ViuTV王牌灵探节目《入住请敲门V》，相隔近5、6年终于再推出新一辑，今次主持同样是经典人脚莫竣名（MCM）跟林千渟，昔日惊青的林千渟，这几年间常常被问“几时再拍《入住》呀？”她一直抱住随缘心态，相信现在就是时候。今次她与MCM分头行事，MCM去马来西亚槟城，她则去韩国首尔。有别于过往去鬼屋，今次林千渟深入令人毛骨悚然的灵探地点——真实的凶案现场，荒山木屋、半个人高的杂草丛、铁丝网，她亲身踏足一名90年代连环奸杀犯的祖屋，面对的不是传说，而是曾经发生过的残酷现实。比起“见鬼”，她更直言最心寒的，是脑海中不断浮现受害者的绝望遭遇；而一场突如其来的“买路钱”仪式，更令摄制队都吓得即时停机，林千渟现时讲起都起鸡皮。
服装：COS （@cosstore）、Sandro （@sandroparis）
化妆 : OneTung Ma （@onetung）
发型：Terry Yeung （@terryyeung_08）
场地：The AIR (The ONE)

由荒废鬼屋转移凶案现场　寻访深山奸杀犯木屋

时隔五、六年再次拍摄《入住请敲门》，千渟坦言最大的分别是自己变得更冷静，而新一辑的《入住》与以往最大的不同，是将焦点从荒废鬼屋转移到真实的凶案现场：“韩国其实而家唔多鬼屋，所以我哋就揾咗一啲喺当地嘅连环杀人凶手，比较出名嘅几个曾经嘅凶案地点，今次我哋比较著重于一啲凶案现场，多过系一啲鬼屋。”千渟认为凶案现场比鬼屋更令人感到心寒，因为那是真实发生过悲剧的地方，她分享了其中一个最深刻的经历，就是前往一名90年代连环奸杀犯的祖屋：“𠮶个祖屋就系喺山上面嘅一个，我谂行山路大概半个钟至九个字先至去到嘅地方。我哋要经过一啲差唔多去到半个腰咁高嘅一啲草丛啦，越过草丛啦，有几个铁丝网，我哋自己整开晒先可以入到间木屋入面。”

惊见逾百水樽疑是凶手遗留　真正荒废与世隔绝

与过往去过的鬼屋不同，这间木屋几乎没有零食、Graffiti等人为破坏的痕迹，是真正地“荒废”：“真正荒废嘅意思系佢冇任何人嚟过嘅痕迹呀，就算你话啲人会过嚟玩呀、食嘢呀，佢哋好钟意留低一啲痕迹呀，一啲零食嘅𠮶啲碎……但我呢间屋系完全揾唔到，反而揾到嘅系，我谂就咁数都起码过百个水樽，系压扁咗嘅水樽。而𠮶啲水樽嘅形态系一样嘅，即系冇招纸冇剩，可能已经系溶化咗，系摆咗咁多年，当时杀人凶手个水樽，我觉得系佢用过嚟。”林千渟又指，祖屋方圆百里都没有士多或商店，因此她认为是凶手当年从山下一樽一樽自己揹上去。

幻想受害者绝望遭遇感心寒：最心寒已经唔关鬼事

千渟表示，比起遇见灵体，更让她心寒的是想像受害者在屋内经历的绝望，她说：“新闻讲就话佢系奸杀一啲女性啦，有试过火烧过、禁锢呀咁样，都系喺𠮶间屋入边发生。𠮶间屋我自已觉得最心寒𠮶个位唔系咩鬼，系因为你知道𠮶间屋真系发生过一啲好凶残嘅一啲凶案，仲要惨死𠮶啲女仔，你唔会想想像佢哋喺间屋度过咗几耐嘅日子先至被杀。我觉得最心寒嘅位系已经唔关鬼唔鬼事，系正正发生过嘅事。”

误得罪鬼王需付买路钱　数量巧合吓到打冷震

在这次韩国之旅中，剧组安排了台湾师傅隔空为千渟看照片。当他们准备离开这间祖屋时，师傅的一番话却让他们瞬间掉入恐惧：“我就喺个屋外面门口啦，夜晚黑喺度打电话同个师傅讲：‘师傅你看到什么？’咁师傅就话：‘哦，你在这个屋子里面呀，住的是一个鬼王，但是你们现在是不能离开了。’”原来摄制队在不知不觉间冒犯了“鬼王”，必须留下“买路钱”才能离开，一行人其实原本已依照韩国习俗，带定烧酒，预备临离开前在门前倒酒，但台湾师傅却指示他们要点“香”。

荒山野岭何来有香？师傅说退而求其次，用香烟代替皆可：“佢哋系要吸𠮶啲烟，师傅就话‘你哋会唔会有人食烟呀？’我话：‘吓？冇人食烟，冇人有烟㖞。”我哋山旮旯地方，就打电话畀剧组嘅人，拜托佢：‘喂，我哋要烟呀！’咁佢就话：‘要几多烟呀？’师傅就话要六包烟。”林千渟听到“六”字已起鸡皮，师傅当时不知他们有几多人，但这个数字却刚好对应了他们一行共六个人，这巧合让千渟不寒而栗：“我后尾系自己心寒，即刻打冷震。”

掷圣杯求鬼王放过　一次搞掂仍不敢兴奋

在等待香烟送来的半小时里，千渟内心饱受煎熬，甚至想过一走了之，但最终还是为了求个安心而留下。六包香烟送达时已晚上10点多，但真正的考验才刚刚开始：“有个仪式要做，个仪式就要点著一支烟，等佢烧晒，我就要掷圣杯。掷圣杯嘅意思就系两个铜钱，要掷到一正一反先至代表佢哋 OK，你可以走，佢哋满意，你先可以走。”作为唯一的女主持，千渟鼓起勇气承担了掷圣杯的重任。在荒山野岭的黑夜中，恐惧的气氛蔓延，连摄影师都吓得关掉了摄影机：“当下我哋系冇影到任何嘢嘅，因为太惊喇！连cam man都熄咗机、冇roll机，所以我以下同你讲呢啲嘢系节目睇唔到嘅。”师傅一早讲明“掷唔到嘅话冇办法，你掷到为止先可以离开。”幸好，千渟烧完第一支烟就成功掷到“一正一反”，不过她兴奋不起来，只在心里暗暗感谢对方放过。

120支烟异常极速烧尽　connect灵界深感敬畏

师傅要求他们必须将120支香烟全部烧完才能离开，当时森林中黑得伸手不见五指，四野就只得眼下草地香烟的火光：“当下我嘅心情好沉重，我唔知系因为周围个环境嘅氛围好静，同埋大家都好唔舒服𠮶个状态，我见到啲烟不断吸呢，就感觉……其实真系觉得四周围佢哋系真系吸紧。”千渟更惊觉香烟燃烧速度异常地快，仿佛真的有灵体在吸食。“因为你香烟平时要吸先至可以烧㗎嘛！佢系keep住去㗎，我哋冇话点样要重新点过，佢系keep住自己慢慢、慢慢完。我哋眼见其实120支烟，真系要啲时间，我哋就系好似陪住佢哋咁啰，真系做到每一支烟都已经烧晒喇，再见唔到个余光，我哋先话‘打搅晒打搅晒’咁我哋就走。”这次经历让千渟深刻体会到与灵界沟通的敬畏：“今次就真系感觉到，我喺你哋度拍咗啲嘢，但我又同时间畀返一啲嘢你哋，𠮶种尊重，𠮶种唔同，系另外一个层次。”

强调节目“眼仔”标示冇造假　专畀阴阳眼观众睇

《入住请敲门》系列中最具标志性的画面，莫过于画面上出现的“眼仔”，标示著灵体出没的位置。许多观众都怀疑这是否后期制作的特效，明明冇“鬼”都要加只眼做效果，千渟为大家解开了这个谜团：“我哋成日都话呢，呢个节目唔系畀正常人睇，我哋系畀阴阳眼嘅人睇到。因为我身边有几个朋友，佢系有阴阳眼，佢话个眼仔真系见到嘢。不过，佢哋见到嘅东西系唔同嘅，有啲圈住佢会话‘有一个著红色衫嘅男人坐喺度’，但有啲人会睇到有一阵雾啰。”她解释，每个人看到的景象取决于自身的磁场与灵体的连系，如果有人能看到清晰的实体，就代表灵体有意现身，或者该人的“功力”深厚。

自细爱看鬼片爱探险　第一季表现惊青因害怕Jump scare

千渟近年有不少工作都与灵界有关，除了《入住》外，又拍了电影《猛鬼3宝》，就连拍MV都在坟场取景，她指自己儿时已常常去租碟舖租鬼片睇，一日睇两、三套，中学时又会去出名猛鬼的“达德学校”探险、去附近的坟场闲逛，“好大胆、好贪玩，唔知做咩㗎，但就觉得好刺激啰。我以前系对呢啲嘢觉得好好奇，因为接触唔到，个个人话见到，点解你会见唔到呢？我就会好好奇、好想知，因为我觉得呢个世界乜都会有啰。”以为她因此“老子什么鬼也不怕”，不过正因为睇得鬼片多，最初拍《入住》时，林千渟明显超惊，她指当时纯粹因为未接触过那些灵探地方，幻想会有“Jump scare”，又怕有露宿者、道友：“我好惊其实系要胁到我自己生命嘅危险！”不过到后来林千渟表现愈战愈勇，她说：“到第二、第三季就觉得，哦，OK，原来系冇呢啲jump scare出嚟嘅时候呢，我个人就放松啲啰。又唔系唔惊，我都惊嘅，只不过……你当系BB慢慢练胆咁样啰。”

练胆成功减少带护身符　但仍怕招灵：挑衅佢我会惊

由第一季带备各种护身符、圣经等护体，到今次只带了一道符和花水净化负能量，千渟明显已成功练胆。不过她坦言自己的“死穴”是招灵：“我谂都系玩招灵会惊啲，你叫我去灵探我其实唔惊，因为我系去一个地方度explore下，睇下呢样睇下𠮶样。我觉得我最惊系我真系要去招佢返嚟啰，做一啲仪式系真系去挑衅佢，呢个我会惊。因为我觉得呢个已经系一个冒犯咗佢，或者我真系尝试想同佢沟通，佢有机会上你身，或者用其他方式去同你沟通嘅时候，我反而系惊呢样嘢多啲。”

回应《墨鱼游戏》争议　对第一季负评已完全放低

除了灵探节目，千渟早前参与《试当真》的《墨鱼游戏》也引起不少回响。她在第一季以具争议性的方式夺冠，惹来部分网民批评。在《墨鱼游戏2》播出前，她与朱柏康合作拍摄了一条短片，内容疑似吐露心声，更被指是借机平反。问到观众当时的留言对林千渟是否伤害很大，她回应：“我拍呢个剧场呢，其实佢系一个 drama 嚟嘅。咁我哋就要借鉴返本身《墨鱼游戏》，点解个主角要嚟玩呢个游戏，所以呢个系其实有少少想攞返我第一季𠮶个唔忿气𠮶个嚟，但其实事实上我唔系真系咁唔忿气。”她指自己都有同游学修商量过，要有前设才能完成这个剧场，否则“场戏好难做到”，但她不讳言过程中都有思考：“会唔会令到观众觉得我好放唔低呢件事？”但事实上自己已完全放低，只求拍完出来效果好就OK。

拒再为夺冠解释　自觉认真玩游戏冇做错：我系无惧嘅

她坦言剧本中有些台词确实是借题发挥，例如“二创咪即系抄”也是呼应网民对试当真的指控，但她个人并不介意网民的批评：“因为综艺节目，我觉得系好睇𠮶个人本身对于个角色，佢自己钟意睇到啲乜嘢。我哋自己幕前人都知道，好多嘢都系经过效果剪接出嚟啦，但系同时间我又觉得，我系真系好钟意玩游戏，我亦都系好认真地玩游戏，就算我再玩游戏我都会100%投入！咁我又冇觉得自己有啲咩做错，亦都唔觉得自己有啲位系违背良心或者点。我觉得我系行出嚟，我系无惧啰，所以𠮶时就唔系好介意。”

千渟自言不喜欢解释，因为真相往往难以被完全理解，所以观众明白或不明白，她也照单全收。对于有观众在看完2025年的《墨鱼游戏2》短片后表示理解她，她再次澄清这并非她的本意：“我真系已经放低咗呀！我唔系要攞条片去控诉一啲嘢，条片完全唔系咁。我只系想大家留意我……好用心拍咗一个演员去拍嘅一条片，反而我想大家留意返呢样嘢多啲啰。”