Jace(陈凯咏）即将在下星期18日（年初二）及19日（年初三）在红馆开首个《JACE WORLD)演唱会，而今（11日）就在西沙Go Park某场馆进行彩排，非常精彩。

开首个红馆骚不感紧张

而在接受媒体的访问时，问到首个红馆骚已进入倒数阶段，心情会不会很紧张时，她就表示不紧张：“我有少少诧异自己完全未感觉到紧张，然后已经感觉到好感恩同感动，已经开始唔舍得，因为真系得返几日。然后望住所有眼前嘅人好努力，发现原来呢件事好难得，然后可能好快就会过，所以冇乜紧张。”续问到开骚将至有没有失眠时，她扬言：“冇㖞，瞓得几好。我用咗好长时间喺骚前点样调节自己嘅状态，希望自己可以尽量喺好平静嘅心情，然后又可以好专注，我觉得呢几个月好努力去谂呢样嘢，原来系有帮到手嘅。”强调现时心情不紧张，有足够专注力去做每一件事。

睡觉都会发工作梦

眼看在西沙Go Park某场馆的设置与红馆舞台相似，Jace表明在彩排这件事情上会尽力做到最好：“我觉得呢件事好奢侈，今次唔同就系自己话事，自己啲嘢就奢侈啲。我好想每一个彩排、细节我都想做到好足。”提到早前受访时很担心歌词背不熟的问题，问到现在是不是已背得很熟时，她二话不说：“好熟呀，呢几个月就背住歌词跑步，（瞓觉𠮶阵会唔会谂起啲歌词？）其实真系会，我有阵时瞓瞓吓醒咗𠮶吓已经唱紧一首歌，或者谂紧跳舞嘅动作，好多时呢啲工作梦系会有少少。”

网传陈慧琳、林家谦做嘉宾

另外，讲到演唱会嘉宾问题时，Jace就表明嘉宾名单已确定了：“我见大家都有估吓，我觉得大家估嘅方向系非常准确。我只可以讲系呢两位嘉宾我请到都系好开心。第一晚请到嘅嘉宾就系我估唔到自己会请到，然后到而家都难以置信，好期待同佢一齐喺舞台上面开party，因为细个就系听住佢嘅歌去开party，我好期待可以同佢一齐劲歌热舞。（系咪网传嘅陈慧琳同林家谦？）你哋睇啰！第二日嘅嘉宾就合作过，虽然话合作过，唔知大家系咪真系估到，但我够胆讲一定有惊喜嘅。”而她亦透露红馆内“企位”设置会在当日才最终搭好，所以一班工作人员会在前两日准备工作，而她亦准备了多封新年利市派给一班幕后工作人员。