全城期待的《You & Mi 郑秀文演唱会2026亚洲巡回终点站－香港启德主场馆》，7月10日至11日两场门票，继4月20日信用卡独家优先订票火速售罄后，到4月28日门票公开发售，反应同样热烈，门票全被秒杀。主办机构寰亚娱乐于两日后宣布加开7月12日终极尾场，希望观众能够把握最后机会，入场感受Sammi的舞台魅力。

Sammi感激地说：“对于上次4月28日我嘅启德主场馆门票公开发售，见到大家咁热烈支持，呢个消息对我嚟讲系相当鼓舞同振奋，希望加场，让更多人睇到我哋呢个show嘅诚意、制作、同埋我嘅演出，因为我哋book场地嘅时间好有限，向前向后加都冇可能，只能够加到呢一场。”

7月12日终极尾场门票，将于5月11日早上十时于快达票公开发售，莫讲话观众要校定闹钟抢飞，就连Sammi也为了扑飞而头痛：“的确好多朋友揾我买飞，但我冇办法满足晒所有朋友，因为cut飞情况都好严重，始终座位有限，亦要预留门票公开发售，至于会唔会有睇massage恐惧症？咁又未至于，但事实票务情况系相当紧张，亦有好多朋友同歌迷留言话买唔到飞，见到佢哋好失望，希望5月11日加场门票公开发售嘅时候，大家可以好幸运、好顺利买到飞啦！我唯一可以做，系应承大家，会尽力做好呢个show，我嘅第一次启德演唱会，会全力以赴，同埋见到大家对呢个演唱会咁大力支持，俾咗好大嘅力量同好正面嘅鼓舞，我一定会做好自己。”

上月完成两场吉隆坡站演唱会，Sammi展开了十天的休假，笑言每次回想与台下吉隆坡站观众互动的快乐，都有种令她“飘吓飘吓”的感觉，身体在休息，但思想上仍然亢奋，她说：“呢十日假期，我不断有谂启德show嘅细节同内容，因为完咗启德，仲有好多工作要做，所以呢十日嘅小叉电非常重要，体力亦恢复得唔错，最紧要系食咗好多自己好想食嘅嘢，例如肥腻同煎炸嘢，所以呢十日相当之享受。”

叉满电，返回工作岗位，Sammi每日都尽全力为7月三场启德主场馆站演唱会积极备战，对于每一个细节和流程，都希望做到最好：“由于呢个系You&Mi演唱会亚洲区终站，会沿用番上次澳门站嘅rundown，有睇过嘅人都好钟意，所以启德站会用番呢个rundown去出发，但会喺既有嘅内容入面，一啲细节、铺排上会有所提升，所以呢个系我俾自己同埋团队嘅一份功课。”

正如Sammi所讲，要完成三场启德站演唱会，体力输出非常之庞大，自律的生活作息、积极练歌排舞，是非常重要：“近排我嘅生活作息好有规律，每日起身就会做心肺体能嘅锻练，因为Sammi呢种表演方式，体力需求系好大，所以要确保自己身体应付得到，除此之外，练歌练声都系好基本，仲有排舞、好多嘅会议，因为演唱会有多嘢需要琢磨需要商量，同步又开始为新唱片进行录音嘅工作，虽然好忙，但心态上系好愉悦，因为每当我向住一个目标进发，过程我会好享受，可以俾到自己好多正面嘅能量，系一种好开心嘅过程，所以我会好enjoy，同埋好多谢观众，俾好多支持同鼓励我，我一定会做得更加好，希望所有观众可以喺启德呢个场馆感受一个满意度好高嘅rundown，多谢大家！”