香港电台第二台即将推出多个新节目，今日（1日）举行“四月迎新日”听众见面会，姜文杰（Benji）首度挑战做DJ，将主持两大音乐节目《轻谈浅唱不夜天》和《华语音乐风》，妹妹姜丽文（Lesley）专诚飞返香港恭贺，二人向观众介绍：“我哋系Benji and Lesley!”

Benji做爸爸现幸福肥：唔会见返以前好贪靓𠮶啲样

两兄妹重返港台，Benji指自觉胖了不少，又回忆起：“对上一次喺呢度影相，系2010派歌嘅时候，仲记忆犹新，其实眨吓眼已经16年！”对于以前一齐拎住一大叠碟来派台的画面，二人都十分怀念。现场所见Benji比当年发福，他直认是幸福肥：“爸爸要有返个爸爸款，我作为一个专业嘅演员，有啲方法演技，必须要迎合返呢个造型，所以就要肥返好多。（Lesley：我哥哥咩size都咁handsome）我细个系肥仔，佢话我变返肥仔，而家变返可爱，大家唔会见返𠮶时我唱歌𠮶种好贪靓𠮶啲样㗎喇，唔会再出现，稳重啲！”

首度开咪做电台主持　重操故业获妹妹力撑：要播我啲歌呀

Benji讲到首次担任电台主持，自言跟做爸爸一样是很好的礼物：“系新挑战亦都系老本行，首先我一入行已经做紧电视台𠮶啲深宵音乐节目。（记者：《无间音乐！》）系，你都有睇㖞！而家做返少少老本行嘅感觉，亦都系新嘅挑战，因为开咪，自己搞晒所有panel，系一个挑战，好期待。”他指已用了两个通宵熟习操作Panel，因此都上手不少，笑言不会常常播自己歌，Lesley即说：“但系要播我啲歌呀！”

倒数两个月做老窦比预期紧张　为BB改乳名：姜葱或姜蓉

Benji与太太李泳淇（Rain）的BB将于两个月内出世，于网上分享不少孕照，他坦言对迎接BB的心情既感动又紧张，相信到时一定会喊，Lesley就指：“如果大家见到我阿哥同其他小朋友玩就知，我记得十几岁𠮶阵，我已经觉得肯定佢会系一个好爸爸！”她曾试过播放音乐，然后感觉到BB在大嫂肚子里跳舞，感觉很神奇。日前Benji在IG举行投票，叫大家竞猜BB性别，他说未必会特地开Party公布BB性别，但已决定好乳名：“男嘅话大家就叫佢‘姜葱’，女嘅话大家叫佢‘姜蓉’，总之都系好味！”

秦沛视像得悉喜讯激动爆喊　过往曾怕儿子辛苦抗拒抱孙

讲到爸爸秦沛即将做爷爷，Benji透露其实对方对于抱孙的态度跟以前不同：“呢几年做过好多唔同嘅访问，问佢想唔想抱孙，其实佢态度系唔好，佢一路好似好惊我要经历佢所经历，养大小朋友𠮶种好大压力嘅感觉，佢先咁讲，但系今次我同佢讲嘅时候，其实佢兴奋到不得了，有喊嘅！我哋开住视像同佢讲。”目前秦沛定居加拿大，Benji指父亲之后应该多返香港凑孙，又谓：“我都畀佢做爸爸嘅角色做到80岁啦，系时候做阿爷！真系绝世好爸，荣升绝世好爷爷！”而Lesley就指，很多时候做爸爸会很严格，但到对孙儿又会截然不同，自己都期待见到爸爸转变。

姜丽文美港两边走未急造人　期待做搞笑姑姐帮手凑B

日前Lesley与老公庆祝周年纪念，问他对哥哥的BB到来如此雀跃，会否都想生个BB，让两个小朋友作伴、一起成长，她说目前香港、美国两边走，虽然忙，但觉得这是自己所追求的生活，又表示：“我又唔会咁谂，first of all，我同哥哥相差六年，so I have time，我仲有时间。Right now我好兴奋，想快啲做姑姑，我觉得我会做一个非常之搞笑，同埋好Lovely嘅姑姐，Right now我同老公两个嘅Focus都系……而家啱啱搬咗去美国，继续追梦， Focus喺工作先。”而Benji就说：“返嚟帮手凑吓B啦，帮手喂奶！”