江美仪惊揭患严重惊恐症20年 与梁洛施宗教结缘：佢觉得我系好人
萤幕前，江美仪总是给人一种硬朗、坚强的印象；但镜头背后，近二十年来，她其实一直在与情绪病默默共处。
你哋唔好睇少情绪病呢件事，情绪病同感冒伤风系冇分别，我个样系冇嘢，但你唔会知道我感受，我觉得唔舒服嘅嘢，可能你觉得冇问题，但对我嚟讲真系唔得。
相关文章：江美仪认样寸易招是非 穿黑丝袜被嘲重口味：点解咁憎我？｜专访
爱情必修科免伤痕累累
江美仪每次拍拖均超过十年，与吴君如胞弟吴君祥相恋以前，亦有过一段刻骨铭心的爱情，可惜最终分手，令她留下难以磨灭的伤痛，患上严重的抑郁，后演变成惊恐症。“从来冇人教你点拍拖，从来冇人教你点做一个男朋友、女朋友，老婆或老公，你要探索去摸索，世事嘅障碍，好影响你嘅决定，当时冇人教，我唔识去锡自己、保护自己，到知道就已经伤痕累累。”
嘈杂声似钻入头：比死更难受
江美仪的惊恐症对声音特别敏感，最严重的时候，吃饭不可以坐在餐厅中间的位置，“譬如酒楼好多人，坐大厅中间张台，我系比死更难受，因为啲声系钻住我个头，唔得，我要坐最角落，或者好有房，要好静环境，因为一嘈就会触发生我突然间抖唔到气、心跳、好想晕，有时直情晕，跟住就筋疲力尽，𠮶段时间好辛苦”。
海啸灾难后画面极震撼
2004年12月南亚大海啸，数月后，江美仪随ATV摄制队赴泰国寇纳拍摄《爸爸向前走》，目睹灾难后尚未完全清理满目疮痍的画面，冲击著她的神经，并触发情绪病，至今仍犹有余悸。“我好记得有座山，有很多牌指示呢间系咩酒店，跟住望下面冇晒所有嘢，系平地嚟....山中间有个庙，里面有好多浮尸嘅照片，咁大个女未见过咁多浮尸嘅照片，全部系外国人，黄皮肤黑头发全部落晒乱葬岗，因为泰国系一个好热地方，佢真系冇资源雪咁多尸体，红须绿眼𠮶啲好想外国人认返佢哋，影晒相放上纸度希望有人认到。听当地人讲死尸一直铺到过庙，你可以想像当时死咗几多人。”
发梦遇巨浪：吓到弹醒
想像到尸横遍野的震撼画面，让她至今仍会在造梦中惊醒：“我到今时今日，间中发梦都会见到海啸，我系会整个弹醒。可能呢件事已经进入咗我嘅潜意识，我见到个浪冲埋嚟，我有时都会吓醒。”
与佛结缘 梁洛施主动认识
已皈依我佛的江美仪心境变得平静，近年情绪问题得以控制，并因信仰与梁洛施结缘。“好多人话我高攀人，实际有一日我喺instagram收到一个叫梁诺施嘅人揾我，佢话我好想学佛，好想跟你一齐去学佛，我就即刻打俾卢觅雪，问系咪电骗....要确定系佢，见面惊为天人好靓，慢慢就做咗朋友。”江美仪透露因为梁洛施在《单对单》节目见到她坐禅，故主动认识，问到梁洛施为何选择跟她做朋友？江美仪笑著说：“我有问，佢话觉得我系一个好人，唔系一个坏人，佢真系咁讲㗎，所以记得唔系佢揾我，唔系我高攀佢呀，哈哈。”
更年期难坚持茹素
江美仪曾一心坚持茹素，却没料到遇上更年期这道难关，令身体几乎崩溃。“更年期最快流失就系肌肉同蛋白质，当时我食素真系唔够肌肉，脸颊都凹咗。”那段日子她瘦得太多，连中学同学都吓到特意约她出来，细声问：“其实你系咪有咩病？”为回复健康身体，江美仪决定再吃点肉，状态就回来了。
54岁的她，现在学会更爱自己，“你唔知道几时会离开呢个世界，我想每天临睡前都系开心。如果可以回头，我会同自己讲‘爱自己多一啲，唔需要去外求’。”
场地提供：ViDA LIVING Office & Showroom