廖子妤（Fish）、陈蕾昨日出席化妆品牌活动，二人盛装打扮，似乎已是金像奖前哨战，陈蕾说：“到时会再靓啲。”但Fish就表示：“ 哗，我唔敢讲呀！因为我觉得我今日已经好靓，有啲难突破，系咪？我靠个信心㗎啫。”二人暂时还未定好金像奖战衣，被问会否“露吓”，Fish表示：“我有啲咩可以露？脚趾？脚趾露咗喇。我年年呢，大家都会问我‘今年会唔会露啲咩呀？’，我年年都话‘露骨’嘅。（陈蕾：可以露面，抛头露面……）好，我露面。我自己……可能肚皮啩？我有一年有露过肚皮，我冇乜可以露㗎喇，再露系三级㗎喇，会俾人用游荡罪带走啰到时。”

双双入围金像奖互笠高帽　Fish被睇好感压力直言欣赏许恩怡

廖子妤入围金像奖最佳女主角，陈蕾则入围金像奖最佳原创歌曲奖，被问有冇信心，二人即互笠高帽表示对对方有信心，Fish直言其实当个个都说“睇好你”时会有点压力：“我成日都话‘唔好呀，唔好太过注意我。’因为其实提名都有五位，除咗我之外，其他四位都系非常之优秀嘅女演员，尤其是 Nat Nat（许恩怡）系我非常之好嘅朋友啦。无论系边个攞奖，系咪我自己攞奖，我都会非常之开心啰。因为我自己呢，唔系真系以攞奖为目标去演戏，而系我真系钟意演戏而演戏嘅。咁有得提名，大家又见到我，其实我已经得到我想得到嘅嘢啰；而攞唔攞奖，真系交返畀个天，交返畀评委啰。”

廖子妤转行唱歌预告叱咤见？陈蕾拒评歌艺：唔好威胁我

Fish又提到，若真的存在“攞奖就冇戏拍”诅咒，她就转行去唱歌，指曾经有套剧要她唱主题曲，她甚至有唱畀陈蕾听，私下问她意见。Fish自评：“唱歌真系太难喇对我嚟讲，𠮶种运气呀……佢系一个好新嘅领域啰，但又会帮到演戏嘅。”问到陈蕾如何评价其歌艺，她说：“唔好讲喇，唔好讲，唔够胆讲。我系觉得如果识演戏嘅人去到唱歌呢，𠮶个处理字呀，或者其实个感情系会识得运用啰。系呀，绝对有呢个天分，但最好唔好喇，唔好唱，唔好唱，唔好威胁我！（Fish：明年叱咤见！）唔好唱，唔好唱。即系……唔好太才多艺呀我觉得你，咁样 OK 㗎喇。（Fish：咁我做戏喇，你唔好过嚟做戏。）系呀，唔好过嚟呀，我哋河水不犯井水呀嗱。”

Fish与男友庆生旅行　被问会否秘婚反问结婚有何好处

Fish今日（31日）正日生日，她开心宣布：“我放假喇，你揾我唔到！哈哈！”她将会跟男朋友卢镇业（小野）去五日旅行，地点就回来再分享，被问会否秘密结婚，她反问记者：“你先讲个结婚嘅好处畀我听先。”当记者讲到会有人照顾、有人执屋等等，她说：“而家都有啦！而家我都托赖有客户啦，我都揾到啲钱钱，呢啲迟啲先谂，畀我做多几年嘢先。”之后记者将话题转到陈蕾，问她有冇人追，她即搞笑说：“你终于关心我呢样喇咩？你唔问我有冇结婚嘅？睇落都唔似，系咪？咁确实我系冇呢个打算，我见你哋问都唔问㖞。我好少同其他女artist做访问，先发觉其他女artist有呢啲问题，冇人关心我，系咪我单身个自在感写晒喺块面，冇人打搅我。”讲到叫陈蕾考虑公司其他男歌手，她耍手拧头：“我公司啲同事就交返畀更好嘅人家去照顾啦。”

陈蕾讲不出结婚好处：呢个年头都结婚一定系好好嘅缘份

再问陈蕾能否讲出结婚的好处，她直言：“我讲唔出呀真系！”更望一望Fish：“所以你……三思，玩吓好喇！”她之后认真再说：“如果有好朋友结婚，就一定系……我一定会觉得，诶，呢个年头都仲会想去结婚，甚至系想有小朋友，一定系一个好好嘅缘分，先至会咁样做。一定要撇开晒所有嘅现实考虑，都要进入呢一步，我会非常之恭喜，一定系深思熟虑先至做！（Fish：我要深思熟虑。）所以如果你系，就话畀我听。”记者续问如果Fish结婚，陈蕾会否抢花球，二人即笑说好似讲到Fish已准备要嫁一样，Fish：“如果真系，我直接车落佢块面度！（陈蕾：车我块面？）咁我只能够揽住。”