林盛斌（Bob）及钟楚霖的棋人娱乐，昨日（3日）举行《The Best Awaits 棋人先声迎新聚》，宣布王海榛（Dada）、许惠菁（Charmaine）、刘晨芝（Adrienne）加盟司仪团队，还有一位较令人意想不到的，是消失幕前多年的歌手应昌佑（Charles）。讲到已离开旧公司12年，Charles指自己这段时间都叠埋心水做自己擅长的工作——设计，近四年都做设计师，亦忙著照顾小朋友，儿子不知不觉都11岁了。

扚起心肝主动揾Bob求合作　自认仍热爱唱歌：只不过系冲凉唱

至于为何忽然“复出”，Charles表示：“早几年我都戚起条筋，谂紧有乜嘢可以继续发展，我上年就扚起心肝，揾阿Bob，因为我谂起MC就只有佢个样喺我脑海浮现出嚟，不停见到佢，咁我就揾佢。虽然大家都忙，终于都有机会见到面，喺公司详谈咗一段时间，有时我哋都系Social Media倾吓偈、讲吓笑，大家倾完就觉得个方向都系一致，呢个都系一个缘份。我识咗佢好多年，初初出道佢系电台DJ已经识，都有倾偈，今次攞返呢个缘份，我觉得要好好珍惜，同埋好好把握。”对于歌唱事业，应昌佑指：“我一路都继续好热爱唱歌，冇放低呢样嘢，只不过系冲凉同揸车唱。”

拒绝复出做全职歌手全因顾家　持开放态度：MC包唱歌嗌高啲

棋人娱乐除了MC团队，都有帮歌手搞演唱会，问应昌佑会否心痒痒想开Show，他竟然不想，透露签公司前同事都有问他会否有兴趣做歌手，并谓：“我自己系即刻话唔想嘅，其实我钟意唱歌，亦都想揾返一样工作系可以配合返现时呢个阶段嘅我，因为依个阶段我有两个小朋友，我亦有正职，系需要好多考虑。我觉得MC呢一个方向系暂时喺呢一刻嘅我系适合啲，不过我唔会否认任何嘢，排除任何嘢，将来有机会，或者其实都觉得你或者可以试吓出歌，我唔会抗拒，睇下有冇咁嘅机会。”当记者提到，若做司仪可以唱埋歌，叫价会高一些，Charles笑笑表示：“系呀，咁个价要话返俾我听啦当然，嗌高咗嘅话。”又指这个也是Bob当初的考量之一，若客户想听他唱歌，他也一定不会托手踭。

惊喜现身卫兰演唱会重拾初心　望再合唱经典歌《24》慰歌迷

近日Threads上有网民仍然会提到应昌佑与卫兰的经典歌《24》，讲到会否跟Janice再合作，他提到去年卫兰在佛山开骚，就亲自邀请了他以及其他A Music同期歌手做嘉宾，久违再踏台板的他自觉十分幸运，这亦是推动了他主动联络Bob的原因：“我当时有重拾返一个做歌手嘅感觉喺度，我好怀念𠮶十年喺娱乐圈𠮶段时间，其实我真系好开心，虽然自己冇达到一个我认为可以达到嘅目标，但系我系获益良多，我系识咗好多人。𠮶时冇入到呢一行，我亦都唔会认识到现时嘅咁多位朋友或者记者朋友，好多好熟悉嘅面口我系好开心，见返大家好开心！我同Janice仍然系非常之好嘅朋友，都会倾吓偈，首歌《24》咁多年来都系非常受欢迎， even喺内地系非常受欢迎，我都收到好多message话‘你哋多啲出嚟合唱’，我希望有机会可以再同佢合作。”