庄思明今日（1日）出席《爱·回家之开心速递》愚人节活动，与剧中一众演员齐齐玩游戏。问到可曾在愚人节整蛊人或被整蛊时，庄思明说：“通常我被整蛊𠮶个，试过俾黎诺懿将啲咖啡豆倒入我对鞋同袋入面，𠮶次我赶住走，着对鞋时就谂点解有嘢喺入面？佢哋系几个加埋整蛊我，不过我无嬲，已经惯咗。我自己就试过收埋阿杨（男友杨明）啲嘢，系重要嘢嚟，唔记得咗系银包定系电话，佢揾咗好耐，之后我摆返喺一个位置当系佢揾到。”

同居生活与结婚无分别

提到早前提及与杨明今年会结婚的计划，庄思明就表示：“我无讲过呀，系佢讲，我都唔心急，反而系身边啲人急过我哋。（拍咗拖10年好耐喇嘛）今日就系拍拖10周年纪念日，我哋𠮶时系3月尾一齐，都唔记得咗系几好号，就话咁拣个易记嘅日子啦，就定咗喺4月1日。（你未想结婚？）我又唔系真系人哋讲到咁想，其他人更想我哋结婚。其实我哋一齐住同结婚无乜分别，结咗婚都唔会有好大转变，结婚只系搞个大party同啲亲友一齐开心。（婚纸有保障？）咁结咗婚都可能会离婚嘅，我哋两个又唔系豪门第时离婚会分家产。而家我嘅起居饮食日常生活都系佢照顾我，佢好舍得使钱喺我身上，使到我叫佢唔好使咁多喇。我觉得一个人爱唔爱你系睇佢平日生活上点对你。（需唔需要佢求婚？）佢话一定要求婚，我本身钟意仪式感，佢话如果唔求婚惊我第时老咗会怨佢。佢会谂惊喜畀我，但系啲fd成日笃爆，佢又要再谂过。（如果今年结婚你ready？）我ready嘅。”