TVB《万千星辉颁奖典礼2025》今日（2026年1月4日）于澳门上葡京综艺馆举行，事前有传总经理（节目内容营运）曾志伟将会离任总经理职务，转以顾问身份与TVB合作，而TVB将在今晚典礼上增设环节答谢曾志伟多来对TVB的付出，更会向他颁发一个重量级奖项。

当大会颁发完“最佳剧集奖”予《新闻女王2》后，由电视广播公司主席许涛发言：“大家好，首先我哋大家再一次恭喜今晚所有得奖嘅台前幕后，而家颁奖礼嚟到最后一个环节，而今年我哋特别增加咗一个奖项，万千星辉荣誉传奇大奖，向一位传奇级嘅人物致敬。呢位重量级嘅人物，喺过去几十年，为TVB作出咗重大嘅贡献，其实唔止系TVB，甚至乎喺全港嘅演艺界，佢一直都系出心、出力，佢演出过，佢制作过嘅作品，为香港嘅市民带嚟过无数嘅欢乐，佢亦都提拔咗一代有一代无数嘅演艺界人才无论系过去，现在，或者将来佢都永远会系TVB最重要成员之一！讲到呢度，呢位得奖者应该都呼之欲出㗎啦，但系，等一等，我哋准备咗一条片，正式咁同大家宣布，大家睇睇片。”之后萤幕上播上一条由王祖蓝旁述，回顾其整个演艺生涯的短片，歌颂他对影视界及TVB的贡献。

之后由好友谭咏麟颁发这个奖项，曾志伟说他事前保密功夫做到足，更谎称自己出了埠，而谭咏麟在台上表示：“曾志伟系我所认识嘅朋友入面，最唔守时嘅一个，因为佢可能系交游广阔，或者系百足咁多爪，佢一瞓醒之后就周围约人，所以想见佢直程好似睇街症咁。而且呢，佢每一个会都唔会限时间，所以一个迟咗之后，可能下面𠮶啲就好迟，一路褪，所以成日都唔守时，仲有佢会自己打电话话俾你听，我而家转过弯嚟㗎喇，呢个弯叫‘大亚湾’。其实我都好奇怪，志伟，点解无线总经理呢个职位，真系好‘踢’脚， 责任重大，点解会做嘅呢？我问佢，佢就话俾我听，唔知点解我觉得TVB好似系我嘅初恋情人咁样，我一定要返嚟帮佢，就系凭着呢种信念，佢竟然会每一次开会，八点前就得喺度，亦都系佢呢种咁嘅坚毅，令到综艺节目有声有色，大家有目共睹。有一日如果大家喺街𠮶度见到志伟，不妨走埋去同佢讲声，‘曾生！多谢你！’多谢你咁多年为我哋做咗咁多好嘅节目，志伟系一个好眼浅嘅人，喺𠮶个moment，佢就会两行眼泪，喊到收唔到声，好似老人家荡失路咁，志伟，今日容许我喺度，以观众身份唱只歌俾你听好冇？”然后谭咏麟清唱出关正杰一首《相对无言》，深情跟志伟对望，唱出“朋友　记得那天共你初初见面　谈到你的理想　并祝他朝兑现”全场艺员同事则为曾志伟站立鼓掌。

曾志伟发表感言，他说：“多谢多谢多谢！除咗多谢都系多谢大家，好多谢大家，想同大家同事讲，你哋可以坐低，唔使一定企起身，好多谢大家嘅尊重，好多谢你哋。公司今次颁呢个奖俾我，我好多谢好多谢公司，因为呢个系一个新嘅奖，叫做‘荣誉传奇’，我觉得呢个奖最特别嘅就系last个字——‘奇’，奇就奇在五年前我答应嚟做经理呢个位，我同朋友研究过，佢哋猛咁同我讲，话电视系一个夕阳嘅行业，唔做唔输，唔好衰收尾啊志伟。但系我回心一谂，我从影50几年，其实我好多所见所闻，所学所做，我系好想同我哋嘅同业分享，返嚟TVB我就系呢个目的。第二就系话，其实我行匀成个世界未见过一个电视台好似TVB咁，超过八成嘅电视观众，系睇紧同一个电视台叫TVB， TVB唔只系一个电视台畀娱乐大家，系肩负社会责任。就系因为咁，TVB先至有我哋祥哥嘅《东张西望》，每日每夜同我哋香港人伸张正义，好难得，我哋做一啲节目，系为我哋中年人，比个平台佢哋去追梦，《中年好声音》，如果有音乐梦嘅，可以有《声梦》，可以有《声秀》，仲有我哋为大家介绍国内所有发展，有花哥嘅《无穷之路》，呢啲种种嘢都系想同我哋社会去连接，去比正能量大家，希望大家喺香港能够收到一个正能量嘅讯息，呢个系TVB要做嘅嘢，呢个就系我哋联同TVB所有同事一齐肩负嘅责任。

曾志伟续说，五年来得到大家支持，是自己最欢迎的事，之后宣布卸任总经理一职：“去到今日，其实我都觉得自己有啲江郎才尽，亦都系时候应该卸任落嚟，畀我哋同我一齐走嘅年轻一辈，你哋继续再行，再将TVB发扬光大，再肩负呢个责任。所以今日，喺呢个咁难得嘅场合，我能够攞到呢个奖，亦都系我同大家讲，我系需要喺呢个职位里面暂时退落嚟，不过通常攞奖都会多谢一啲人，我都唔例外，第一个我要多谢嘅，系呢五年嚟同我一齐并肩作战嘅，我哋所有TVB嘅同事！有你哋，呢五年先做到呢啲节目，多谢你哋！第二个我要多谢嘅系，其实喺台庆、喺所有大型节目大家都会睇到，我系不断话俾大家听，其实TVB系有一班喺度做咗10年、15年、20年，不断努力，但系默默耕耘都可能冇名，但系今日能够企喺度成为大家所钟意嘅艺人，其实佢哋系付咗好多好多辛酸，付咗好多努力，成为今日嘅艺人，有佢哋先有今日嘅TVB，先能够提供更多娱乐俾大家，好多谢各位艺员同事！最后，当然要多谢……其实五年来，你话辛唔辛苦，当然辛苦，但每一次无论我喺外国返嚟，或者我喺街行紧，有人行返转头揸住我只手话‘曾志伟，多谢你’，我话多谢我咩呀？我唔识佢㗎㖞，佢话‘好多谢你带咗咁多好睇嘅节目畀我哋，带咗欢乐畀我哋。’净系呢句说话，就已经系呢五年我喺TVB做嘢嘅动力，所以有需要多谢每一位香港嘅观众，多谢你哋，希望你哋继续支持TVB，多谢！”最后他向全场鞠躬。