英皇娱乐集团营运总裁、英皇（北京）文化发展有限公司CEO霍汶希（Mani），金牌经理人地位毋庸置疑，近日她接受周国丰YouTube节目“国丰百科”访问，分享自己对“成功艺人有什么条件”的见解：“最重要自己一定要本身有一个好大嘅上进心，佢要赢，佢要成功，佢要成就，因为如果你冇呢个火，我㧬你系点㧬都㧬唔郁。第二样嘢就系佢本身自己系要有个主动性，好积极去令到人家，我公司铺路俾你，搭桥俾你，去俾你有机会表现俾人睇，俾多啲人看见你，但系被看见嘅过程里面，你自己积唔积极去俾人看见，同埋自己有冇一定程度上你自己一早已经有准备，你俾人看见但系你又冇准备好，有啲艺人一个大嘅舞台俾咗你，你走音，咁就一世喇！当然第三就系勤力，不过系第三个咋，因为而家咩人都勤力㗎啦，唔勤力根本就做唔到呢行。”

之后Mani又讲到天后容祖儿，两人情如家人，祖儿虽然面对社会已成熟不少，不过内里依然童心未泯，爆了对方不少乌龙事。不过，当初她要签容祖儿做旗下艺人，绝对是乘风破浪、披荆斩棘，因容祖儿当时的唱片公司撤离，但仍跟卡啦OK老板娘有经理人合约，Mani要说服老板将她罗致旗下：“你要有个信念佢一定红！佢一定掂，如果唔系我花咗咁多方法，我冇呢个信念点会咁披荆斩棘同埋咁乘风破浪搞到佢做我哋第一个重点嘅新人呢？（点解咁觉得佢会红？）直觉！第一个性格非常好，同埋我一直觉得佢唱歌真系好好，佢一到唱live嘅爆发力，系我见过嘅新人里面，冇乜几个，同埋我好相信观众缘，我都同任何人讲，佢初初入嚟真系唔系靓，我揾唔到边度有个艺人摆喺度俾我睇，我揾唔到，但系佢𠮶种感觉就系佢系一个邻家小女孩，但系当佢日渐发展越来越好嘅时候，其实佢只眼好有灵气，好有光彩，慢慢自信心一变，啲星味就出晒嚟。”

容祖儿刚出道时，经历了不同的是是非非或别人的质疑，Mani与她的经历源自于大家信任，一个眼神、一个沟通已搞掂，对方也无条件信任公司的安排必然是为她好：“好多时人与人之间嘅信任，你会减少咗好多沟通嘅成本，亦都系因为一个信任，令到大家有一个能量，同我哋自己讲‘一定得嘅！’”讲到祖儿入行以来最大樽颈，Mani指必然是声带生茧，使她非常绝望：“最惨最惨！我系要陪佢瞓，因为佢好惨，我希望喺佢屋企陪佢瞓同佢倾吓偈陪吓佢，佢情绪好低落。当一个人觉得人生里面剩系得把声，呢个系我嘅资本，亦都系我天生能力里面唯一一个我最叻嘅嘢，我都冇埋啦，我都完结啦，𠮶种绝望系明嘅。”幸好经过针灸、医治，容祖儿的声带慢慢好起来，现时她仍然不断做运动、每星期去学唱歌，是对自己有要求的人，Mani觉得其成就绝对是值得拥有。

英皇有很多艺人都对公司非常忠心，甚至入行后冇转过会，Mani认为秘诀是因为老板杨受成博士像个精神领袖、家长一样，“我哋就好似家人，我成日都讲一样嘢，我亲身经历咗好多唔同嘅转变，佢话唔系靠艺人去揾钱，而系啲艺人有能力做一啲衍生品，或者生一啲project出嚟揾钱，唔系靠抽艺人嘅佣金。总之个艺人会觉得，公司唔系抽我好多佣金，但系全面嘅所有service又好、保障又好，好多嘢都系好到位，同埋艺人亦都会感受到公司系点样用心去培养佢或者帮佢护航。另外仲有啲我自己亲身经历嘅就系，我眼见，讲真红同唔红，大红嘅有好多，学你话斋，高高低低，艺人出咗事、有问题，突然间插水，我都系见到我哋公司嘅老板系不离不弃，一样系咁样支持，一样谂方法点样教佢，同埋点样解决事情，呢样嘢我觉得系……老实讲娱乐圈系好现实嘅，你一沉就百踩，你一出事就划清界线啦，同你冇朋友做啦，你估我见得少咩？我都见好多，但你谂吓如果艺人出事都要揽上身继续同佢并肩作战，呢间公司点会留唔到人？”

而Mani自己都一样，32年来任职同一间公司，她觉得自己心态就跟艺人们一样，觉得公司不离不弃：“当一个新人入去做一个行业，好需要有人去培养你，俾机会你，我觉得老板真系花咗好多精力培育我之余，仲介绍好多人脉俾我，我喺呢间公司亦都好开心，我好记得我有几次嘅加薪，我冇要求过自己加薪，系佢自己加俾我，佢觉得你应该有咁嘅人工，我真系冇讲过要加薪。”