廖子妤、赵君瑜Angelina、郑芷淇Elka@LollyTalk、林千渟、黎纪君Christy出席时装品牌Maje活动，Fish以一身极具品牌特色的纯白色通花长裙亮相，成为全场焦点。搭配简约的银色饰品与干净俐落的发型，更显大方得体，完美演绎了Modern Parisian chic的优雅魅力。

廖子妤想攞“最佳衣著奖”

入围金像奖最佳女主角的廖子妤表示，正忙于挑选晚装出席颁奖礼，扬言要艳压群芳夺“最佳衣著奖”：“我每一年度，无论系颁奖嘉宾好啦，又或者系有份提名都好，我都会好希望系靓嘅。我好想攞‘最佳衣著奖’啊！依家开始度紧啲多谢感言，即系万一咁好彩可以得到呢个奖，我都有好多人要多谢！上次喺香港电影评论学会颁奖嘅时候，我𠮶时其实系冇准备到嘅。如果嚟紧再得奖，我一定会发台瘟。我由幼稚园第一次上台，即系扮太阳花嘅时候，我已经发紧台瘟喇，但唔知点解我都系依然好爱表演，同埋好爱上台嘅。”

Elka自爆购物狂属性

Elka@LollyTalk表示现时成员各有各忙，呢日佢仲自爆属购物狂。家中衣柜已“打爆”：“因为我而我搬咗新屋，已经系打爆到我真系买唔到衫㗎喇。因为有好多衫只著过一次，已经唔系好想著，而且keep住想买一啲新衫！”佢表示过往LT形象百变，现“单飞”可以已变新想像：“我谂任今年试吓长头发，因为出道4年都保持短发，早前工作驳发发现效果不错！”

Elka怀念Lolly Talk团体工作

呢日Elka“单飞”出席活动，她表示怀念与队友开工点滴：“我又唔会话唔舍得嘅，因为我哋得闲嘅时候都系会聚埋一齐食饭嘅。但系我会觉得有时可能出席啲活动时，冇咗佢哋咁嘈啰，因为佢哋以前化妆真系好嘈，我对耳仔系疲劳轰炸，但我又几钟意呢种感觉嘅。希望大家咁多位多啲揾我哋做嘢，我哋就会出现㗎喇。”

赵君瑜转投古天乐旗下

而赵君瑜Angelina刚由“试当真”转会到古天乐旗下，佢就过新年时已向“新老板”拜年逗大利是，但一瞬间已“反输”：“我哋玩‘射龙门’，其实古生已经好锡住我哋玩㗎喇，但我都输咗。但唔紧要，都系玩开心啫。”Angelina表示现阶段适应新公司，希望以演员方面发展。