很多人都知道黄浩然入行的伯乐是杜琪峰，从《十万火急》正式踏入影坛，拍过《新扎师妹》、《孤男寡女》、《PTU》等电影，再转战电视台成为高产一线小生。一路走来，他把握每个机会，除了忽略家人外，他逾10年过著每日睡眠不到四小时的非人生活，试过两剧齐开连续60小时开工，咖啡、烟、止痛药不离手，务求不让自己倒下。黄浩然曾经很怕自己病，因为一病就要停工、会麻烦到人；但到最后，真正救回他整个人生的，偏偏就是那场不得不停下来9个月的大病。
2014年他突然患上罕见的免疫系统疾病，被逼辞演重头剧《张保仔》，24小时内公司已换人补上，他才第一次真正反思：“工作上冇咗呢个角色，可能唔够24小时已经有人可以代替你，但系……我个仔、我老婆、我阿妈，如果冇咗我呢个仔，根本冇可能可以有人代替你。”
服装：CLOT

杜琪峰睇杂志相中邀入行 承诺必让他大学毕业

黄浩然早在中学阶段，走在路上已不时被星探和经理人公司向他招手，但真正让他踏入演艺圈的伯乐，是杜琪峰导演。他说当时报刊杂志流行时装专栏，加上他在理工大学读设计的朋友常找他当模特儿等，所以接了不少模特儿工作：“我真正入行系因为杜琪峰导演，佢喺一啲杂志𠮶度睇到我，跟住interview，跟住就入行。”甚至连Angelababy的经理人阿Kim，都曾是他的推手：“我好记得好记得，我第一辑正式入行嘅相，就系阿Kim有份帮我影，系佢去策划呢件事，就系喺《YES！》𠮶度，我自己讲出嚟都觉得有少少尴尬，‘男城市惊喜’，𠮶阵时由第一辑相，亦都系我有啲好似做model嘅comp card啲相，都系阿Kim帮我影。”

当知道杜sir要签自己时，浩然满心欢喜，毕竟他是看《阿郎的故事》长大的。然而，他本身家教甚严，母亲担心他入娱乐圈会误交损友或学坏，于是亲自陪同他去见杜Sir：“佢好惊我读唔到书，所以杜生𠮶时应承我妈咪：‘我唔会要佢读唔到书嘅，我一定会向你保证啦，佢一定大学毕业！’”这份承诺，成了他入行的通行证，而黄浩然最终也修毕香港城市理工学院资讯科技系（即现在的香港城市大学）。

初入行获林雪送上早餐 见识刘青云专业

第一部戏就是《十万火急》，他於戏中饰演初出茅庐的“新仔”消防员，跟他在影坛的经验一样，如白纸一张。说起他对片场的第一印象，竟是一份早餐：“我第一份早餐，就系林雪买俾我嘅。佢𠮶时仲系场务嚟，我记得系热奶茶同腿蛋治。”至于第一场戏，讲述他与刘青云拖著气泵冲出火场，青云更有如他的盲公竹：“佢喺戏里戏外都好照顾我，通常我哋拍动作都会话‘3-2-1！走！’或者‘1-2-3’咁样，青云永远第一件事就同我讲话‘喂，2好走喇！通常啲武术指导数到2就揿㗎喇，爆火、爆炸𠮶啲，即刻走呀！’佢用一个咁嘅形式讲笑嘅形式佢话俾我知，要小心呀嚟到现场。”

《十万火急》最高潮的火警戏，在当时未改建的南丰纱厂拍摄，青云叮嘱他：“上到嚟第一件事，揾咗个逃生位先！好黑㗎，你一定要记住边一度走，去嗌救命，去逃生。”更令他大开眼界的，是前辈的专业。结局一场戏要拍大家爆破后从泥窿钻出来的狼狈样，化妆师本准备了护肤用的泥，但杜sir一声“得未呀？开拍㗎喇㖞，冇光喇！”刘青云二话不说，直接在充满脏水的废墟地下挖起污泥往脸上抹：“跟住我望到，哗，原来系要咁㖞，即刻跟住做啰。𠮶时我哋喺𠮶度已经系拍咗差唔多九个月、一年，系一啲好污糟嘅泥，喺现场经历咗一年，人哋行过晒，污糟啦总言之，佢就喺度抹，咁你会觉得真系好专业㖞，同埋好为个戏著想，个目标就系完成呢场戏，好值得学习。”

《十万火急》极辛苦 吸樟脑黑烟恶臭几日未消

即使多年后回想，《十万火急》依然是浩然入行以来最辛苦的一套作品，至今无法超越，他大爆：“以前真系揾啲樟脑嚟烧去放黑烟，一吸入个肺、个鼻，我哋就算收工几日之后，整返啲痰出嚟都有色嘅，因为太多浓烟，虽然我哋有带𠮶个猪嘴，真系消防员𠮶个氧气罩，同埋孭晒樽，但系我哋喺现场其实啲空气都好污糟，可能开一日工要唞一个礼拜。”

经历一整个寒暑，黄浩然身上的还是同一套两层防火衣和逾30磅装备，冬天得几度，要淋湿身冻到“黐肺”；夏天40度，一样揹著同样装备在大火中穿梭：“你问我而家做唔做到呢，未必得呀真系，𠮶时真系年纪轻，咁梗系得，真系几犀利。”

零经验入行频出错感沮丧 原本想唱歌非拍戏

面对高要求的杜sir，零经验的浩然却在《十万火急》中孭了不少戏份，这使他感到无比怯场和沮丧，整个环境不论是人或机器，对他而言都是不熟悉的，亦对剧情下一步毫不知情，不知所措：“后尾其实一路拍杜生你知嘅，好多时佢都会想攞一啲好真实嘅反应，譬如所有嘅演员，佢究竟即场面对呢一样嘢佢系咩反应呢？但系原来我系冇反应㗎㖞，好多嘢其实俾唔到佢，所以有啲位佢都几𤷪㗎对住我，但系佢对我算好仁慈嘅，佢系冇闹过我嘅，但系有时佢唔闹你你仲惊，佢𤷪𤺧，点解你做唔到㗎？”

剧情讲到他在火场中搜索，要拿著电筒查看，不过电筒明明照向右边，浩然却望了左边，直言：“我系连最基本嘅嘢都做唔到嘅演员，拍完《十万火急》系好沮丧！”当时他跟吴倩莲同门，原本公司想栽培他唱歌，他自己亦想做歌手，故此出道头几年都有学唱歌，但后来自觉才华不及同期新人，加上唱片业市道不景气，最终他选择专注演戏，这一走，就是29年。

被杜琪峰带去多明星大场合 遭冷待成进步动力

杜琪峰对黄浩然确实偏爱，却从不溺爱，虽然被网民形容为“做错就X”的杜Sir没有责骂浩然，但他选择用另一种方式去栽培他，特地带浩然去参加巨星云集的活动，由得他在一旁被冷落：“越系大型嘅活动，越系好多大星嘅活动，佢就越叫我去，要俾你感受吓，会唔会见到咁觉得自己好似少少俾人冷待，冇人访问你，冇人理你。而你望到‘其实我要努力喇，我要再努力多啲，希望第日可以成功啦！’佢唔会因为觉得冇人理你而叫你唔好去，你去啰，感受吓乜嘢系现实。”他从杜Sir身上学到的就是：“呢个世界系唔会有侥幸，唔会有侥幸可以俾你一个冇料嘅人去成功！”以及“自己要尊重自己人哋先会尊重你，当你唔做好你嘅嘢，做好你嘅本分，唔尊重你自己，咁其实不如唔好做。”

问到在大明星面前，是否真多了一股力争上游的动力，他坦言自觉渺小，亦经过不开心的瓶颈期：“喺𠮶一个阶段，其实几迷惘嘅，我点样做好呢？我点样可以去做好呢？”他只有逼自己更努力去进步，做gym、跟罗冠兰学戏、冇工开的日子也去片场旁听偷师等等，只求让观众接受，“你有阵时人嘅嘢好怪，你越急，你越系惊，你就会越大嘅压力，你就会越做得唔好， 𠮶时其实有樽颈位，直至真系《新扎师妹》，喺𠮶度你开始揾到啲乐趣。”

《新扎师妹》成转捩点 开始找到拍戏乐趣

《新扎师妹》的“剑雄”成为了他的转捩点，不但让他认识了现任太太，也让浩然感受到演戏的满足感，他最记得为了骗吴彦祖要扮古惑仔去命令杨千嬅“做鸡”的场口，“我系未演过喜剧嘅，一路拍，一路同导演沟通大约要点，好多嘢就即场发挥，自己做𠮶个感觉。𠮶时我好记得仲系用菲林同埋VHS去录，拍完之后好似唔知一个星期，剪咗个rough cut，喺部机play出嚟，大家都觉得好好笑，每日𠮶饼带就摆咗喺个mon隔篱，得闲啲人就插𠮶饼带落去睇，跟住就会笑。咁大家又觉得呢个角色呢场戏几成功㖞，当然到出街好开心，就系观众同我哋嘅谂法都一样，都觉得𠮶场戏系好笑，亦都增强咗自己信心嘅。”

《PTU》“捽甩佢”一幕 怕交不到戏累全家

及后在《PTU》里，他切切实实体现到何谓“银河映像，超乎想像”，戏中众人好像走了很多路，但其实来来去去都是杜琪峰公司5分钟步程的地方，他因而学会在有限空间里创造无限。之后浩然又讲到最经典的“捽甩佢”一幕，他当时正站在后方看任达华不断掌掴飞仔，感觉比自己被掴更得人惊，怕自己表情交不足戏：“虽然我唔系主𠮶part，但系我系喺现场，我企喺后面望住佢打，哗！你会谂，呢啲位，如果你喺个wide shot都濑嘢呢，就闹梗㗎啦！平时唔闹你，但系呢啲咁紧要嘅戏，你衰咗你就好大镬㗎喇！你喺旁边睇住人俾人打，而你NG㖞，累全家你会好内疚㗎，所以真系仲惊。”

影坛转战电视台 木人巷训练火速进步

2006年电影圈市道低迷，黄浩然面临8、9个月没戏拍的困境，继而接受金牌监制梁家树邀请投身TVB，从关永忠监制的《两妻时代》开始，浩然深受曾励珍（珍姐）及梁家树、梅小青等喜爱，虽然不是“亲生仔”，却机会不断。电视台很多人想跃上大银幕，可是黄浩然却是由影坛转战电视台，于部份人心目中或是“降呢”，他却直言当时完全没有“hard feeling”，“有冇一个关口呀？𠮶一刻真系冇谂咁多，你冇饭开㖞！你冇嘢做㖞！有新嘅机会自己会觉得好感恩，系一个转机。”他认为有流动就有生机，因此当时是“喽饭应”，“有演出机会，就系可以俾人睇到，亦都真系要揾食㗎嘛，要开饭㗎嘛。”

10年间日睡4小时感觉被掏空 止痛药咖啡烟不离手

他在电视台吃得很开，是收视福将之一，但这亦为他带来逾10年日夜颠倒的非人生活，他表示：“我有十年时间，每日系瞓唔超过四个钟。有啲人可以喺公司冲个凉，瞓喺车，但系我唔得，我点都要返一返屋企冲个凉，瞌一阵咁样，如果超过三个钟我就会上床瞓啰，如果系唔超过三个钟，我就喺个厅𠮶度钓鱼㗎咋。”面对排山倒海的工作量，每日生活只得开工和睡觉，完全活生生把黄浩然掏空，没半秒喘息让他停下来听听自己内心的声音、思考下一步行动，也因此他留在这个其实不太舒适的舒适圈达13年之久。讲到当年的Chur爆生活，最极端例子是拍摄《巾帼枭雄之义海豪情》与《公主嫁到》重叠的那一个月：“我两个剧都系做男二，都好多戏份嘅，我试过系有五组通告，系连续60个钟，古装拆咗个头，gel返个蛋挞头，就去返民初，民初完又戴返个假发又去返古装，系60个钟，有得瞓可能都系三四粒钟。（记者：真系想像唔到点做。）系你一句对白都讲唔到，你最差嘅状态系⋯一开口已经讲唔到嘢，个脑白晒㗎！”

浩然自言虽然暴躁、不易相处，不过优点是从不推job、不投诉，也不怨辛苦，接了工作就尽责任将它完成，以免为他人带来麻烦。而为了撑下去，他困就“队”咖啡、一日食三包烟，还学会了“止痛药当糖食”：“3、4度拍啲落水戏，半夜、冬天、6度以下叫我剥衫拍打戏，成晚唔可以着返件衫，真系好冻嘅情况，我惊自己病，我试过一路拍一路食Panadol，我系𠮶啲人嚟，我唔可以俾自己病。”

挨出祸身体响警号 突患免疫系统罕见病

他极力阻止自己病倒，但物极必反，长期熬夜及睡眠不足之下，身体最终却向他来一个大反扑！那是2014年9月的事，他正拍完台庆剧《名门暗战》，飞往澳大利亚参与TVBI宣传及举行粉丝见面会，一上机已开始发病：“我谂我成20年冇发过烧，开始系有啲低烧，一路都唔退，食咗啲Panadol就开始会退烧，但系唔食又发返；我冇乜点理佢，觉得冇乜嘢，跟住就去咗澳大利亚做TVBI嘅宣传，一上机就开始讲唔到嘢，个口好似好多痱滋咁， 好痛呀个喉咙！你谂吓，我粉丝见面会㖞，但系我基本上全程都冇讲过嘢咁滞，净系栋个人喺度，越嚟越严重，个喉咙好痛……”

浩然在当地求诊，可惜食完喉糖对病情也毫无帮助，不过他回港后依然没有放过一日假，随即死撑开工拍了个户外用品广告：“我睇返啲相，其实已经肿晒㗎喇个人，好肿，好唔正常，系一个好重病嘅样嚟㗎，𠮶辑相最后用唔到。”广告后翌日他就出席了主演剧集《张保仔》试造型见记者的活动，当时黄浩然戴了圆框眼镜，大家都以为是让海盗造型更神似，但原来真正目的是为了遮蔽他那肿如鸡蛋的眼睛，这亦是他被逼停工前最后一个工作。他忆述：“我系见记者都讲唔到嘢，好似哑咗咁，跟住我好记得一离开咗TVB个停车场，我就打俾我老婆，用我仅余嘅声音‘帮我book入医院啦，我顶唔顺！’一入到医院，因为我太太嘅舅父亦都系我嘅主诊医生，佢就话‘喂，佢唔对路㖞，佢唔得喇！佢唔好拍喇！’我系冇试过系因为我推一个工作而舒一口气。”

首次推Job反松一口气 火速被易角引反思

医生指出浩然所患的，是罕见的免疫系统疾病——贝塞特氏症，病因不明，不过医学上普遍认为压力是诱因之一，严重者除了可能全身皮肤溃烂，更有机会因血管并发症等致命。浩然于是听从医生建议停工，请太太莫家嘉致电珍姐辞演张保仔，然而The show must go on，公司很快就找人补上其主角岗位，这亦让黄浩然有了很大反思：“好快，第二日我知道佢哋已经揾咗第二个人，就揾咗Tony洪永城，亦都令我反思嘅呢件事。我喺工作上冇咗呢个角色，可能唔够24小时已经有人可以代替你，但系……我个仔、我老婆、我阿妈，如果冇咗我呢个仔，根本冇可能可以有人代替你。我都会喺度谂喇，究竟我点行呢？原来其实你自己都几重要㖞，亦都会知道要好好咁珍惜同屋企人相处嘅时间。”

曾9个月没抱儿子 老婆忍耐力强也终求救

回想过去，浩然对家人充满内疚，大仔出生时他正忙于拍摄《我的如意狼君》，剪完脐带就赶回厂开工，之后又接著开拍《拳王》：“我有八、九个月冇抱过个大仔，佢都容忍咗我。”此外，浩然自爆平时收工回家似丧尸，“你见我喺出面好似好多嘢讲，或者有几搞笑，但系好多时你返到屋企对住另一半或者屋企人，真系好似丧尸咁，摊喺梳化，揿着电视新闻台，不断喺度loop，冇表情，佢同你讲嘢你又完全冇反应，屋企又乜都唔理，好多时我哋依行会系咁㗎，我自己就直程系㖭啦。”但太太亦没有怪责他这一面，继续默默包容忍著。

他指家嘉很谅解其工作性质，基本上处理到的都不会劳烦浩然，而他也曾有一段时间视作理所当然：“揾好多借口，觉得做嘢就大晒，我做嘢㖞，你咪要去take care头家啰！”直至家嘉一边照顾大仔、一边怀著细仔，最不舒服、最需要人照顾的时候，浩然却又要出埠拍剧，那是太太第一次向他求救：“有个监制就啱啱升监制，以前佢做PA𠮶阵我已经同佢合作，佢就同我讲‘我升监制喇，不如你做啦，但系要出埠嘅。’我话好呀好呀，跟住我同我老婆讲，佢好少会叫我唔好做一个job嘅，但𠮶次佢话‘你要出埠，我搞唔掂，你出埠，分分钟离婚㗎喇！’”亦正因这句话，他第一次推掉工作：“佢系一个好强嘅人，佢基本上搞得掂呢，佢系从冇试过向我求救，佢有咩嘢都系瞇埋眼冲，做咗佢，但系𠮶次佢同我求救，我就知呢样嘢系好严重。”

内疚为工作忽略家人 早年甚少一家外游

幸好那次推却了，因为剧组最终未能如期杀青，若他参演的话，将错过细仔的出生。而经历过大病之后，他更对从前忽略家人深感内疚：“之前喺电视台，话放假去旅行，我都唔敢plan，我好内疚呀依样嘢！离开电视台之前，你唔会知下一个工作系几时，编排到俾你你就要做㗎嘛，你唔可以推㗎嘛，但系如果我book晒机票，同啲小朋友去旅行，咁我点呢？所以其实，内疚喺电视台𠮶十年八年系好少陪屋企人，或者陪小朋友、去吓旅行，好少。”幸好大病一场后他放慢了脚步，剧集减产至每年一两部，追回失去的时间，陪伴两个儿子成长；最终他在2021年正式离开TVB，他坦言：“我望到啲仔，觉得佢哋都好钟意接触新事物吖，点解我唔试吓呢？原来我自己其实都仲好有……一啲憧憬，对于电影圈或者大银幕睇到自己𠮶个满足感，原来都仲系好大嘅时候，我就谂，好啦，我都要跳出呢个舒适圈。”