陈炜最近在无线（TVB）剧集《非常检控观》中有出色发挥，不少网民高呼下年年头又可以争视后。陈炜演技一直都备受肯定，但始终未能获视后奖项加持，她亦不讳言自己“恨攞”，可惜一直擦肩而过。陈炜不经不觉已经入行30年，多年来的打拼，中间试过为爱情隐退，又经历母亲离世留下遗憾。一切的起点，要由她参选亚姐开始说起。

因港姐截止转投选亚姐

回想起三十年前，陈炜并非抱著明星梦入行。“其实读书𠮶阵好平凡，成绩一般般啦。当时身边啲同学个个都忙住做兼职，我哋去帮学生补习、做信用卡推广，𠮶阵好揾钱㗎。”因为身边有朋友做模特儿，陈炜被带去给一班摄影爱好者影相，意外地被发掘去拍了广告，这才与演艺圈沾上一点边。

“当时有个化妆师朋友话我太单纯，未见过世面，佢觉得选美可以短时间内学到好多嘢，对成长有帮助。”有趣的是，陈炜并非首选香港小姐，而是因为港姐截止，才填表参加亚洲小姐。

然而，这段选美路差点在起点已经结束。“当时有个赛制系要蒙面，传媒已经叫我‘快图美之花’，可能因为咁，公司初初竟然唔畀我入围。”陈炜回忆道，当时眼见其他佳丽都去造型剪头发，自己却没收到通知，“我以为自己落选㗎啦，点知隔咗一两日，突然叫我去剪头发造型，原来我系后补入围嘅。”

谁也没想到，这个差点落选的陈炜，最后凭著那股守规矩、准时、不争不抢的性格，一举夺下后冠。“我从来冇谂过攞冠军，当时只系觉得我操行好、出席率高、导师都赞我，应该可以入到三甲挂？”

初拍剧俾人闹到飞起

当选后三个月，陈炜就被推上了片场。第一套戏是鬼片《等著你回来》，她演一只女鬼。“我当时真系一张白纸，乜都唔识。人哋话我似梅艳芳，我就扮‘如花’，成日吊wire，觉得几好玩，完全唔识紧张。”直到遇到了郑则仕（Ken哥）。“拍《屋企有个肥大佬》系我压力最大嘅时候。Ken哥系一个极度严格嘅人，佢编、导、演兼顾晒。佢要求我每日拎住本簿、拎支笔，大家围读剧本嘅时候，佢会即场改晒所有对白。”陈炜苦笑说，当时自己写字慢、反应慢，Ken哥改一句，她抄一句，脑袋根本转不过来。

“𠮶阵真系每日都好似考试咁。同样系新人，江美仪做到，我就系做唔到。NG多几次，真系会畀人闹到飞起。”但陈炜也明白，那是前辈的厚爱，“虽然会被闹，但Ken哥知道我有尽力。当时有个指标，如果你表现得唔好，你系冇资格同佢坐埋同一张台食饭嘅。好彩，我仲可以同佢坐埋一齐食放饭。”

陈炜自认恋爱脑为爱情隐退

演艺事业高峰期，陈炜做了一个令所有人惊讶的决定——为了爱情隐退。“我个人系咁㗎，系一个‘恋爱脑’。当时觉得工作唔代表啲乜，最紧要系同自己钟意嘅人一齐。”她随前夫移居台湾，过了几年几乎与娱乐圈断绝联系的生活。“喺台湾冇人识我，我断咗几年演艺事业。虽然都想尽力挽救婚姻，但最终都系要签字分开。”

重返香港，是为了病重的妈妈，也是为了找回迷失的自己。“返到嚟，我觉得自己处于人生嘅低谷。感情失败咗，妈咪又病，我觉得自己唔可以再做一个‘冇生产力’、对社会冇贡献嘅人。”当时外界传闻她被TVB列入黑名单，陈炜坦言当时没想过要争什么位子，“只要有人肯畀机会我，我已经好开心。我同自己讲，之后嘅路要自己行，表现得好，公司自然会再畀机会。”

最大的遗憾“爱，真的要讲出口”

谈到家庭，这位萤幕上的强人忍不住流露出感性的一面。她坦言与母亲的关系一直存在著沟通的断层。“我妈咪系一个好担忧嘅人，佢会企喺街头等我返学返工，所以我一入行就搬走咗，报喜不报忧。”母亲罹患肝癌的那两年，陈炜陪她去台湾治疗，那是母女俩相处最久的一段日子。“佢唔钟意我花钱喺佢身上，我觉得买啲好嘢炖畀佢食好正常，佢会唔领情，会闹我。两代之间就系咁，大家明明爱对方，但性格令到大家收埋自己。”

“妈咪走嘅时候，我冇真真正正捉住佢只手，同佢讲声我爱你。呢个系我人生最大嘅遗憾。”陈炜语重心长地说：“爱，真系要讲出口。如果可以返转头，我希望可以打开心窗，唔好等误解变深。”

暖男陈医生打动陈炜

幸好，人生在低谷后总有转机。透过好友黄智贤介绍，陈炜认识了陈国强医生。

“其实我上一段婚姻完结咗好耐，我一直用工作麻醉自己，冇谂过会有第二段感情。”陈炜笑说，陈医生是个“奇怪”的人，不擅表达，却有一套独特的幽默感。“我拍《法证先锋4》𠮶阵，有一日生理期眼前一黑，飙冷汗。我send message问佢，佢竟然中午亲自拎药同埋一碗粥嚟睇我。𠮶刻真系好窝心。”

现在的婚姻生活，陈炜学会了最重要的一课：沟通。“我同前夫系乜都藏喺心，而家我同老公会将所有嘢攞出嚟讲，互相当对方系最好嘅朋友。”她还甜蜜爆料，家里有一只会唱歌的熊，每天提醒彼此说“I Love You”。

想带同现在的智慧回到15年前

入行三十年，陈炜给自己的评价竟然是“懒惰”。“我本身唔系一个进取嘅人，公司畀乜我就做乜，好似工厂流水线咁完成。如果时光倒流，我会同以前嘅自己讲：‘陈炜，你要再努力啲。’”

她感叹以前进步得慢，是因为一切来得太顺利，让她不懂得改善自己。“如果我可以带住而家嘅阅历同谂法，返去15年前，即系我35岁𠮶阵嘅样去演戏，咁就真系天下无敌啦。”

尽管如此，陈炜对现在的状态依然感到满足。对于奖项，她依然坦白：“我想要呀！但我唔觉得年纪大就冇机会，攞奖系要天时地利人和配合。只要我仲喺呢行，只要仲有监制钟意用我，我依然期待演到一个出色嘅角色。”