周殷廷（YT）为银行拍摄广告，一向深受年青人欢迎的YT呢日穿上简约型格西装，拍摄广告时摆出多个型格甫士，完美展现其成熟稳重的魅力。

对于今次担任代言人，YT表示自己私下一直有了解理财资讯，更直言要“亲力亲为”管理资产：“因为我觉得理财呢样嘢要自己去学习，无论系点都冇得赖，呢啲应该要有嘅知识嚟嘅，唔系畀咗人（管理）咁就算啦，即系我觉得唔应该咁。”

周殷廷认为理财最重要系安稳无忧

讲到理财心得，YT认为目标唔一定系要赚大钱，最重要系安稳无忧：“对我嚟讲理财就系可以好安定安稳咁样过完呢一生，然后唔会冇钱。咁我觉得呢个就系一个好基本嘅概念啰。即系唔好讲话赚大钱呀或者点样点样，但如果你正常打份工嘅话，你想去到你年纪大啲嘅时候都安稳无忧，我觉得呢个系非常之紧要嘅一个步骤。咁我觉得唔谂太多，但平平安安已经系好好㗎喇。”YT笑言除理财外，管理时间亦非常重要：“依家最宝贵嘅财产系时间，透过时间亦都可以转化为金钱。越早开始学识理财投资，呢一样嘢系好紧要嘅。你简直系无敌㗎，只要你有时间你就已经赢咗㗎喇！”

虽然平时拍MV经验丰富，但YT呢日竟然自爆拍广告时会“紧张”：“我自问系完美主义者，加上自己有幕后经验，知道导演、客户有期望、有要求，即使导演话‘Good Take!’，心入面都会好紧张，由上场𠮶刻一直喺度谂，我头先系咪已经做到最完美，会唔会有嘢甩漏呢？”不过YT都以专业态度完成，加上片场气氛轻松，所以完全冇压力。

日前周殷廷亦为乐迷报喜，宣布将在8月红馆举行个唱，Poster中YT展示一身肌肉上阵，大骚“男人味”：“其实我唔系话今次演唱会特别操fit啲，平时一日都系食一餐饭，所以都习惯咗保持身形！今次红馆演唱会好多谂法，尽量唔讲太多想比惊喜乐迷。（会唔会跳舞？）呢个我会努力嘅，至于嘉宾真系未谂，要同production Team开晒会先至拍板。”