镜头前，COLLAR队长沈贞巧（Gao）总是元气满满，用笑容、得体对答和富有力量的舞姿撑起团队。但撕开队长标签，“沈贞巧”这个名字，承载著外人看不见的脆弱与挣扎。出道三年多，Gao首度演出舞台剧《鳄鱼之吻》，也是她罕有地以个人身份将内心的挣扎剖白于人前。
Gao曾说过，加入COLLAR后让她更看清“现实”，首当其冲的，就是网民对她外貌的无情抨击。她虽感不解，却也曾因标签而质疑自己：“吓？你系咁话我样衰，咁点算呀？咪冇人揾我做嘢啰？”不过更大的心魔却是怕“拖后腿”，她深明自己得到的机会比人多，但也怕自己进步不足抓不紧这份机遇：“作为一个观众，我唔会想畀钱入嚟睇你惊。”
身为家中独生女，从小生活美满的她没有长成那种骄纵的温室小花，反而成为了团队能量来源和大姐姐，究竟为什么？Gao少有深谈家庭，忆述妈妈曾患病、自己需与爸爸扛起责任的过去；更自揭初恋遭遇背叛，令价值观一度崩溃，花了五年才能走出。
服装：Isabel Marant & Zara
鞋履：Charles & Keith
形象：Cedric Cheung
化妆：Jenny Fung @powderclub_hk
发型：Ricky lam

曾对外貌评价感不解　担心因而令工作机会流失

Gao曾在团综说过，加入COLLAR才让她看清了“现实的世界”，而第一课，就是网民对她外貌的评头品足，“普通一个人行喺街度，No one care嘅时候，冇咁多judgement，冇咁多人同你讲呢样讲𠮶样；但系反而你企咗出嚟，然后有好多人对你评头品足，呢个系我第一个见到嘅现实位，我都会好不解。”她用一个贴地的比喻去形容这种荒谬：“喺我嘅眼中，无论系so-called artist，或者明星，或者点样犀利嘅人都好，其实对我嚟讲佢都系一个人，同我喺街上见到嘅一个人咁样，对我嚟讲系一样嘅，大家系平等嘅。Artist其实系一个职业嚟咋嘛，你都唔会无啦啦喺街度闹一个sales‘你生到咁就唔好企出嚟做sales啦。’你唔会咁样讲佢㗎嘛，但系点解artist呢个职业就系要俾人去评头品足咁多嘢呢？”

这些尖锐的批评，曾是她心里的一根刺。尽管不解某部份人为何有如此大恶意，但当问到曾否被打击到，她坦白回应：“话无都系呃你嘅，都一定有嘅，我有谂过，‘吓？你系咁话我样衰，咁点算呀？如果真系喺大家眼中咁样衰，咪冇人揾我做嘢啰？’”团队中各成员都有自己的优势，但市场准则睇女团，第一眼必然“外貌协会”行先，苏雅琳（Ivy）或王家晴（Candy）这类外型甜美的“偶像向”成员无疑较吃香，问Gao曾否因此感受伤，她坦言并无妒忌之心：“如果系呢方面又真系冇嘅，因为我会觉得，唔好话你哋，譬如Ivy，我望住佢我都开心啲啦！同埋熟咗玩起上嚟都真系好好玩，我都好钟意佢。”

然而，她亦非常清醒地分析自己的蚀底之处：“如果你话喺自己思考呢个现实层面上面，我就真系会思考，我个样可能真系争啲，喺呢个观众群里面，可能佢哋会觉得我唔够靓，即系纯粹佢哋觉得咁样，会唔会真系影响我嘅生计㗎 ？会有啲咁嘅少少疑虑。（生计系咪指广告数量？）机会上啰。”COLLAR的团魂远超想像，所以Gao确实从不会与队友比较，但她不讳言也会有慨叹的时候，“有时候，可能某啲人，咁啱𠮶阵时有工作，就会特别忙碌，或者冇得出席（聚会），或者我哋嘅见面嘅时间少咗，咁我就会慨叹我哋见面嘅时间少咗啰，会戥佢哋开心，但系我哋可以聚埋一齐嘅时间又少咗喇，会更加珍惜𠮶个一齐嘅moment。”

为不自信而躁底　怕进步太慢拖COLLAR后腿

外貌焦虑只是表层，Gao心中还有更大的心魔要应付，那便是“能力”上进步得够不够快。COLLAR挟著《造星》声势加MIRROR师妹光环，未正式出道已备受关注、赢在起跑线，公司提供资源为成员出了一首又一首团歌，开到两次大型演唱会，每人都获得唱歌、演戏、主持等等机会，绝对非常幸运，不过Gao亦有隐忧：“呢个行业现实嘅一个位就系，佢嘅速度好快，好快就会话畀你听，你未够！个波嚟到嘅时候，如果你接唔住，你后面就会有好多迹象话畀你听‘你唔得㗎喇。’你可能会失去好多机会，而你而家失去一啲嘢，可能之后都冇而家呢个moment咁容易可以攞得返返嚟，呢个现实就系令到我急速想要进步嘅一个动力，同埋系一个令到我更加珍惜我身边𠮶啲好Pure嘅人、事、物嘅一个好大嘅心，好想保护𠮶啲嘢。”

比起那些对外貌的评价，Gao认为真正会把她击倒的，是演艺才能的不足，“譬如唱歌，我会惊自己会唔会拖后腿，如果今次都仲唔做好，其实真系讲唔过去，我自己会咁样谂。”这种焦虑，在COLLAR演唱会上的Solo环节表露无遗，当晚其余六位成员各自都有Solo环节，然而去到演唱会尾声都未见有Gao的独唱歌，记者当晚在台下都曾担忧，Gao是不是被因为外界对其歌艺的批评而胆怯、不敢再唱呢？不过原来她选择在后台献唱，萤幕上直播这片段，观众都看得眼湿湿。她感谢导演细So安排，觉得这种表达方式很聪明，不过就透露自己其实“躁躁地”：“我躁𠮶样嘢系，‘喂，沈贞巧，第三年喇㖞！唔可以因为自己嘅惊就（冇自信）’作为一个观众，我唔会想畀钱入嚟睇你惊，如果啲人话，‘佢已经进步咗好多啦，好Proud of you！’其实我会觉得如果我系观众，我系你哋，我就唔会咁样氹呢个人，我就会expect我畀得千几蚊入嚟，我就要睇一个好有Confident嘅表演！我今次目标都系咁样，我已经好躁我自己，点解次次都唔能够喺呢个范畴里面，摆自己最有自信嘅一面出嚟？今次Kind of有少少冲破咗我嘅恐惧。”

为队中最高能量成员　非关队长身份：唔想大家一齐冧

演唱会上的短片中，Gao一番话“我好多嘢好惊，不过你哋唔觉咋嘛，其实我好多时候都系所有嘢都系顶硬上，硬着头皮去做”让人见识到她的脆弱，外界看Gao，总是能量爆棚，演出有爆炸力，仿佛永远不会疲倦，问到是否因为做队长，所以不能示弱，再累也得咬著牙关死顶，她却澄清COLLAR运作模式并非如此：“我哋嘅团好得意嘅，我哋虽然有个队长喺度，但系我觉得我哋好多嘢都系共同分担。大家都有呢个队长心态，大家都好知道呢个团里面，系唔系队长都好，如果有一条友冧，有一个人突然间脆弱起嚟，其他人系会即刻去帮手扶起佢，而唔系大家一齐冧啰。”

平时有睇开COLLAR的IG和私下互动，会发现Gao有如团中的照顾者、纪录者，不抢镜头，反而是爱拍下成员间的片段，而且做访问时有难以招驾的问题都由她回答，又会为队友提供满满的情绪价值，她承认自己的确能量较高，拍剧通完顶可以照去排舞，队友都指出：“好少见到阿Gao好攰。”这份能量并非强装出来，而是源自团队：“其实我返到去同佢哋排舞，系一个好舒适好放松嘅状态。我觉得都唔关队唔队长事，纯粹系大家相处舒服，返到去就自然开心，就自然唔会冧。”而另一力量来源，Gao表示是生活十分美满，家人、男友、狗狗全部都能给她力量，每次相处都仿佛充了电一样。

独生女却非温室小花　曾历母亲患病及初恋男友背叛

尽管如此，Gao也曾有过挫折和磨练，她是家中独生女，万千宠爱在一身，但她却丝毫不像温室小花，相反却常常在保护别人，Gao认为这也源自家庭的经历，她先讲儿时美好的岁月，其母亲是主妇，凑女全部亲力亲为不假手于人，不论去到哪儿都不会放低女儿，Gao直言：“我觉得呢个陪伴对于细细个嘅我嚟讲，系build up咗一个好好嘅心理状态。”然而后期母亲患病，父亲不得不承担起多一份责任去照顾这个家，而阿Gao当然都要帮爸爸手，一同撑住妈妈，“所以我同我阿爸系𠮶啲‘好兄弟’咁样嘅状态下，大家好互相理解。”正因为家庭太幸福，令她初出社会见到人性丑恶和阴暗面，冲击特别大：“我屋企实在太有爱，比我见到嘅全部都系好美好嘅嘢，所以大个咗之后出到嚟，有喺现实社会听返嚟嘅故事，或者自己经历嘅故事，都曾经令到我好崩溃。我会觉得，点解呢个世界咁样㗎？会有咁样嘅moment，都崩溃过一段时间，但系我都几庆幸身边遇到好多好好嘅好朋友，譬如芯駖就系其中一个啦，喺我一啲好worse嘅情况同阶段𠮶度，佢都陪咗我好多。”

她提到生命中一次重大打击，是被初恋男友背叛，以往她目睹父母亲的爱情都是不离不弃，以为每段爱情都是童话，殊不知第一次拍拖就幻想破灭：“我嘅第一个男朋友就系会偷食𠮶啲，我会觉得点解要咁样对我呀？我相信好多女仔后生啲都会曾经有个咁样嘅谂法。”她坦言，那次之后用了足足五年时间，才真正放低和看开：“断断续续，真系真系完全放低睇开晒，我谂都用咗五年时间。”现在回想，这些曾经使其世界崩塌的画面，根本“no big deal”，“同埋我而家理解就系呢啲自我价值，其实全部都系喺自己度，呢样嘢系自己三观、心态摆正，其实就冇乜嘢需要惊。”

首挑战舞台剧　藉演戏爆发平日压抑情绪自觉好爽

Gao从不把私人情绪带到工作，甚至为顾全大局而自我束缚，而演戏正好成为了新的出口。今次她获叶念琛导演选中，于舞台剧《鳄鱼之吻》特别演出林小美一角，据知试镜时叶导演跟Gao聊天后，发现她很符合这个角色，她最记得导演问：“你觉得演戏对你嚟讲系有咩感受？”Gao当时不假思索，只直接回答：“演戏对我嚟讲好爽呀！”

这份“爽”，正源于她平日的压抑：“因为我自己日常入面嘅我，沈贞巧呢个人，系比较将自己嘅一啲情感、各样嘢摆得好后，但系我又其实系一个内底里非常之感情嘅人，好似有好多嘢我都会想顾咗身边嘅嘢先，例如身边啲人啦，身边嘅事发生紧啦，可能我返到去都仲要照顾我啲狗，呢个都系一个顾虑，好少可以好无顾虑咁发晒我啲情绪出嚟。”而演戏正好可以把这些被按捺著的情绪带到剧本，甚至有一些经历跟自己类同时，她可以大条道理把对白讲出来，这些都是一种纾压方式。

感谢梁祖尧启蒙　盼被观众看见共情力与感染力

Gao虽然演戏经验不多，但她在《冰上火花》、《出租大叔》、《麻甩妈咪》表现自然，不似新手，她认为很难说哪一位特定人物教得她最多，不过《全民造星IV》导师梁祖尧就绝对是启蒙老师：“因为𠮶阵时《造星》第一round其实我喺淘汰区㗎啦嘛，系佢见到我嘅 potential，带咗我返嚟，然后佢kind of系第一个开咗我对戏剧眼界嘅人，而且佢对剧场𠮶个热诚同埋执着𠮶个理念，都几影响到我so far一路走来嘅演出嘅心态，所以我非常之感谢阿祖。”

Gao在剧中饰演初出茅庐、仰望著某些偶像、对演艺事业充满憧憬并且渴望得到成就的新星“林小美”，这部份与本人甚是相似，不过亦有相异之处，就是林小美比Gao冲动：“有一啲冲动位，我未必会好似佢咁直接就去做一啲决定，我可能会思考好多先去做决定，但系我系好钟意林小美呢个角色，因为我好钟意呢份Pure，呢个Pure嘅情感都系提醒返我，有时候其实唔使谂咁多，有啲嘢试咗先，做咗先，for自己嚟讲都未尝唔系一件好事。”

舞蹈强、能量大，这是大众已知在舞台上的COLLAR队长阿Gao，但卸下队长装甲，她分享了一个更深层、更不为人知的“沈贞巧”特质，这亦是她希望被看见的一面：“我觉得自己个表演入面嘅共情，比人共情到嘅能力系几强，即系可能触动人嘅𠮶一个情绪或者感受，或者𠮶一下令到佢哋觉得有被同理到嘅能力，原来我都有喺度㗎㖞。所以，可能我可以摆多少少呢一面出嚟？”有别于其他“硬件”上的能力，这个特质可能要透过聊天、倾谈才会发觉，不是那些一眼就看得出来、或是从作品中能轻易呈现的优点，不过阿Gao就表示：“我就算有呢个能力，但我唱一首歌，可唔可以Touch到人，都要睇我唱得好唔好听㗎嘛，我觉得各样嘢慢慢提升紧嘅时候，我发现原来我嘅呢个能力都颇大，可以试吓发掘一下另一个感染力！”