COLLAR成员王家晴（Candy）今日（15日）联同农夫（陆永、C君）及曾傲棐（Arvin）出席公开活动。王家晴除了大玩游戏展现活泼一面外，更在访问中分享推出首支个人单曲《直白》的心路历程，坦言出道5年才出Solo是“最好时机”；而同场的农夫则密锣紧鼓筹备即将开卖，自立门户后首个演唱会，预告破天荒增设“观众玩谢农夫”环节，C君更搞笑力邀王家晴担任嘉宾“包办半场”以助销量，场面爆笑互动连连！

王家晴飞拖鞋 农夫玩拍子机争啲休克

王家晴（Candy）接受《香港01》访问，坦言运动细胞并不算很好，笑言担心“一个累全家”：“担心㗎，累到佢哋，踢波唔叻，用手比较多啲。”陆永@农夫安慰王家晴，说：“佢唔系全部都系踢波嘢。”他又指向现场的拍子机，又说：“你净系玩呢个已经赢，因为我哋上次测试都争啲休克。”C君@农夫说：“跟beat、跳舞系你强项。”

王家晴首单曲：总之嚟到就接住呢个机会

谈到早前刚推出的个人单曲《直白》，王家晴表示心情紧张又兴奋：“今朝化妆嘅时候，我谂我一路播咗可能30次，因为要自己个脑不停loop住。”陆永一面认真的说：“好早呀，早咗几个钟嚟，咁今日系咪会唱？”王家晴也回答：“我想睇农夫表演多啲。”陆永：“你睇唔到㗎，因为你唱完会走。”王家晴：“唔系㗎。”原来王家晴也是农夫的小粉丝。

出道5年才推出单曲，会不原会觉得太迟？王家晴也回应：“唔⋯⋯我又冇觉得话要早啲出，因为我觉得，自己前几年可能真系经验或者心理状态会再惊啲。虽然今次出嘅时候，我都会觉得（怀疑）自己得唔得㗎？但系我觉得经过呢几个月，同之前演唱会有啲solo嘅磨练之后，我就会觉得所有嘢都有一个最好时机，即系总之嚟到就接住呢个机会。”

作为乐坛的前辈，C君直言：“我觉得佢应该早啲出单曲，最好七十，八十年代已经出，变成经典，咁我就可以话‘细细个已经听你啲歌’。”此番说话惹来王家晴一阵笑声。

农夫搞演唱会：买飞可以玩谢我哋！

话题一转，农夫自立门户后开办的首个演唱会将于明天优先订票。陆永和C君表示已准备充足：“度好晒，你知我哋唔系健身，唔系𠮶啲，成个骚要自己度晒。”C君：“健脑呀。”陆永表示，除了练歌之外，还有相当多部份是需要“讲嘢”的。C君：“又要写稿又要编曲。”C君提到，今次演唱会有特别环节：“最特别就系可以玩谢我哋！畀一个机会现场观众玩谢我哋。相信都冇其他人做演唱会系会咁样做。今次主要系畀你玩我！”抵㖞！陆永笑言：“抵呀，因为本身都平。”

提议让半场畀王家晴：会好卖好多

C君：“七百几蚊睇我哋未必好睇，但系七百几蚊嚟玩我𠮶两条友，咁就OK啦。”陆永继续落力推销：“你唔买就玩唔到㖞，一定要买飞！”会不会加场？农夫就较为保守，坦言：“咁有信心就好啦，睇吓反应如何先啦。”王家晴会不会睇？陆永抢答：“唔好咁逼人⋯⋯”不过，王家晴也回答：“我想呀！（会唔会做嘉宾？）哗⋯⋯”C君：“唔好做嘉宾，我畀半场你呀！会好卖好多。”记者开玩笑，提议整场给王家晴，农夫做嘉宾。陆永笑道：“会唔会净系帮我哋影poster？”王家晴：“哈哈哈。”