为迎接年度最令人期待的佳节，有商场日前邀请了艺人刘颖旋（Tiffany）拍摄“圣诞礼物大派对”相片，Tiffany可以在商场中四围打卡，暨工作又可以乘机shopping拣圣诞礼物！

呢日刘颖旋现身拍摄活动，虽然工作排得密密麻麻，但讲到圣诞节Tiffany就一脸雀跃，直言归心似箭：“我主要个目标系希望圣诞可以返到去 LA（洛杉矶）𠮶边陪屋企人过啰。但我系未买机票嘅，因为始终做嘢为主，希望一有空档时间就可以即刻走。”佢透露每年圣诞都好渴望能与家人渡过，全家人食饭、倾偈嘅感觉特别Warm。

刘颖旋笑言家人作风好洋化、好 Chill，唔会被“逼供”终身大事：“又冇㖞！佢哋反而成日问我喺香港做紧乜，拍紧咩剧或者综艺节目，想了解我嘅工作多啲！”Tiffany 预告《飞行日志2》将于十二月埋尾，之后有机会开拍新综艺节目。虽然Tiffany近日人气急升，但佢自爆其实系一名“宅女”，平时好少主动出街，最钟意留喺屋企：“同朋友出街食饭都会嘅，如果被 Fans 认出，都会大方影相同签名都 OK 嘅，不过如果太素颜可能就会戴返个口罩遮遮，废事吓亲人！”

讲到圣诞送礼，Tiffany 笑指自己好幸运，因为屋企人无互送礼物嘅习惯，帮佢悭返唔少：“我试过想送礼物俾父母，但佢地样样都话唔想要。（收过最 Sweet 嘅礼物系乜？）Fans 送嘅手作最Sweet，佢哋会集齐我好多相整成相簿，呢啲要花时间做嘅嘢最有意义。（有冇追求者送过？）又好似冇。（送手作会加分？）会嘅。”