森美今日（7/11）现身电视城出席无线节目《唱钱》开厂拜神，对于有指男团MIRROR将会缺席今年叱咤颁奖礼，全体12人均不会出席。森美表示：“其实歌手嚟唔嚟到，歌手系会有自己嘅原因出唔到席，当然我哋希望每一个歌手都能够出席，就算佢哋出席唔到，而佢哋有奖，都可录音又或者用视像，等大家喺现场度感受到佢得奖嘅喜悦。”

森美续指：“其实讲到奖，我哋就会以播放率计算，到完结点算就决定咗，过去咁多年叱咤唔会因为你缺席而影到我哋颁奖嘅结果，除咗《我最受欢迎》就会现场投票，结果亦唔系我哋决定，系现场观众决定。咁所以奖项佢哋攞唔攞到，又或者点攞，又或者佢会唔会嚟攞，都唔到我哋决定。”

有传MIRROR不满商台减少播放他们的歌曲，打定输数冇奖攞而选择缺席颁奖礼，森美笑言：“好多时候有啲歌手自己计算系未必啱嘅，试过有一两次，有啲歌手好有信心计过播放率好高，点知自己计错咗。（播放率会唔会系内定？）几时都系内定。因为每日播咩歌系我自己内定咗，不过我就唔知电台节目佢哋播乜歌。专业推介最有趣嘅地方就系我主持播自己喜欢嘅歌，我哋同事之间系冇话你播咩歌我哋就唔播，咁所以系内定咗自己所喜欢嘅歌，呢个就系我哋颁奖礼最特别嘅地方。变咗真心希望歌手佢哋唔好计错，因为计错唔嚟就好唔抵啦。”

问到计算播放率透明度有几高？森美表示：“透明度系好高，因为每日都会听到，只要你每日听晒就得啦。当然亦都有人听漏，同埋其实我哋播咗就系有。（你哋系用人手计算？）系，因为每人每日播一首歌，我哋都要填写IFPI，我哋要作记录，因为呢一样嘢系我哋嘅守则，每一个节目每一首歌，当每一首歌到达某个播放时间，我哋就要填写，因为我哋要畀返版税相关作歌写歌歌手嘅人士，咁所以呢个系必然嘅，因此我哋有一个好好嘅系统已经用咗几廿年，系畀我哋计算边一首歌播放咗几多次，有相关嘅数据喺度。如果播半首歌我哋都会填写，但如果万一只系播得两三句，咁𠮶啲我哋就唔会写。”