解佢自己，我讲紧我自己嘢嘅时候，可能都有讲紧佢嘅嘢，我哋系互相照镜，互相安慰，互相夸夸，冇事嘅，‘你冇事嘅！我都冇事嘅！’、‘你好叻，我都好叻！’”

面对电影寒冬拒绝悲观　同意拍电影转模式未感生不逢时

香港影坛正面对著影视寒冬，开拍的新戏没几套，而阿谈上一部电影煞科已是今年四、五月的事，不过她就明确表示：“我唔想悲观。”在困局之下，她反而从其他导演身上看到另一条出路：“不如我哋其实真系唔需要好大嘅资金去拍一套戏，我哋全部试吓细budget，全部实验电影，有自己好细好细嘅scale，但系我哋一齐去合力做一件事都得！其实可能呢件事系work㗎㖞，之前盘数当然好大，但系未必翻到本嘅时候，我哋何不试吓有多啲唔同嘅题材？”她认为由导演、编剧主导自己想拍的题材，再承担个中风险，与大家合力做好一件事，或许就是这种市道下的另一个模式。

讲到近年的社会题材电影，被形容为“狮子山下”风格，过度惨情也令香港人在本来已不开心的环境下更加沉郁和压抑，但阿谈就认为每种主题的电影都应该存在，况且电影应与生活紧扣：“每种时期都会有一种题材系特别多，𠮶样嘢一系观众需要，一系个社会反映，我觉得电影都系一个记录时间、社会嘅一个方法，有呢啲电影存在都好正常。”

大约十年前，有声音指香港女演员青黄不接，能获封金像影后的要不是老前辈、要不是内地演员，至近几年入围名单，终于多了些二、三十岁的面孔，阿谈当然也位列仙班！可惜偏偏在这个年头，一众影坛新生代遇上冰河时期，未能获得大展拳脚的舞台，问阿谈可觉得自己生不逢时，她却说：“我觉得我哋𠮶阵时相对嚟讲系几好，我哋啱啱出嚟嘅时候，就系开始有首部剧情片嘅时候，又多咗唔同类型嘅题材，亦都因为佢哋budget好低，多咗用新演员。我当然冇经历过佢哋好劲，一年几百套戏𠮶个年代，我唔会知道佢哋有几风光，但系我净系知道我出嚟嘅时候，我有机会畀我去试、有时间畀我去检讨，再有时间畀我去成长，所以我唔会觉得系生不逢时，我觉得呢个系我学习嘅模式。”

《鳄鱼之吻》
主办机构：棋人香港、MakerVille、光尚娱乐、热烈工作室、VaB Production
出品人：钟楚霖 / 鲁庭晖 / 叶念琛 / Rafael Mendonca
导演：陈焯威
原创故事，编剧：叶念琛
监制：周怡
领衔主演：谈善言、袁富华、梁仲恒、Gao@COLLAR
演出日期：2025年11月1-2日、11月4-7日
演出时间：2025年11月1-2日（3PM / 8PM）、11月4-7日（8PM）
演出地点：香港演艺学院歌剧院
演出票价：$788 / $688 / $588 / $488
公开发售连结：https://cultural.cityline.com/tc/2025/thewinnertakesitall.html