吴雨（大哥）早前接受YouTube频道“徐蓉蓉文化工作室”访谈节目《蓉蓉细语》访问，大哥跟主持人徐蓉蓉（徐姐）由70年代开始认识，当年贵为无线电视高层的大哥，与时任记者的徐姐结缘，相识数十载情谊不变，无所不谈。两人在节目中，由“大哥”的暱称的由来说起，再到他与一代粤剧巨匠红线女（女姐）由1978年相识与到2010年上契经过，以及30多年来两人相交点滴。

讲到大哥之名由来，吴雨形容“听落好似好威”，但原来最初只为“玩吓”，“70年代最兴打‘蜜蜂机’，喺尖沙咀好多游戏机中心，有次我同何丽全成班人，食完饭落去打机，见到有个𡃁仔喺度打极都唔完，我咪同佢讲‘我系尖沙咀大哥’，吓到个𡃁仔走咗，大家笑到呢！自此何丽全佢哋就叫我大哥，但之后慢慢自己都成熟咗，人脉又广咗，变咗呢个名好似有少少江湖地位。我唔敢讲能够照顾每个人，又唔够胆话人人对我好，唔会讲我坏话，总之出嚟唔会踩你，已经好好，呢啲系我自己积返嚟。”徐姐就见证，大哥对传媒一直亲切兼帮手，大哥之名当之无愧。

公开与一代粤剧巨匠红线女上契经过

2025年是红线女的百岁冥寿，大哥回想跟契妈相交，早在1978年初遇，当时他任无线综艺节目《欢乐今宵》剧本审阅，而同事胡美屏正是女姐的表妹，“胡美屏阿妈何芙莲系女姐师父，爸爸靓少佳（谭少佳）就系女姐舅父。”

由于当时《欢乐今宵》与丽的电视的剧集《鳄鱼泪》打对台，需要揾“猛料”对战，于是就决定到广州揾平反不久的女姐做访问，“𠮶次就系第一次接触红线女，我同胡美屏、刘天锡一齐上去拍，访问呢个粤剧巨匠、艺术家，第一次见到真系又惊又喜，但系唔出声唔得，我要负责访问佢同写稿，见到佢都口震震㗎！”反而女姐主动安慰大哥，令他相当难忘，“佢话‘吴雨先生，你唔好咁紧张，你问啦！’”

1983年大哥成功撮合新马师曾（祥哥）与女姐相隔40年在《欢乐满东华》中，合演《白蛇传》的折子戏〈仕林祭塔〉。自此大哥跟女姐更加熟络，往后日子经常联络，得知女姐希望将粤剧动画电影《刁蛮公主戆驸马》在香港上映，他又安排东华在2009年筹办《刁蛮公主戆驸马》慈善夜，更请得两大天王张学友和刘德华出席，令女姐相当开心，令大哥与女姐情谊更深。

直到2010年，大哥带女姐游香港太平山，同行的胡美屏提议女姐跟大哥上契，“我当时唔知喺老衬亭去咗洗手间，后尾听胡美屏讲返，佢话同女姐讲‘你咁多年乜都揾吴雨，不如契鬼咗佢啦！’我哋冇跪亦冇斟茶，佢嗌我契仔，我嗌佢契妈就系嘞！”而上契礼物就是一条女姐最爱红色的水晶炼，“我哋行过纪念品店，红姐见到话钟意，但系望到3000蚊话贵，我买畀佢都唔肯要，但系佢嗌完我契仔后，我再带佢去买，佢就话‘咁就要得嘞’，而行过运动服装店，女姐拣咗条运动裤畀我，佢话‘裤，等你富贵’，条裤我到今日都着住。”徐姐认为女姐跟大哥上契过程虽然好即兴，但包含着两人由1978年到2010年数十载感情，因大哥尽心完成女姐每个心愿。

遗憾契妈离世十多年后才能完成心愿

不过，原来大哥也有女姐的心愿未能完成，亦成为唯一遗憾，犹记得女姐在2013年12月8日去逝，之前一星期他曾到访女姐家，当时女姐竟然用木板垫着瞓，“佢本身瞓喺楼上，但佢整亲条腰骨上唔到楼上，就揾啲木板垫住地下，我话咁点样瞓呀，要整张床，佢仲话唔啱位，我话可以订造㗎嘛！点知一个礼拜后佢就离开咗，我都整唔切张床，后尾又忙又疫情，真系直至上个月，咁啱女姐个孙同红线女艺术中心一班人，嚟香港做女姐百周年纪念，我同佢个孙提起要烧返张床畀佢，上几个星期佢个孙影咗张相畀我话帮我做咗，十几年都冇做到，真系对唔住呢个契妈，唔系佢报梦都会嚟闹鬼我。”大哥又大赞女姐是个好学不倦的人，多年来仍会不断吸收新事物，私底下坐车时爱唱歌，就好似小朋友一样可爱。