恭喜恭喜！郑丹瑞（旦哥）昨日（3日）元宵佳节，宣布女儿郑瑶（Zaneta）于早上顺利剖腹诞女，母女平安。不过同日旦哥竟不是全程待在医院，而是守承诺如期现身好友陈德森的新书发布会，相当够义气。他说：“冇办法啦，识咗几廿年，唔通唔撑佢咩？我好攰㗎，陈德森！”他自爆前一晚与太太在医院轮住等消息，冇觉好瞓，但因为陈德森的活动很有意思，故都会撑场，又笑言：“今次陈德森呢个书会，我个女系佢契女，呢个系我契孙，我本来一个礼拜前已经话‘你契孙女可能会3月3号出世，可能我嚟唔到你个发布会。’佢走去打畀我个女话‘一系早啲生、一系迟啲生，你唔好3月3号生呀。’我个孙女真系好听佢话，寻晚开始痛，今朝早before 10点出世，完全话俾佢老窦听，情人节呀！中国情人节，我系你情人，你要永远记住呀！仲有一样嘢，我喺出面等紧，我已经好安乐，你知唔知点解？我直程听到后面，佢把声直程大到，好有力度咁样喺度喊。”

孙女元宵节出世暂叫“小情人”　自嘲当年做老窦腾鸡爆喊遭赶出产房

旦哥说BB尚未改名，指女儿及女婿目前有几个心水，待他们选好后才亲自公布，由于孙女在中国情人节出世，故暂时先叫“小情人”。他又笑指女儿入住的病房号码是307，恰巧孙女重3.07磅，十分有趣。讲到做外公的心情，他认为跟做爸爸是截然不同：“我以为我handle到，但系结果原来系完全我唔识得点样去扮演嘅一个角色。”他自爆至今仍未消化到消息，加上睡眠不足，整个人浑浑噩噩，要慢慢“嗒”真这感觉；又说：“由阿女推入去手术室、产房，阿B出返嚟嘅时候，成个感觉……我哋成日拍戏以为自己惯，真嘅原来系好震撼。”他回忆起自己当年首次做爸爸，自觉是“好渣嘅老窦”，因为第一次故十分“腾鸡”，入产房叫太太，但对方没有应他，他当场哭了出来：“我喊㖞，喺手术室喊……有个儿科医生话‘旦哥，我叫你入嚟系精神支持你老婆，你而家咁样系捣乱，你出返去。’我一出到去见到我啲亲人我就喊，话‘佢赶咗我出嚟……’之后就话佢生咗。”

扬言必纵孙女请食冰淇淋薯片　大赞女婿产后第一时间顾住老婆

旦哥又表示，做外公比起做爸爸轻松得多，因为做爸爸责任感很大，自己当年会不断想，女儿何时长大，现在就决定要纵宠孙女：“我去纵佢，阿女同女婿你唔好话我，个孙梗系攞嚟纵！我而家就系咁嘅心态，轻松好多，佢一喊，‘畀返你！’净系负责玩，玩完我又开心，佢又开心，阿妈话唔俾食嘅，我就‘食冰淇淋、食冰淇淋、食薯片、食薯片！’”他相信女儿和女婿会照顾得孙女很好，又激赞女婿：“我感谢女婿好锡我个女，佢自己个女一出世，佢系第一时间话‘我要睇住老婆，麻烦同护士讲你请外父外母睇住我个女先。’我觉得好Appreciate，你仲记住锡我个女，出咗世你都要锡我个女呀，要锡老婆！”当年旦哥曾亲自主唱及填词，为女儿创作出《那夜我替女儿挍背脊》这首歌，讲到会否再作首歌给孙女，他笑逐颜开：“哗，你仲记得呢啲嘢！等我得闲啲先，我都要冷静吓先，而家唔兴吖嘛，但你呢个idea系几好。”