围绕汪明荃（阿姐）出发看世界为主题的台庆综艺节目《带阿姐看世界》，昨晚（13日）播出不丹篇最后一集。

最后一站不丹揾得老公罗家英做旅伴，尾声的诉心声内容自然更到肉更温馨！先接上回宣传提及阿姐直问家英哥：“你话你同我讲嘢对牛弹琴，我唔够关心你定咩？”虽然家英哥再三回避，但因经不起阿姐“哀求”：“我想改善吖嘛”、“我听咗好唔安乐”，终把心一横和盘托出：“几十年入面哩，你系唔听我讲嘢架！”阿姐听完搞笑扁嘴，之后二人对话如下。

阿姐：咁习惯咗吖嘛

家英哥：所以咪对牛弹琴咯

阿姐：你冇耐性呀

家英哥：我有耐性架，冇耐性唔会对得你咁耐啦

阿姐：我觉得你冇耐性呀

家英哥：呢个又唔可以咁讲嘅，其实我真系好有耐性、好有忍耐力，胸怀好大姐阿姐：你话架，返去睇吓你系咪喇

眼见阿姐一再扁嘴又有啲委屈，家英哥即松口谓：“阴公！饮啖先，我讲错嘢。”然后更大谈夫妻为何应该“床头打交床尾和”：“对得多一定有嗌谮，嗌嚟做咩啫，听日又对番架喇”、“习惯咗之后，大家明白互相嘅包涵咯。”值得留意的是，被话的阿姐虽然有啲头耷耷，但全程表现心平气和，且难得流露“听教听话小女孩”一面，足证家英哥在其心目中地位。

阿姐自爆氹家英哥开心事件簿

未知是否想上诉，阿姐主动提及当年家英哥染疫时、如何出尽法宝氹他开心，包括预备“一人边炉”及“隔住玻璃陪练歌”：“你冇心机呀！然后你练歌哩，我就喺玻璃另一边，系氹你开心架”，之后又像小女孩般问家英哥：“咁我为你做呢啲嘢你开唔开心呀？”当听到家英哥表示开心后，阿姐即露出满足甜笑，画面相当甜蜜温馨。

之后，二人又分享觉得阿姐拍摄这个节目后的改变—“大胆咗”、“好相与咗”、“愿意尝试新事物”、“个人开朗咗”及“幽默咗”，家英哥亦认同阿姐本身很有幽默感：“我发觉你其实好幽默，你窒我哩，你好开心架！”想不到最后依然是乘机耍花枪的招数。

最后家英哥向阿姐送上“个人专属邮票”及婚照相架，搞笑的是，二人为了婚照的光暗问题又斗了一轮嘴，先是阿姐“搞事”：“啲光喺晒你度㖞，唉！蚀咗底添”，家英哥则借题发挥：“我特登遮住你，等你唔晒掁住”，阿姐亦不甘示弱：“我就你咋，等你威啲。”很快家英哥便宣布投降：“你系权威，你所讲嘅嘢，都系有道理嘅。”完全宠妻完美示范。

二人又按制作组要求向对方说出心底话，阿姐：“最紧要身体健康，注意饮食，记得食药打针”，语气及眼神尽是爱惜。家英哥则指望阿姐长命过自己：“大人，我祝福你永远青春，思想敏捷，行得走得，仲有，要长命过我。（点解呀？）我舒服啲咯。”最后二人犹如热恋情侣般翩翩起舞、眼神尽是幸福，为旅程划上浪漫又圆满句号。