由游学修、许贤、苏致豪主理的YouTube频道“试当真”一直深受网民欢迎，但半年前已预告昨晚（26日）正式停运，最后一夜的告别直播以“官方正式结局”为主题，直播中一众成员尽诉心中情。尽管观众不舍，但睇完直播似乎就会明白，结业或许是对饱受压力的众人最好的决定。

三位都是第一次做老板，经验不足、处理有时未够成熟也是绝对可以理解，除了编剧兼导演Ellen公开对质的一番话，反映出内部沟通有矛盾外，从豪哥的痛哭自白也知道他压力不少。

饮大两杯的豪哥情绪到来，全程闭眼讲感受，他先多谢两位拍档，又说：“我觉得你哋两个系好需要多谢嘅，系真系嘅，但系因为你哋个野心系比较大啲，你哋……愿意承担嘅嘢多啲，但系我……我决定得好清楚，我想要自由多啲，我需要自由，冇自由我搞唔掂。”他透露自己在执笠前两个月仓卒地请了假，解释自己顶唔顺，更痛哭表示：“太复杂，太复杂，世界太复杂，同事们太复杂，唔知点解会咁复杂，明明个live好明显见到，一定系好爱先至会咁复杂，然后唔知点解个爱会变成咗单单打打、憎恨，但系又会爱返，我处理唔到，我处理唔到。我好贸贸然咁就请咗假，开始倾执笠，然后好挣扎啦大家，但系阿修讲咗句就系，谂吓Instinct系咪其实真系执咗好啲？大家都觉得系，咁所以就有咗呢个决定。”

他深深叹了一口气，并谓：“呼～好多谢咁多位同事，咁‘飞哩啡呢’我已经唔敢擘大眼睇大家，我觉得都冇笑话讲，差唔多起歌，我自己就凭歌寄意，希望我仲记得啲歌词！”声称要“追原Key”的豪哥，就含泪唱出早前在《试当真白金像奖》唱过的饮歌《我的快乐时代》：“毫无代价唱最幸福的歌…愿我可～”而除了这段声泪俱下的自白，他在过去的访问中，曾透露在2023年已想过执笠，自己根本连想轻松都轻松不了。

当人少少，“家庭式管理”或许凑效，随著规模愈来愈大，很难再这样营运，而老板游学修在毛记电视“国家级高峰会”中就分享过做老板的难处，搞YouTube跟开餐厅或普通一间办公室不同，“通常返工好憎听呢句嘢，但系就系我觉得系佢系一家人嚟嘅，佢点都有一家人嘅成份喺度，多与少嘅啫。佢more than同事嘅关系之下，你唔能够好似重组一间公司，或者我哋有问题就解雇一啲人，或者我哋掉咗啲旧嘢，或者我哋点样生一啲新嘅嘢，其实唔系咁简单，佢始终已经系一Team人，𠮶Team人去处理一啲嘢嘅话，有啲嘢我行到去𠮶一步，我就觉得自己经验又好，或者文化，或者乜嘢我觉得我解决唔到。”

他直认五年来一直做不好的，就是公司冇规矩。人少可以冇规矩，当人多开始想订规矩去管理，通常都是不愉快收场。加上员工做创作为主，性格都会比较“艺术家”，不在乎观看次数，只希望做出自己心目中的作品，游学修曾言：“我𠮶边多艺术家，就算佢出到嚟网民𠮶边，佢唔达标，佢唔care。原来view数唔得、like数唔得，唔care。”

其余的试当真幕后亦在“执笠纪录片”中坦诚分享自己的感受，如导演吴兆麟（Nero）就觉得这里似上庄多于开公司，L.d发曾说：“我觉得系试当真做嘢系越嚟越唔开心嘅，我觉得好闷，当然大家都开心过。（开心𠮶时同后来有咩唔同？）有咩唔同？呀……好似大家都开始有种唔想返嚟嘅感觉。”他认为试当真一周年时关系最紧密、气氛最融洽，就算校花校草时期都仍然很密切，但后期就开始疏离。他说：“因为我自己系一个敏感嘅人，我自己冇咩唔开心、冇咩唔满意，我系感受到身边嘅人唔开心，咁我就唔开心。”

至于“试当真”首个员工兼摄影师火柴也直指公司好混乱，为了不要令众人最终反面收场，自己都想公司执笠：“好X混乱呀呢度！管理啦，啲嘢又执得混乱，系统超混乱，系咪搞唔到？未必，要将佢变成井井有条嘅话，要花几多力气、时间、心神同埋花几多友谊呢？我发觉个牺牲太大，其实佢哋就系唔想大家日后会有嗌霎，我觉得佢哋用紧公司嘅流量、名利去换返友谊。”负责总结试当真最后直播的他，眼看Ellen与游学修如此坦荡荡，他亦道出了试当真的问题症结，形容自己如公司润滑剂，总在协调彼此的磨擦，“有时谂，试当真点解要完结，有时有啲嘢可以私底下解决，但多咗观众的话，好多嘢好难解释，五年间好多事发生，讲错咗好多嘢，伤害咗好多同事，已经造成咗，除咗多谢观众支持，仲有执咗笠之后，作品完，我哋旅程同埋关系上解决嘅嘢仲未完，所以我想观众畀呢个空间我哋试当真，去解决五年积落嚟未解决嘅嘢。”讲完之后，他哽咽唱出陈奕迅《最后派对》︰“活得精彩结尾 切勿流眼泪 来让我诗歌班里 悄然沉睡 这是自然程序 开心的派对 散后无法聚 我于烛光里 祝福一句句 ～”

而创作出《墨鱼游戏》系列的试玩毛导演Casper坦言，制作《墨》期间出现手震、麻痹、发冷等症状，有一两次甚至觉得自己快要猝死，症状在拍完《墨》半个月仍挥之不去，绝对想像到创作一部超人气作品的背后，压力大得把他整个人榨干。他指：“佢哋话如果电视台拍个咁大型嘅project，至少五个导演，每人负责一个project，之后仲有个监制睇成件事，一个人冇可能拍到。到后尾就发现‘系呀，原来冇人会咁样拍嘢’，我都太苛刻，可能一直以来太苛刻，试当真真系黐X线，真系证明到啲冇可能做到嘅嘢系有可能做到，但系就会chur干你。”

Casper引用电影《8号出口》的对白“见到异像你就要返转头”，他落泪表示：“见到异像你就要返转头，好多人就就系困咗喺𠮶度呀嘛，我嘅异像就系剪片，但我不断循环咗好多年，喺呢度五年啦，之前十年啦，所以𠮶套戏就系话畀你知，见到异象就要转头走，唔好再行呢条路！我希望我一世都唔会剪片，由呢一刻开始，我希望我一世都唔使剪片，剪埋呢个游戏之后……”从他说话的语气、表情，明显感受到他承受住巨大压力，令人心酸。

早前游学修女朋友陈苡臻（Jessica）在《试当真白金像奖》上发表感言：“结束对佢（游学修）嚟讲都系一个relieve、一个解脱，所以容许我讲一句，执得好！多谢！”外人听到或觉得很惊讶，但作为游学修身边最亲密的人，相信是眼见男友承受住不足为外人道的压力，才会宁愿他把一手创立的公司关闭，换回精神和身体健康。而看完众人的“执笠感受”后，相信会更明白为何Jessica会说“执得好”。