在80年代加入影圈的曹查理，当年在周星驰电影《整蛊专家》客串药房卖春药的“单眼佬”令人印象深刻，曾演出逾80部三级片的他更被封为“三级片天王”。近年曹查理淡出影圈，并转战内地登台赚钱，但去年突然自爆曾经历半边身麻痹险死，令他决定正式退休。近日曹查理难得返港，接受资深传媒人汪曼玲YouTube《快拍.曼镜头》访问，大谈昔日拍摄三级片的点滴及分享近况等等，更自爆曾一夜之间输了过千万，令他大受打击！

曹查理奉劝年青人不要“发明星梦”

近年曹查理定居四川南充，积极经营抖音，但自觉普通话一般、又不会四川话，加上市道差，所以他决定放弃，并已搬离四川，更奉劝年青人不要“发明星梦”：“做明星系唔得㗎，冇后继，后继意思系有前就冇后，你今日好运，唔系代表你永远好运，你只不过系啱啱俾你撞到啫。红嘅时候好厉害，但系睇嚟睇去都系𠮶几个，唔红嘅时候系一大拃，呢拃个个都好惨，可能连开饭都冇钱。”

曹查理做直播一晚收十几万打赏

曹查理坦言早几年已劝圈中人抓紧登台的机会：“有你就搏命接，赚多啲钱。”因近年市道差，不但酒吧式微，连拍微电影都不会找香港演员，他直言网红不易做：“我都系网红，我系非常之红嘅香港一个网红，我揾到钱，我一晚收十几万，打赏十几万。”不过扣除提成、工作人员薪金、税务等各项开支之后，到手就只剩下8000元。曹查理指在内地做自媒体多掣肘，包括酒、钱、鬼等字眼都不能提及，只能用“8+1”、“money”、“阿飘”等代替。

曹查理巅峰期日赚9万

曹查理忆述当年拍完《警察故事》走红后，即转型拍“爱情动作片”：“因为冇人够胆拍，我够胆拍，咁变咗我红喇。𠮶啲片系成部戏里边片名未有，乜嘢都未有，主角曹查理写咗出嚟，拎我个名就已经拎去台湾可以卖钱。”他坦言正式计算应拍过逾300部“爱情动作片”，曾连续开9部戏，更有传酬劳高过刘德华：“又唔系咁讲，刘德华有瞓觉㗎嘛，我系24小时唔瞓觉㗎嘛。因为我知道机会难得嘛，咁我系一日有24小时，我每一日8个小时畀你一组，每一组就3万蚊，港币3万蚊，咁一日呢就可以收9万蚊，咁样拍。我唔系唔瞓觉，我系去到现场化好晒妆，我坐喺张櫈度就可以瞇埋眼，擘大眼就埋得位，你冇办法㗎喇，去到𠮶个地步，你只可以搏命，因为你搏命去接呀嘛。”

曹查理炒窝轮一夜输过千万

曹查理搏命拍戏赚到盆满钵满，但却一夜之间化为乌有：“我一学人炒窝轮咪输晒啰，一夜之间唔见咗千几万㖞，我辛辛苦苦揾埋揾埋，一夜之间唔见咗千几万，成个人傻咗，即刻匿埋，即刻搬走，手机又唔听，乜都唔理，自己匿埋，冇办法接受，一夜之间唔见咗咁辛苦揾嚟咁多钱，差唔多而家嘅三千万。我好老实咁讲，我唔系普通人，我真系揾好多钱。我仲有样嘢我系好清楚，罗湖福田𠮶阵时，𠮶张地图我睇过晒，地铁站喺边度，𠮶个总站喺边度起，隔篱啲楼几钱，系一万蚊一层，人民币一万蚊一层，我每日可以买九层，十日九十层㖞。拍咗三年几四年㖞，你话𠮶啲，几多栋大厦系我㗎？我损失咗呢个机会，呢个又系一个机会我损失咗。我唔会怪人，系有啲贪。”当年曹查理输钱后曾匿埋8、9个月，连家人都找不到他，直至后来他在朋友介绍下，转做火锅店经理，生意极旺，带挈他每个月赚到几万元佣金，但最后店舖出事，未能继续经营。

曹查理拍三级片拍到呕

曹查理坦言拍摄三级片难过心理关口：“一男一女两个人喺床度做𠮶样嘢，梗系剥清光嚟做㗎嘛，一定要剥清光嚟做，几难过𠮶关，女仔难过，男仔更加难过。初期啲女仔个个一听到曹查理就惊：‘呢个曹查理拍，癫㗎佢’。有一次拍何藩部戏，我同佢拍村上丽奈，日本AV女优，由晏昼两点钟喺酒店拍，拍到夜晚十二点食完宵夜，𠮶个女仔同佢翻译讲：‘不如嚟个真，唔好嚟个假喇，嚟个真快手收工。’翻译话冇得嚟真，呢个系演员嚟，呢个系明星嚟，唔得嘅。咁之后呢继续拍，拍到我哋食过嘅宵夜全部呕返晒出嚟，之后𠮶个女明星话以后都唔再拍呢啲，咁佢返返日本。”

曹查理激赞利智最靓　与吴家丽合作“着咗火”

曹查理合作过的女星无数，位位都是女神级人马：“叶玉卿系够胆同放，佢够胆放就变咗冇人睇，喺现场冇人睇。（边个系遮遮掩掩而最吸引呢？）利智啰，利智最靓，身材真系最靓，李连杰唔好意思，讲你老婆。我同佢拍过《四千金》，佢着泳衣出嚟，哗，身材好到不得了，真系靓，白里透红，所以李连杰真系识揾。”曹查理更自爆与吴家丽合作险出事：“终于有些少‘着咗火’嘅，始终系男男女女，一个过程，到导演Cut，女仔梗系走得快啦，男仔唔走得，停一停，我唞一阵先，要平静咗先可以离开张床。”

曹查理揭女星饭局内幕支票随便填

曹查理更大爆当年女星被邀出席饭局，支票银码随便填：“你认为你自己值几多就填落去，我见过，送劳力士手表，足金。”他又大爆曾在酒店撞破：“个个都价钱唔同，个个都有名。我点解今次咁够胆讲嘢，因为我无欲无求，我又唔惊人，我又唔使惊你，你又唔使惊我，所以我咩都够胆讲。”

曹查理坚拒拍四级片

虽然曹查理拍过多部三级片，但他坦言亦曾有过心理挣扎：“因为我心喺度谂，一系你就唔好拍，你拍就要放到尽。每次上场就谂住钱、钱、钱，总之我拍完呢场我就有钱，我拍完呢场就有钱，咁你咁样谂，你就过到呢关。我直到而家讲畀你听，我拍咗咁多部我都未睇过，如果我睇咗之后我会好憎自己，咁样都拍到出嚟。”曹查理当年更曾获邀拍四级片，但他就坚拒：“我未到呢个地步，我唔系拍四级㗎嘛，我系拍三级已经系最顶，四级系除非我系争人大耳窿钱，或者争外面好多钱，我拍一部四级嘅畀你，还债。”

曹查理台湾全裸拍戏崩溃痛哭决定收山

不过在台湾拍完《夜夜磨刀的女人》后，曹查理决定不再接拍三级片：“我个心态跌咗落嚟，我唔想再拍。佢要我喺个沙滩度走出嚟，被一个女人用刀斩我，追斩我，系冇着衫喺个海滩度走出嚟，朝早7点已经去到拍，我话我拍唔到，𠮶阵好多细路仔喺度，我点拍呀？我冇着衫㗎嘛，我话唔得呀。”最后曹查理被迫上场：“一拍完𠮶场戏，啲人𠮶啲细路仔全部喺度叫救命，突然间有个剥咗衫嘅男人走出嚟，后面有个女人追住嚟斩我。我一入帐幕就喊，喊咗好耐，我为咗咩呢，钱又唔系冇，以后都唔拍。”