“TWINS 25周年1314新春限定粉丝见面会”昨日（14日）举行第二场，继续由农夫担任MC。Twins跟fans玩足整个下午，气氛劲 high！两人于台上又喊又笑，encore时更清唱十二首歌，fans嗌到拆天，绝对是新年最正福利。

见面会上，Twins提到以往fans聚会多数是BBQ或于酒店举行，阿Sa话：“比较系细啲嘅场地搞，有production真系第一次。”农夫即问：“平时系咁多人一齐BBQ㗎？”阿Sa回应是很多人，点知阿娇搞笑“大唱反调”兼放笑蛋，“都好多人唔应约㗎！冇嚟嘅举手！”全场即时爆笑。

之后农夫问到一对组合如何可以维持二十五年？台下fans即刻抢答：“因为有我哋！”搞到阿Sa忍不住笑，“咁我哋都要靠自己嘅，虽然都系有你哋。”阿娇和议，“事半功倍啦，双赢。”讲到相处之道，阿Sa指她们十分幸运，因为二人都是“温和派”，“我哋真系未试过有好大嘅冲突要嗌交。”阿娇则承认有时会为工作有意见分歧，阿Sa直言，“可能因为我哋都好Hea。”阿娇默契十足抵死话：“闹交好攰㗎知唔知呀？”阿Sa即和应：“系呀，不如留返啖气去玩啦。”

去到读留言墙环节，有位fans写到，“你哋唔好咁早退休呀。”Sa即刻斩钉截铁回应：“冇咁嘅打算！”全场fans即时安心晒。不过最感人是播放25周年影片后，台下fans即场重现当年颁奖礼既应援口号加埋嚓嚓打节奏，全场整齐高声大嗌二人名字，随住《相爱25年》音乐响起，阿Sa、阿娇忍不住爆喊，“以前每次出席颁奖礼，你哋都嗌到我哋听唔到自己唱乜嘢歌，全场最大声就系你哋！所有回忆返晒嚟。”场面劲催泪。Encore部份Twins又大派福利，清唱十二首歌，fans又跟着一齐大合唱，全场fans都谓这个新年愿望成真。

活动由中午十二时到差不多傍晚六时才完结，全场粉丝都可以和Twins合照和Hi touch作结，加上十四样小礼物作粉丝福利，满载而归。