自《全民造星IV》至今，不经不觉已过了数个年头，当日的“选秀女孩”如今已各自在不同团体及领域中，以个人或组合形式成长。黄敏荞（阿妹）成为了Lolly Talk的门面担当，而李晞彤（Carina）则在英皇旗下的VIVA担任队长。虽然分属不同唱片公司，但两人私下相熟，更与Tania@Lolly Talk及坂部佩莎组成期间限定的“170女团”，dance cover片引起不少话题。
近日这两位“高妹”将在独脚戏音乐剧《Nancy恋噏Show》中的不同场次饰演同一角色Nancy，今次接受《01娱乐》专访，发现她们除了身高，亦有不少共通之处。两人不讳言，在香港做女团真的很难，最现实的就是要靠钱、资源去营运。早前Lolly Talk宣布正式成为独立女团，目前处于休团状态，阿妹明言：“最难系钱。”而Carina虽然有大公司做后盾，也不讳言：“最主要都系资源嘅问题，唔好话佢哋八个人，我哋四个人我都觉得好困难，可能我喺客户嘅角度，我畀呢嚿钱系畀一个Party，但𠮶一个Party我哋有几个人要去分，所以个成本系好大嘅。”
化妆：DEEP CHOI（Carina）
发发：Jeremy Wong @myos_hair（Carina）、@victoriabcde_hair（阿妹）

演青春音乐剧教A0同学仔拍拖　回忆校园百厌事

音乐剧以校园生活为蓝本，二人直言适合“A0”同学仔入场，异口同声说：“因为我哋将会系…… 教大家拍拖！”谈到青春岁月，阿妹与Carina的读书时代有著截然不同的风景。阿妹笑言自己中学时颇顽皮：“我中学嘅时候呢，系有啲曳嘅，𠮶种曳呢，我唔会去到欺负人，但我系会可能顽皮，会玩下水啦，试过爬墙出学校啦，跟住又试过迟到去咗食麦当劳咁样。”

至于读女校长大的Carina，则在性格直率、带点“八婆”色彩却又讨人喜欢的Nancy身上看到了自己的影子：“我都系好Focus喺同我啲同学仔嘅Bonding多啲啰，因为我系女校长大，所以我都系好钟意一班……多数几个女仔聚埋一齐，就好似有个少少八婆嘅圈子咁，一齐喺度讲啲而家好Hit嘅嘢。所以我觉得某部分嘅我都有少少Nancy，然后Nancy都有少少Carina。”那时看见其他学校的人参加Christmas Ball、孭情侣书包，Carina心里也会有一丝羡慕：“我哋冇呢样嘢㗎！所以𠮶阵时就会觉得，如果男女校嘅话一定系好多、更加有趣嘅地方啰。”

挑战一寸厚剧本与独脚戏　大唱17首K歌

今次《Nancy恋噏Show》对两人而言是巨大的挑战，没有队友分担，一上台就是一个人面对观众，除了讲对白还要唱K歌。阿妹忆述第一次收到剧本时，见到“一寸厚”已旋即被吓到：“咁厚呀！揭嚟揭去都未揭完！三十几版，然后又有 17 首歌，你自己一个人 Hold 晒全场嘅话，你个节奏要捉得好好啦，如果唔系大家就未必会 Get 到𠮶个笑位。同埋可能现场嘅反应你又要即时去 React 啦，我觉得系你要好高警觉性啰。呢样嘢真系我都有啲紧张，同埋背嘢方面呢，我哋要加紧努力喇。 ”她睇舞台剧时，近距离看到演员的情绪变化，完全感染到对方的能量，因此自己也以这个境界为目标。

演戏经验较少的Carina，坦言两年前看《我们的青春日志》时就情定Nancy：“我系觉得‘啊，如果有一日我系演戏，我演佢就好喇。’所以我觉得之后学戏，然后去到依家真系中咗呢个角色嘅时候，我觉得系同呢个角色有一个缘分啰。”导演陈恩硕（Tom）对她们的要求极高，连说话语气都要雕琢：“你一个人做，如果你系长期用同一个 Tone 呢，其实系冇乜层次嘅，所以就会有啲扮其他声呀、或者系动作、走位上面都会有好多嘢学紧啰。”

重温《造星》初见　Carina独门增高秘诀、170女团之诞生

两人的缘分始于《造星IV》，虽然当时不同组别，但Carina对阿妹的第一印象是“Pure”与“靓”：“佢好纯粹啰，就系一个好钟意唱歌嘅女仔啰，就系咁弹结他，系咁弹唔同嘅嘢，之后其他人又围埋一齐唱咁样。因为我觉得识乐器嘅女仔系好加分嘅，而佢𠮶阵时，我觉得阿妹好靓呀，好早已经觉得佢好靓。”

有趣的是，阿妹对Carina的记忆却停留在一招“长高秘诀”上，阿妹说大家在厂内等出场，她被对方的长腿吸引住，于是问：“你好高、好瘦呀！点解你对脚可以咁长嘅？”身高170cm的Carina煞有介事地传授心得：“阿妹，你依家好细个之嘛，你每日揈下只脚，咁你对脚就会愈嚟愈长！”Carina笑言自己早已忘了这件事，虽然听起来似乱噏，但她以往应该确切相信“揈脚会长高”这回事。阿妹听罢一脸惊讶：“原来你乱噏㗎？”不过如今阿妹的确长到了172、173cm，虽然不知是否归功于“揈脚”，但两人之间的对话早已从高度增长，变成了女团生活的共鸣。Carina感叹：“𠮶阵时因为始终唔系同组，所以就冇乜机会可以同到咁多女仔有咁多私chat嘅机会，所以喺依家呢个Timing 我哋Catch up返反而系啱啱好啰，因为大家都吸收咗一啲女团嘅嘢啦……觉得‘啊！大家都有啲Level up’嘅感觉。”阿妹也续说，Carina在自己眼中是一个比想像中成熟、想法全面、懂照顾人、很坚强、很懂得向目标进发的同辈，对她赞不绝口。

除了各自的团体，二人又与坂部佩莎、Lolly Talk陈纪澄（Tania）组成了限定的长腿组合“170女团”，结果在网上反应轰动，Carina都始料不及：“‘咦，大家原来系可以有呢个 Bonding 㖞？’我哋自己都unexpected，因为有时你拍cover，都可能系斋跳舞然后就合作咁样，但我觉得我哋四个咁啱就系一拍即合啰，所以我哋都喺𠮶次之后约得好密。 ”

同属感性易喊F人　阿妹澄清Lolly Talk去向：唔系告别

笔者观察到，Carina与阿妹同属MBTI中的“F人”（Feeling），情感丰富且极具共情能力。阿妹常常在公众场合落泪，见面会、演唱会，她哭；早前Lolly Talk久休合体在“宝矿力”出show，她更被形容为“由头喊到尾”。阿妹解释那是因为不舍与挂念，特别是近期Lolly Talk处于休团调整期：“本身我喺𠮶个活动系唔谂住喊嘅，因为我觉得‘哗，𠮶日咁好 Energy、咁好阳光，一定要开开心心啦！’但系突然间望到台下有一啲Fans佢哋开始‘呜……’咁样，跟住我一睄到，我就真系忍唔住。”

她知道波板糖（Lolly Talk粉丝暱称）很想念八位，感受到他们的真挚，而她亦一样心系粉丝们，于是眼泪在一下子夺眶而出。对于外界传闻那次是Lolly Talk最后一次合体，又指以后因版权问题Lolly Talk不能再唱旧歌，阿妹坚定澄清：“佢唔系一个告别嚟嘅！每一个人行到去某一个阶段都会有唔同嘅变化，可能之前呢三年嚟，我哋大家都好开心，八个女仔一齐去揾大家共同嘅嘢，但去到依家呢个阶段，我哋思考嘅话，其实系‘咦，原来有啲嘢系需要变化一下㖞。’但其实Lolly Talk仍然系八个人，我哋个心无变过。即系呢样嘢系永远㗎啰！（问：以后仲可以继续演唱Lolly Talk嘅歌？）《三分甜》‘一至十’……总之我哋所有系列，呢个系列所有嘅歌，我哋都系会继续唱嘅。”

而在团综中亦常流泪的Carina，则形容自己是理性与感性并重的人，她觉得自己跟阿妹都是思路清晰、有主见而又懂得锡自己的女孩子，沟通能力颇强。她又坦言，虽然常常在镜头前落泪，但纯粹是对住VIVA三位队友才特别易喊：“当我真系做嘢嘅时候，我可以超级理性嘅。咁所以𠮶时啲fans话投队长呢，觉得我好似好懦弱咁呀，成日都会有啲情绪啦，但其实我觉得most of the time佢哋见唔到我嘅时候，我都系理智在线嘅人啰，纯粹系我对住佢哋一要讲一啲好emo嘅嘢，或者你都知综艺其实都会拍一啲你哋平时好少讲，或者收埋嘅一啲情绪出嚟，𠮶阵时先至会爆发出嚟，我谂大家都睇得出我系好爱VIVA嘅。”

女团成员与个人身份之平衡　开始学习自我发掘和独处

作为团体成员，如何平衡“我们”与“我”，是两人的共同课题。Carina坦承入行初期曾有过不适应，习惯了freelance和独自计划工作的她，一度很难接受公司的专业意见：“我唔习惯咁做，系会觉得‘我睇嘅嘢就系啱嘅’，或者系‘我信我个vision’，所以我有啲嘢我好想坚持，但有时我会觉得聆听都好重要啰，同埋我觉得有啲嘢系需要成条team一齐去做先至会work out到啰。”她直言与队友一定有意见不合的时候，究然要如何与队友磨合，Carina都曾请教出道比自己早的阿妹。

Lolly Talk超过一年没有出歌，面对模糊的前景，刚满20岁的阿妹也在去年初经历一段情绪不稳、缺乏自信的时期，同时觉得以往太急于做好女团工作，而忘了思考究竟作为个人身份时，自己希望观众认识到怎样的阿妹：“好似做到去某个位，我会觉得‘呀，啲嘢嚟得好快呀！’我开始有啲无自信呀自己个人，我会觉得自己啲嘢要快啲进步啦，要做得好啲啦，跟住一路去、去、去，但系无好好地咁样去停落嚟，去望一望究竟自己想成为一个点样嘅人。呢样嘢系我觉得做一个表演者都系一个好紧要嘅嘢，即系你除咗一啲基本专业你要做到嘅嘢之外，你个性格、你嘅 character、你嘅谂法，呢啲嘢都系好紧要。’”她坦言很享受被叫全名“黄敏荞”：“Lolly Talk始终我哋八个人，可能我哋出嘅歌都系表达紧八个人一致嘅想法，但你少机会会系真系去谂‘哦，黄敏荞想做乜嘢？’我好钟意人哋嗌我黄敏荞，好亲切呀，我都好希望嚟紧可以展现多啲黄敏荞嘅一面畀大家睇，同时间我自己都系慢慢去发掘紧自己系啲乜嘢。”

Carina过往曾在团综压力爆煲，她一直以来都太重视团队，结果迷失了自己，她不讳言：“因为对于我嚟讲，我经常都系将VIVA摆喺我嘅第一位，我觉得其实到依家我都系。应该系话，可能因为我入嚟公司嘅原因，就系因为我真系好想做女团，所以即使我哋会有一啲波折，或者有时一啲不合嘅时候，但我都会觉得我哋系会处理得到嘅。”然而，她去年开始思考到，其实逼得太紧，坚持要大家紧紧靠在一起、一定要很好朋友，其实未必是好事，有时就是要保持适当距离，大家关系反而更好。

除此之外，她也从队友VALC身上学到独立，因为对方很需要个人成长，Carina也慢慢试著自己去跑步、自己去学戏，她甚至会反思：“因为我系好唔习惯自己去做一些嘢，但我觉得个天系推紧我要去试下自己做，即系无论系我跑步也好，然后我演戏、去上Acting class，然后突然之间中咗Nancy呢个角色，而Nancy呢个角色都唔系同人合作㖞，都系自己做㖞。我就觉得系好多嘢都同我讲，其实我要相信自己多啲啰。我觉得我会反而去思考多咗，其实我咁钟意喺一个团里面，系咪因为我唔够胆自己一个？我依家都想试下克服呢样嘢啰。我好钟意一齐嘅时候，当然都好钟意𠮶个自己。但有时拆返开，我自己都可以好好啰。或者我好嘅时候，我都可以带返一啲嘢畀个团啰。”

直认做女团最难系钱　资源和舞台有限下尽做

很多人想做女团，但做女团，难吗？两位异口同声说难。虽然社交媒体上毒舌网民的负评与比较，往往被视为艺人的最大压力来源，但在阿妹与Carina眼中，真正的难处为“现实”。近年Lolly Talk传出因冇钱而面临解散，阿妹直言：“我会觉得最难嘅位系……钱，系呀，系钱呀。因为我哋八个人啦，我哋好多嘢，女团要靓靓㗎嘛，我哋每一次有唔同衫，跟住又要化妆，有好多呢一啲好实际嘅考量啰反而系。”

Carina也补充，对于外界的比较其实自己看得比较开，真正的难处同样也是资源：“我觉得最难系点样可以继续做落去啰，最主要都系个资源嘅问题。唔好话佢哋八个人，我哋四个人我都觉得好困难，可能我系客户嘅角度，我畀呢嚿钱系畀一个Party，但𠮶一个Party我哋有几个人要去分，所以𠮶个成本系好大嘅对于女团来讲。”

香港舞台少，也令女团被看见的机会难上加难，记得VIVA早前担任师兄关智斌（Kenny）演唱会嘉宾，Kenny十分惊讶四位居然是首次做嘉宾，因为以往的文化就是师兄、师姐带住新人四出表演，但现时舞台却较少，甚至出了新歌都未必有太多机会唱现场给大家听。Carina表示：“系真系相对比较少，尤其是女团其实系好难喺一个商场表演里面，有啲位系有一个环境嘅局限呀，如果个台唔系咁大嘅时候，我唱歌嘅声量都唔会可以做到我实际想表现嘅𠮶种效果，我觉得系有 limitation嘅，但系都无办法，喺我哋依家有嘅资源同埋我哋有嘅情况下尽量去show畀大家睇啰，所以其实我觉得今次可以嚟做音乐剧都一个好好嘅机会啰。”面对韩国女团的高水准，她们自知有距离，但也希望在有限资源下做到最好。

无惧身形负评　珍惜与伙伴同行时光不留遗憾

面对演艺圈的残酷与网民对身形的刻薄批评，两位女孩已练就一颗强大的心。阿妹曾被指“大份”、现时又被指“太瘦”，面对身形评价她早已释怀：“我谂返转头其实我好难去追到每一个人都会钟意我啰，所有人对于钟意呀，呢样嘢你无办法去迎合晒所有人。”她直指自己是一个普通人，有时可能吃多了、变肥了；有时又可能勤力做运动、瘦了，但既然无法迁就到所有人喜好，倒不如选一个最舒服的状态：“如果你喜欢我嘅你咪继续喜欢我，你唔喜欢我嘅话咁就唔紧要啦，我会欣赏自己每一个状态。”

问到会否觉得做偶像只能“做得几耐得几耐”？阿妹用一种笑中带泪的豁达回应：“用现实层面嚟讲就当然系啦，一生人好短，但其实你无办法做女团做一世㗎嘛。如果到时我80岁仲要《三分甜》，咁样真系唔得啰。所以我喺我可以做到嘅时候，我做到几多就去做啰，但我会去到80岁回望返，我唔会后悔自己无去尝试啰，因为我觉得最令人后悔嘅就系无尝试过啰。”

Carina则希望能有更多本地女团合作的舞台，延续这份珍贵的同伴情谊，早前因为歌曲的宣传企划，她跟女团前辈HotCha、Super Girls、As One等成员合作，也让她有所得著：“全部前辈对于佢哋以前做过嘅女团，其实望返转头都系会觉得好感激有𠮶段时间，因为有同伴嘅日子唔系咁多。𠮶段时间我哋真系可以一齐要同一个时间起身，然后同一个时间去妆头，同一个时间去做Show，然后𠮶段时间嘅经历只系得你隔篱𠮶个会知道，所以我觉得系好珍贵啰呢样嘢。”这两位Nancy正带著这份能量“尽做”，希望香港各个女团能继续有不同合作。