由风车草剧团主办的音乐剧场《偷偷记得》，昨晚（7/12）上演最后一场。《偷偷记得》剧情主要讲述一个人在无法避免突如其来又无声无色的告别时，如何找到希望和面对这些回忆。适逢香港面对大埔火灾这个巨大灾害的时刻，梁祖尧、汤骏业（AhDee）、邵美君及岑宁儿（Yoyo）要演绎如此贴近真实世界的故事，众人都有著不一样又难以忘怀的感受。

身为编剧的阿祖表示，今次创作《偷偷记得》是想给大家一个抒发情感的出口，但没想到他与团队都一同被治愈。“我哋成班表演者、台前幕后都系香港人，大家都为大埔火灾呢件事而十分难过，但系我哋正正就系喺呢个故仔里面，都揾到我哋自己嘅出口。我亦都希望用呢一个谂法去带俾观众，同大家同呼同吸一齐感受，同埋一齐去开解大家，陪伴大家，一齐去挨过呢段艰难嘅时刻。”

AhDee都十分认同阿祖的讲法，更道：“大家有啲情绪积住咗，今次可以透过呢个戏释放出嚟之余，同时亦令到我哋觉得我哋剧场除咗搞笑之外，亦都可以有治愈、疗愈嘅能力。”首度演出舞台剧的Yoyo，亦是被疗愈的其中一员，她道：“《偷偷记得》好吻合本身最近要面对嘅呢啲情绪，帮助我作为表演者喺呢段时间去面对同埋处理呢啲感受，俾咗个出口我，同埋藉著我比较擅长嘅唱歌，去面对呢个生命课题。”网上不少留言都表示，听到Yoyo演绎〈细水长流〉、〈尽力呼吸〉及〈致明日的舞〉等歌曲时，感到释怀。

相比其他演出，剧场从来都与观众份外亲近，众人在今次演出时亦都因为观众而留下很多难忘的回忆，Yoyo续道：“演戏对我嚟讲系好新嘅尝试，学习过程中，容许自己更加敏感。虽然彩排演出不停重复著同一件事情，但每一晚面对唔同观众，再观察自己嘅反应，原来都会唔一样，呢个感觉实在十分深刻，亦令我多咗练习stay present，珍视当下。”阿君则遇上真情流露的观众兼好友。“我听得最多嘅说话系多谢我哋，可以让佢哋喺呢段时间将抑压住嘅情感可以得到排解。其中我一位社工朋友，佢一见到我，就揽住我系咁喊，冇讲任何嘢，但我从佢嘅反应里面，知道喺呢段时间佢行得唔容易，所以我都俾咗一个好深嘅拥抱佢，希望大家互相支持、互相鼓励，继续行落去。”

另外，亦有医护人员多谢AhDee及阿祖说出了他们的心声，AhDee道：“有个医生睇完话呢个戏讲出咗医护人员嘅难处：有好多情绪都唔可以讲出嚟，但《偷偷记得》正正好似有人讲到佢哋嘅心声，所以好感谢我哋。”阿祖则谓：“好坦白讲，原本我唔系谂住讲医护，讲放弃抢救，即系要同家属去讲放弃抢救呢件事，过程中提及好多医护人员嘅伤痛感受，但有医护人员同我讲，觉得《偷偷记得》令到佢哋觉得被理解，同埋被看到佢哋嘅工作里面嘅难处同埋伟大，佢哋嘅分享对我哋嚟讲系好特别同埋好宝贵。”

剧场里，风车草剧团藉著戏剧疗愈人心，但他们仍心系大埔的灾民，阿祖说：“我哋唔想刹停呢个演出，因为呢个戏正正咁桥就系讲𠮶个题材，我哋觉得喺呢个时刻同大家分享呢个演出，可能都有一个正面嘅讯息，但系我哋作为香港人都好想出一分力，所以我哋就决定将我哋售卖纪念品嘅钱捐出去。”AhDee亦说：“我哋都好想为大埔嘅居民做啲事，希望都可以略尽绵力。”

香港人正面对著如此艰矩的时刻，但AhDee表示：“我哋好多难关都一齐过，我哋只要继续守护大家，互相帮助、互相爱大家、互相睇住大家，我哋就有咩难关都可以一齐度过。”阿祖亦道：“其实我哋关关难过关关过，我哋只要一齐守护住大家，一齐帮助大家，心里面有爱去爱大家，其实几难嘅难关我哋都可以一齐挨过，接下来嘅嘢将来系点无人可以预计到，但系呢一刻面对一个巨大嘅伤口，我哋系需要互相扶持互相去守护，就好似《偷偷记得》里面，天使讲嘅一句台词：‘我哋认识到大家，帮得几多尽量帮，做得几多尽量做。’”