黎纭蔚（肥肥人/ Vivian）昨日（8日）出席由黄浩然、钟宏杰执导电影《厨师发办》首映，是她首次拍戏，“我今次个角色呢，搞笑啲讲就叫做‘女神’啦，其实我冇咁样讲自己㗎，系导演咁样形容嘅。呢个角色我要饰演‘尴尬’，原来‘尴尬’都系一个几难饰演嘅情绪。同埋喺套戏入面，我喺头同尾都要出现，呢啲都系观众嘅记忆点黎，所以我都觉得系好紧要嘅位置。咁所以喺拍呢套戏之前，都有去上演技班，去令到自己个演技精准少少，唔好‘污染’大家只眼。”她又说平时拍广告，基本上要演浮夸的话，多几个表情就可以，但今次要演出“尴尬”感，反而不能有太多表情，变化在于细微位置。

赞男主角小野真身骚厨艺　自嘲学煲汤煮饭防嫁唔出

讲到可有幻想首次在大银幕见到自己的感受，她笑言：“我希望唔好咁肥啰块面，好彩再做下facial喺拍戏之前。不过系两年前嘅我，呢套戏应该系两年前拍落嘅，𠮶阵系包包面啲嘅，而家瘦咗少少。”今次拍戏找来真实厨师预备美食，主演之一杨偲泳就透露很难忍口，试过偷食到被制止，肥肥人就表示没有食到太多好嘢：“我系好循规蹈矩嘅演员，但系个卖相真系好靓，同埋我觉得男主角小野（卢镇业）啦，佢真系做到嘢！佢有去过个厨房，我见到佢哋有学习点样刀工呀、点样抛镬呀，呢啲专业嘅技能，佢真系学到我谂十成都有八九成似，所以我真系见到佢摙𠮶嚿鱿鱼同埋𠮶个醋饭，真系有番几手真实感，所以出到嚟个成果都靓仔。”她不讳言自己的厨艺仅识煮面，但偶然都会整葡国鸡、煲汤：“费事嫁唔出啦！”

拒做外貌协会惊靓仔有毒　化身彩蛋请床哥食柠檬

肥肥人今次主要跟小野及JFFT的床哥合作，她预告自己属彩蛋角色：“我同床哥呢，系有一段‘昙花一现’一两分钟嘅戏份，就系讲……其实系佢追唔到我嘅。咁小野就喺前面，一路整啲菜，一路好O嘴无言咁样。佢系目击成个尴尬过程嘅人。”被问自己拣男朋友会否是“外貌协会”，肥肥人果断否认：“我唔系好钟意靓仔嘅，我就钟意……有时间陪我嘅、上进嘅、同埋孝顺啰，专一都好紧要。（问：靓仔唔考虑？）我惊靓仔有毒啰，有好多好靓嘅女仔嘛，佢都会觉得自己可以追好多啰。（问：有啲唔靓仔都有毒。）咁……咁睇感觉。”

赴韩拍《女行团》无惧寒冷露腿　预告有泳衣场口

肥肥人早前帮HOY TV拍摄旅游节目《女行团》，她指目的地韩国当时非常寒冷，但为了表示诚意，都有露少少脚去拍摄，希望大家多多支持。虽然是首次拍旅游节目，但肥肥人因觉得旅游是超级超级轻松的事，因此成功寓工作于娱乐。讲到节目较早的集数中，另一主持邱晴的泳装打扮非常养眼，更惹来网民Cap图，肥肥人卖关子，但亦暗示会有泳衣场口，她大赞邱晴：“哗，佢真系好精彩呀，佢系著咩衫都靓嘅。咁如果比著系我呢，都系根据呢个剧组嘅安排嘅，都有一啲泳池嘅画面。”

转型做艺人盼多线发展　拒违心赞难食食物

她指自己本身热爱韩国，尤其喜欢食猪骨汤饭，又直言若吃到不好吃的东西，不会扮好食：“旅游呢啲嘢我唔认为系超级需要技巧，而系我个人太直率去讲‘呀，呢个好好食呀。’如果真系唔好食我又真系会讲，我谂下次可以多啲修饰一啲字眼，我会觉得搞笑啲，但系你哋又钟意我直率吖嘛，所以我都仲喺度斟酌紧个中间位。”目前肥肥人正慢慢从KOL转型做艺人，希望电影、剧集、广告多线发展，又谓：“如果拍剧都开心嘅，同埋美食节目啰，我真系好钟意食嘢。同埋旅游都可以继续，可以寓工作于娱乐，唔使麻烦啲朋友帮我揸机，导演会自动‘哎呀，靓呀！影呀！’咁样。”