现年37岁的“妹头”卢颂恩活跃幕前多年，近年孖李尚正主持的《卧底旅行团》系列深受观众喜爱。妹头中学时期入行做靓模，之后加入电视做“十人巷”，做过新城电台、商台，今被称为“HOYTV一姐”，由“妹头”升级做“妹姐”，妹头笑说：“我纯粹年纪上系阿姐，‘阿姐唔好阻住条路！’𠮶啲阿姐！”

7岁爸爸患癌离世

妹头7岁时爸爸患癌症离世。“𠮶时太细个，唔知咩事，净系见到佢推出医院，爸爸走啦！唔系好有感觉，过咗几年见到妈妈啲相，佢个样系灰咗，好唔开心，咁早就冇人陪佢。”任职会计的妈妈独力凑大两姊妹，妹头自小生性，负责煮饭照顾家人，家姐在学校暗中照顾妹头，家庭气氛温馨。身为“开心果”的妹头年纪小小已充满表演欲，面试过教育电视，“细个钟意睇港姐、郭富城跳舞，我会喺电视面前跟住做，我会攞被扮港姐，姨妈姑姐睇住喺屋企环绕一周。”

被一眼相中模特儿出道：一签就签咗5年

中学时期兴起摄影，妹头获邀做模特儿，写真流传至讨论区，一间模特儿公司见到，妹头“胆粗粗”上去见工，获老板一眼相中。“女老板见到我倾咗约几句，佢话几好㖞，有冇谂住入行？有兴趣就畀5年时间我哋啦！咁一签就签咗5年。”妹头在模特儿界展现天赋，曾赢得动漫节Game Girl、柠檬茶模特比赛、OL和酒店亲善小姐大赛冠军，吴雨霏和李灿森担任评审。妹头想起时忍俊不禁说：“赢咗2000几包柠檬茶，俾阿妈闹点解带咁多柠檬茶返嚟，结果大部分送晒畀楼下茶餐厅。”

大学毕业收入达6位数

妹头妈妈曾经担心妹头被睇蚀，但妹头笑言：“冇嘢俾人睇！”不少人揭露过娱乐圈黑幕，妹头却从未试过被“问价”：“细个成日听人讲行内有人问价，但我一打开Inbox，点解冇嘅？唔系呀嘛！啲Model朋友成日拎出嚟讲，推咗好似好清高咁，但我一个都冇！”加上有两位女老板的保护，妹头从未接触过闻风丧胆的“潜规则”。妹头曾考虑入读演艺学院，但为了尊重妈妈意愿，最后选择了理工大学时装设计专业时装荣誉文学士课程。妹头一边返工一边从事幕前演出，广告、出骚、讲波、做Dancer，去到大学毕业，收入已颇丰，“有时有6位数，有时冇。以前有本簿，一格格写返有几多钱。”

妹头做过舞者，公司改艺名“卢盈希”，原有机会女团出道，后不了了知。妹头毕业后再攻读市场营销，想过转行，但因演艺事业太忙，还是拣了做艺人，她说：“未试过返写字楼工，都系一个遗憾嚟，我觉得返写字楼工应该都几有Feel、几好玩。”

参加《十人巷》森美“袋钱入袋”：做呢行要有自己性格

妹头第一份在主流媒体工作是参加《十人巷》，节目导师有陈志云、杨千嬅、周柏豪，森美大哥为她改了“龟仙人”一名，循循善诱道：“做呢行要有自己性格，如果吓吓都随波俗流，我哋点解要你？”妹头难忘首周被雪藏，因“拣嘢戴”被斥态度不佳，“Stylist畀咗啲嘢我，我觉得唔系好衬，问可唔可以唔戴呀？就令人觉得我‘搞错呀？系咪拣嘢戴？’后尾我谂返，系㖞，呢个系人哋专业，我唔应该挑战，学到要信任团专业嘅意见。”

100人脱颖而出主持有线《南非世界杯》

模特儿公司完约后，2010年，妹头直接加入有线电视，主持《南非世界杯》。妹头忆述当时入有线见工场景：“𠮶时厂有100个女仔，对镜头讲足球资讯，后面有监制睇住，最后拣咗我入去试。”签了两年合约，每场骚计算酬劳，“5位数都有嘅。”“白纸”一张入去讲波，妹头食饭都要“恶补”足球赛马知识。“食饭都要睇报纸话Highlight，了解吓比赛发生咩事、形势如何，球星发生咩新闻，唔通坐喺度白逗人工咩？冇可能！”妹头感激有线遇到的师兄师姐都充满人情味，常“交波”给妹头发挥，“见到我一个新新哋嘅女仔，点都畀啲机会佢啦！佢哋会问我：‘妹头有咩意见呀？’我就将功课一轮嘴讲出嚟。”

讲波挨更抵夜是常态，凌晨2点半开波，11点要返到化妆Set头，12点要讲前哨战，开场前半小时再要暖场，期间不断要温书，妹头形容是“融入生活”，“欧联讲完出嚟都朝早5点半，一出嚟哗，个天又唔系光得晒、又唔系黑得晒，个画面系好空虚。但𠮶阵7点钟又要去港台做主持，5点钟收工，夜晚又准备拍。𠮶阵个循环就系咁，24小时年中无休。通常有时夜晚10点做完节目，2点再开咪讲波，中间𠮶两个钟就喺厂度瞓。”

任《新香蕉俱乐部》接线生塑造“玩得”性格

妹头于23岁获杜浚斌（Ben）拣中，加入新城电台做《新香蕉俱乐部》做接线生，另外两位主持是林盛斌 （Bob）、范振锋（Ricky）。原来做接线生都有技巧，“要听吓当晚内容有冇重复，例如三个都系爱情故事咁咁就要转吓；同埋要听对方语气，佢系真心问主持意见，定打嚟玩吓㗎呢？都试过俾主持话接得唔好，下次唔好接呢啲啦！”9个月后终于可以开咪，多得三位前辈畀机会，“初时匿埋后面筛选边啲电话可以嚟入直播，佢哋会突然捉你入嚟讲两句，报吓天气，畀机会你。”《新香蕉》塑造了今妹头开朗又“玩得”的性格，“佢哋会话：‘开咪系咁㗎啦、做节目系咁㗎啦！你咁拘谨返去影硬照啦！’”

拣定做综艺娱乐劲忙：成个月飞日本拍节目

讲波、综艺、DJ，长期“多重身分”令妹头吃不消，有一日有线高层睇中妹头，邀请她做综艺节目。妹头顺利获体育台监制放行，一做十多年。“当时循环得太多年，人生会‘凋谢’。我就谂住不如拣定一个轨道啦，就拣咗综艺娱乐，专心做，Cut咗其他，就舒服咗。”

“讲波同旅游节目两样嘢嚟。讲波系regular，唔使担心咁多嘢，熟习咗联赛就可以应付到表面；旅游节目成日有唔同突发，吸引力就系你可以成日睇到唔同嘅景象，你个人嘅能量就会Keep住不断咁高、年轻咗！”拍旅游节目不比讲波轻松，妹头忆述：“有一次日本拍铁路游，头半个月返嚟落地摆低个喼，返嚟录其他节目嘅VO，跟住返屋企换个喼，第二日又飞返日本，成个月都系咁。”现在出Trip，妹头试过一个月“密集式”出4、5个团。

拍《卧底旅行团》多年，妹头遇过不少惊吓事，最难忘内地浸温泉遇白色脚皮，“吓到嗌唔到出声，好似撞嘢咁，走啦走啦！”有没有被内地导游“凶过”？妹头指对方见到镜头不会太恶，“最多都系眼神黑面，‘又唔买呀？咁你跟团做咩？’（熄机𠮶阵呢？）我哋唔熄机！”

同李尚正拍《卧底旅行团》劲细胆

妹头与李尚正今关系已“升华”为老拍档，虽然不时有观众为温和的妹头被阿正恰“戥不值”，但她不认为两人存在“上下把位”，“唔会长期俾佢玩弄，有时我都会趷吓佢！”一个勇敢，一个细胆，妹头笑指阿正节目中的“英雄救美”，也是他刻意营造，“佢特登捕捉呢啲场面，等你惊吓先，先出手救你。反而啲Crew成日出手救我，唔知点解天生又惊高又惊水，阿正又好大胆，成日话‘有咩好惊！’但我内心颤抖，唔通又发出嚟咩。”

获封“有线一姐”：年纪上系阿姐

网民戏称妹头为“有线一姐”，因她是现今唯一合约女艺人，对此妹头幽默笑说：“有多个女艺员入嚟，我即刻变咗二姐。我纯粹年纪上系阿姐，‘阿姐唔好阻住条路！’𠮶啲阿姐！”问到为何选择深耕有线，她说：“唔系我拣有线，系有线拣畀我喺度咁耐。因为冇其他台认真邀约我，呢度又Ok，咪做咗咁耐。”会否担心曝光率不足？妹头看的很豁达，“有得做已经好开心。你去大啲嘅平台可能会多啲人睇，但有冇得做先？要睇天时地理人和。”同样，拍《卧底旅行团》这么久，妹头坦言有线没有收视压力，“有人睇系Bonus，冇人睇都唔会灰心，我就系一个咁嘅人。唔会话有件事要做到最轰动，有就做到最好，结果交畀呢个世界。”