花剑“世一”蔡俊彦（Ryan Choi），近年在剑击场上屡获佳绩，上年他踏上舞台在室友吕爵安（Edan）演唱会中合唱，表现淡定歌喉亦不错，连队友张家朗都赞好听，更被网民叫“原地出道”。近日他宣布杀入乐坛，推出自己“处男作”《我最讨厌的男歌手》，昨晚（26日）是他首度以歌手身份出席活动，现身《VOGUE Hong Kong》与《GQ Hong Kong》时尚派对。讲到同场有韩团BABYMONSTER，Ryan虽然不是Fans，都觉得对方好靓女，期待见到她毇方演，又自爆其实是BLACKPINK的歌迷，早前他更在巴黎街头偶遇Jennie，跟足对方一条街，但可惜无缘与对方合照。

自爆巴黎街头偶遇Jennie　尾随一条街被拒绝合照

Ryan透露：“我啱啱喺巴黎行街嘅时候，喺一间舖头见到Jennie喺入面！我同啲队友一齐见到，我啲队友话‘喂， Jennie㖞！’我哋仲话冇可能，边有可能，跟住我即刻用IG search佢今日著咩衫，我好记得系蓝色恤衫，跟住就发现真系佢！我哋就犹豫要唔要上去揾佢影相，但内心亦好理性，知道佢哋一定唔会畀我影相，我哋跟咗佢一条街，我有个队友17岁，忍唔住冲去问可唔可以影相，但最后都唔成功。”他指Jennie真人好靓，笑言当时都不知所云，但觉得机会难得，好奇心驱使下就跟住对方，但就补充：“都系一条街啫，我系冇份令到……因为上网又话啲人跟住佢，系冇我份㗎！我冇咁过分！”

自资六位数做歌手双线发展　因不想太执著打剑成绩而焦虑

讲到Ryan正式式为乐坛男新人，他透露目前是独立音乐人，用了约六位数字自资出歌，昨日还拍了MV，虽然应付到，但的确价钱不低。他解释出歌原因：“唔想咁单向发展，除咗剑击之外都想做多样自己钟意嘅嘢，净系打剑系好困于净系谂个成绩，我唔想搞到自己咁焦虑，希望发展多一样嘢，令到剑击变成长远一个兴趣，希望又可以喺运动方面为香港攞到好嘅成绩，亦都可以为大家做到好嘅音乐，希望两样都好。”

对新人奖有争胜心　但做歌手发觉“唔可以谂住个奖嚟做”

被问是否剑指新人奖，Ryan先说：“我运动员嚟㗎嘛，都希望攞到奖。”其后表示随缘，他认为做音乐稳做运动员有相似亦有不相似之处，但音乐不能单靠奖项衡量，并续说：“的确当其时同经理人商量要唔要做歌手嘅时候，有一个好大嘅动力系佢鼓励我去冲击新人奖，我真系唔知系咪自己运动员争胜心重，会俾呢啲嘢启发到，但系当自己做落嘅时候，就发觉你唔可以谂住个奖嚟做。你可以谂点样做好首歌嚟做一个歌手，但系你唔可以谂住我要攞一个金牌去做歌手，做运动员就系……其实都唔系，是但啦，总之我系希望我随缘。”

爆Edan写Demo畀自己　有望兄弟档合唱

今次歌曲制作班底是由林奕匡（Phil）作曲、黄伟文填词，Ryan透露出歌前都有畀Edan听Demo，对方说“几好”，而自己亦十分喜欢这首Demo：“我𠮶时喺巴黎，落住雪，跟住望住个窗，个demo其实同我而家我录完出嚟个vibe有啲唔同，本身demo比较似韩剧惨情歌，阿Phil又唱得好好听，喺度啦啦啦晒，好深情，我望住个窗，我𠮶时好深刻、好钟意，但系点知自己唱到好似变咗第二样嘢，其实我有少少唔开心。但系我而家慢慢消化咗自己把声，接受到自己演绎另一种风格出嚟。”

30岁仍与Edan网上争论“大细G”感羞愧　决定放弃挣扎

Ryan透露其实都有收到Edan写的demo，至于为何冇采用，他笑说：“咁快阴我？我哋系倾紧合唱形式定系佢写畀我，我唱，都仲倾紧，所以唔系好肯定，但系我系好希望都同到呢位好朋友、好兄弟合作。”日前Ryan发文指打剑差点“gg”，Edan留言：“差啲gg你个gg?”后，Ryan叫他做“小gg”，之后Edan戏谑：“Sorry我系GG你系gg”最终Ryan放弃挣扎，他解释因为翌日要出歌曲teaser，不想与人执著于“大细G”的对话，并自言惭愧：“当时我系搭紧飞机返香港，我隔篱就系一位17岁嘅队友，佢攞住个电话俾我睇‘哈哈！好好笑呀你哋讲GG！’我系觉得有啲惭愧，我都差唔多30岁，仲喺度同另一个30岁嘅朋友喺网上面公然讲个G大定细，我望住我17岁嘅队友，我觉得好羞愧，佢对住我‘哈哈’，我话‘哈哈，系呀好好笑！’好唔好意思，所以我即刻举白旗，我俾佢赢，唔想挣扎呢啲对话。”